Sunday, December 5, 2010

இந்திய ஆளும் வர்க்கம் அமெரிக்க அடிமைகளே.மேலும் ஒரு சான்று.


நவம்பர் மாதம் அமெரிக்க அரசுத்தலைவர் ஒபாமா மும்பை வந்த போது அவரது பாதுகாப்பிற்கென மூவாயிரம் அமெரிக்கர்களை கொண்டுவந்து இறக்கியது அமெரிக்கா.மும்பையிலும்,தில்லியிலும் ஒபாமா வருகை தரும் பல பகுதிகளை, இந்திய இறையாண்மையை அவமதிக்கும் வகையில்,அவர்கள் கட்டுப்பாட்டில் எடுத்துக்கொண்டனர்.இந்திய பாதுகாப்பு படையினரால் ஒபாமாவை பாதுகாக்க முடியாது என்றால் அவர் இங்கு வரவேண்டியதில்லையே.இந்த அவமதிப்பு போதாதென்று இந்திய மக்கள் பிரநிதிகளையும் அவமானப்படுத்தியுள்ளனர் அமெரிக்க ஆணவக்காரர்கள்.


மும்பையில் வந்திறங்கும் ஒபாமாவை மகராட்டிர முதல்வரும்,துணை முதல்வரும் வரவேற்பதென ஏற்பாடாகியிருந்தது.அமெரிக்க பாதுகாப்பு அலுவலர்கள் அவர்கள் இருவரும் ஒபாமாவை வரவேற்க வேண்டுமென்றால் அவர்களது ''வாக்காளர் அடையாள அட்டை''நிரந்தர வருமான கணக்கு எண் அட்டை''முதலான ஆதாரங்களை காட்டி அடையாளத்தை மெய்ப்பித்தால் மட்டுமே வரவேற்க அனுமதிக்க முடியும் என்று அடாவடியாக கூறியதாக இப்போது செய்திகள் வந்துள்ளன.அதிர்ச்சி அடைந்த இருவரும் இதுகுறித்து தில்லியில் உள்ள வெளியுறவு அமைச்சகத்துக்கு முறையீடு அனுப்பியுள்ளனர். அதற்கு அமைச்சகம் சொன்ன விடையை பாருங்கள்.
''இது அமெரிக்க பாதுகாப்பு அலுவலர்களின் நடைமுறை.அதில் நாங்கள் தலையிட முடியாது.''
என்ன ஒரு முதுகெலும்பற்ற போக்கு.எத்தகைய அடிமை புத்தி இது.மகராட்டிர முதல்வரும்,துணை முதல்வரும் கோடிக்கணக்கான மக்களின் பிரதிநிதியாக தங்கள் நாட்டுக்கு வரும் ஒரு வெளிநாட்டு தலைவரை வரவேற்க வருகிறார்கள். அந்த விருந்தினரின் பாதுகாப்பை உறுதி செய்யும் நிலையிலும் பொறுப்பிலும் உள்ள அம்மாநிலத்தின் ஆட்சியாளர்கள்.அவர்கள் மூலமாகவோ அவர்களின் அடையாளத்தை பயன்படுத்தியோ அந்த விருந்தினருக்கு யாதொரு தீங்கும் நேர்ந்துவிடாது.அப்படியிருந்தும் அவர்களிடம் அமெரிக்கர்கள் இப்படி நடந்து கொண்டது  நாட்டு மக்கள் அனைவரையும் அவமதிக்கும் செயலல்லவா.


அது மட்டுமல்ல இந்திய நாடாளுமன்றத்தில் உரையாற்றிய ஒபாமா இந்தியாவின் பர்மா தொடர்பான வெளிநாட்டு கொள்கையை குறை கூறினார்.(இந்தியாவின் அந்த வெளியுறவு கொள்கை சரியா தவறா என்பது தனியானதொரு விவாதப்பொருள்.) இது போல் இந்திய தலைவர் ஒருவர் அமெரிக்க நாடாளுமன்றத்தை விடுங்கள் இந்தியாவில் இருந்துகொண்டே அமெரிக்க வெளியுறவு கொள்கையின் ஏதேனும் ஒரு அம்சத்தை குறை சொல்லிவிட முடியுமா.


இப்படி அடிமைகளாக இந்திய ஆட்சியாளர்கள் இருப்பதால்தான் அமெரிக்கர்கள் நம்மை ஆட்டிப்படைக்கிறார்கள்.அணு ஆற்றல் இயக்குனர்கள் முகாமையில் அமரிக்காவின் அழுத்தத்திற்கு பணிந்து இந்தியா இரானுக்கு எதிராக      வாக்களித்ததன்மூலம்  இரான்-பாகிசுதான்-இந்தியா எரிவளி குழாய் திட்டத்தில் மண்ணள்ளி போட்டது.அதன்மூலம் தெற்காசிய பகுதியில் அமைதி நிலவுவதற்கான ஒரு நல்ல வாய்ப்பை கெடுத்தது.இப்பகுதியின் பொருளாதார முன்னேற்றத்தையும் முடிந்த அளவுக்கு கெடுத்தது.


இந்த இடத்தில் வள்ளுவன் வாக்கு ஒன்றை சொல்லி நிறைவு செய்வது பொருத்தமாக இருக்கும்.
''வெள்ளத்தனையது மலர் நீட்டம் மாந்தர்தம் 
  உள்ளத்தனையது உயர்வு''

Saturday, November 27, 2010

எது நாட்டுப்பற்று?

''நாட்டுப்பற்று''என்பதற்கான வரையறை இந்தியாவில் மட்டும் மற்ற உலக நாடுகளை போல் அல்லாமல் சற்று வேறுபட்ட முறையில் புரிந்து கொள்ளப்பட்டுள்ளது.இந்திய நாட்டின் புவியியல் வரைபடத்தை ஒரு பெண்ணுருவில் வடித்து அதனை இந்தியத்தாய் (பாரத் மாதா) என்று கொண்டாடுவதும்,அந்த தாயை ஒரு தெய்வமாக கருதி வழிபடுவதும்,தாயகமே உன்னை வணங்குகிறோம் (வந்தே மாதரம் )என்று பாட்டு பாடுவதும் நாட்டுப்பற்றின் அடையாளமாக கருதப்படுகின்றன.

விடுதலை போராட்ட காலத்திலிருந்தே நாட்டுப்பற்று என்பது இப்படித்தான் வரையறுக்கப்பட்டுள்ளது.மேலும் நாட்டுப்பண்,நாட்டுக்கொடி முதலான நாட்டு அடையாளங்களை போற்றி வணங்குவதும் நாட்டுப்பற்றாக கருதப்படுகிறது. 

(இதில் என்ன வெட்ககேடு என்றால் நாட்டுப்பண்ணாக இந்திய ஆளும் கும்பல் தேர்ந்துடுத்துள்ள ''சன கன மன அதி''பாடல் 1910-ல் அடிமை இந்தியாவை பார்வையிட வந்த ஆக்கிரமிப்பாளன் இங்கிலாந்து மன்னன் ஐந்தாம் சார்ச்சை வரவேற்று
ரவீந்திரநாத் தாகூர் எழுதியது.இதை இன்றளவும் பாடிக்கொண்டிருப்பது அடிமைத்தனத்தை நேசிப்பதாகாதா.விடுதலைக்காக பாடுபட்டு தியாகங்கள் பல புரிந்த,வெள்ளையனின் துப்பாக்கி குண்டுகளை நெஞ்சில் மாலையாக ஏந்திய,அவனது குண்டாந்தடிகளை வெறும் தலைகளால் சந்தித்த,விடுதலை போராட்டவீரர்களை இதை விட கேவலமாக அவமதிக்க முடியுமா.அந்த வகையில் இந்திய ராணுவம் அல்லாமா இக்பாலின் ''சாரே சகான்சே அச்சா இந்துசுதான் அமாரா''பாடலை அதன் நிகழ்ச்சிகளில் பாடி இசைப்பது பாராட்டுக்குரியது.)

நாட்டுப்பற்று மேற்கூறிய அம்சங்களில் இருந்து மேலும் முன்னேறி இந்திய அணி  பங்கேற்கும் பன்னாட்டு மட்டைபந்து (cricket) போட்டிகளின்போது விளையாட்டு அரங்குகளில் கூச்சலிடுவதும்,நாட்டுக்கொடியை அசைப்பதும்,இந்திய வீரர்களை பற்றி ஏதாவது ஒரு உளறலை அட்டையில் எழுதி தொலைகாட்சி படப்பிடிப்பு கருவியின் ஆட்டுவதுமாக முன்னேறியுள்ளது.

மேற்கூறிய நடவடிக்கைகளை செய்பவர்கள் அனைவரும் நாட்டுபற்றாளர்கள் என்ற மூடத்தனமான நம்பிக்கையில் மக்களை ஆழ்த்துவதில் ஆளும் வர்க்கங்கள் மிகுதியாக வெற்றியும் பெற்றுள்ளார்கள்.ஊரை அடித்து உலையில் போடும் ஊழல் புரியும் ஆட்சியாளர்கள்,வாங்குகின்ற சம்பளத்திற்கு வேலை செய்யவேண்டும் என்ற கடமை உணர்வின்றி கையூட்டு கொடுத்தால்தான் வேலை நடக்கும் என்ற நிலையை கண்ணும் கருத்துமாக பேணி வரும் அரசு ஊழியர்கள்,கோடிகணக்கில் வரி ஏய்ப்பு செய்யும் பெருமுதலாளிகள்,மக்களின் வரிப்பணத்தை விழுங்கி ஏப்பம் விடும் ஒப்பந்ததாரர்கள்,(இப்படி சொல்லிக்கொண்டே போகலாம்) என்று எப்படிப்பட்ட அயோக்கியர்கள் ஆனாலும் சரி மேற்சொன்ன ''நாட்டுப்பற்று நடவடிக்கைகளை''மேற்கொண்டால் போதும்,அவர்கள் நாட்டு பற்றாளர்கள்.என்ன ஒரு கேலிக்கூத்து,பாரீர்.உண்மையில் இவர்களை நாட்டுதுரோகிகள் என்றல்லவா வரையறுக்கவேண்டும்.

இப்படியான மூடத்தனமான நாட்டு பற்றை போதிப்பதன் மூலமாகத்தான் ஆளும் வர்க்கங்கள் தாங்கள் செய்யும் கசுமீர் மக்கள் மீது ஏவும் பாலியல் வல்லுறவு,அன்றாடம் துப்பாக்கி சூடு ,ஒடுக்குமுறை,வடகிழக்கு மாநிலங்களில் நடத்தும் தேசிய இன ஒடுக்குமுறை,ஈழப்போரில் தலையிட்டு தமிழ்மக்களை கொன்றுகுவித்தது.மைய இந்தியபகுதிகளில் வாழும் பழங்குடியினரை அவர்களது வாழ்விடங்களான காடுகளிலிருந்து துரத்துயடித்துவிட்டு கனிமவளம் மிகுந்த அப்பகுதிகளை தனியார் முதலாளிகளிடம் ஒப்படைப்பதற்காக காட்டுவேட்டை போர்,என எண்ணிறந்த அட்டூழியங்களை நாட்டுநலனுக்கானது என நியாயப்படுத்தி மக்களின் ஆதரவை திரட்டிக்கொள்கிறது.  

அப்படியானால் நாட்டுப்பற்று என்பது என்ன.நாடு என்பது வெறுமனே ஒரு நிலப்பரப்பை குறிப்பதல்ல,குருதியும் சதையுமாக அந்நிலப்பரப்பில் வாழும் மக்களையும் சேர்த்துத்தான் அது குறிக்கிறது.அந்த மக்களின் நலன் கருதிசெய்யப்படும் செயல்கள்தான் நாட்டுபற்றை குறிப்பதாக கொள்ளமுடியும்.

அரசு ஊழியர் தனது கடமைகளை முழுமையாக நிறைவேற்றுவது நாட்டுப்பற்று. மக்களின் ஊழியர்கள் நாம் என்ற உணர்வோடு பணியாற்றி அம்மக்கள் பயனுற செய்வது நாட்டுப்பற்று.கையூட்டு பெறாமல் வாங்கும் ஊதியத்திற்கு வேலை செய்வது நாட்டுப்பற்று.
வணிகர்கள் ஆயின் முறையாக வரி செலுத்தி நாட்டின் வருவாய் உயர பங்களிப்பு செய்வது நாட்டுப்பற்று.
பெரு முதலாளிகள் முறையாக அனைத்து வரிகளையும் செலுத்தி நாட்டின் தொழிலாளர் நல சட்டங்களை மதித்து அதன்படி நடந்து கொள்வது நாட்டுப்பற்று.(இவர்கள் வரி ஏய்ப்பு செய்யாமல் இருந்தாலே நாட்டின் வருவாய் பன்மடங்கு உயர்ந்துவிடும்).
பொதுமக்கள் ஆயின் பொது சொத்துக்களை சேதப்படுத்தாமல் இருப்பது நாட்டுப்பற்று.சேதப்படுத்துவோரை தடுப்பது நாட்டுப்பற்று.விபத்தில் சிக்குவோரை காப்பாற்றுவது நாட்டுப்பற்று.விபத்தில் அடிபட்டு கிடப்போரின் உடமைகளை திருட முயல்வோரிடமிருந்து அப்பொருட்களை காப்பாற்றி உரியவர்களிடம் சேர்ப்பது நாட்டுப்பற்று. 
ஆட்சியாளர்கள் வல்லரசு கனவில் ஆயுதங்கள் வாங்கி குவிப்பதையும்.ஊழல் செய்து பொறுக்கி தின்பதையும் விடுத்து வரிப்பணம் முழுவதையும் மக்கள் நலனுக்காக செலவிடுவது நாட்டுப்பற்று.தனி வானூர்தி பயணம்,மக்கள் வரிப்பணத்தில் ஐந்து விண்மீன் தரத்தில் சொகுசு வாழ்க்கை என வீண் ஆடம்பரங்களை தவிர்ப்பது நாட்டுப்பற்று.
ஆட்சியாளர்கள் சுற்றுபயணம் மேற்கொள்ளும்போது அரைமணி நேரம் தங்கும் இடத்தில் கூட பல இலக்கம் உருவாக்கள் செலவில் கழிப்பறை கட்டாமல் இருப்பது நாட்டுப்பற்று.இப்படி சொல்லிக்கொண்டே போகலாம்.

ஆக மொத்தத்தில் மக்கள் நலனுக்காக செய்யப்படும் அனைத்து செயல்களுமே நாட்டுபற்றை குறிக்கும்.மக்கள் நலனுக்கு எதிரானவை எல்லாம் நாட்டுக்கு செய்யும் துரோகங்களே ஆகும்.வீண் ஆரவாரங்களும்,போலியான பக்தி பரவசங்களும் நாட்டுப்பற்று ஆக முடியாது.

  

Wednesday, November 24, 2010

புட்டபர்த்தி சாய்பாபா; கடவுளின் அவதாரமா.கபட வேடமிடும் செப்படி வித்தைக்காரனா.

புட்டபர்த்தி.கர்நாடக எல்லையில் அமைந்துள்ள ஆந்திராவை சேர்ந்த சிற்றூர். சீரடிசாய்பாபாவின் மறுபிறவி என்றும் கடவுளின் அவதாரம் என்றும் தன்னை கூறிக்கொள்ளும் புட்டபர்த்தி சாய்பாபாவின் ஆசிரமம் அமைந்துள்ள ஊர்.அதுதான் அவரது சொந்த ஊரும்கூட.அந்த ஊருக்கும் அதன் சுற்றுப்புறத்துக்கும் கொஞ்சமும் தொடர்பின்றி பிரமாண்டமாக அமைந்துள்ளன ஆசிரமும் அது நடத்தும் நிறுவனங்களும்.


அந்நிறுவனங்களில் ஒன்றான ''சத்ய சாய்உயர் கல்வி கழகம்''கடந்த 22 -11 -10 அன்று நடத்திய பட்டமளிப்பு விழாவில் சாய்பாபா முன்னிலையில் முதன்மர்.மன்மோகன் கைகட்டி பவ்யமாக அமர்ந்திருக்க கர்னாடக முதல்வர் எதியூரப்பா சாமியாரை மண்டியிட்டு பணிந்து வணங்குவதை கீழே உள்ள படத்தில் காணலாம்.
இவ்விழா பற்றிய செய்திக்கு; http://www.hindu.com/2010/11/23/stories/2010112361511300.htm
 சாமி,பக்கத்தில் இருக்காரே பெரியமனிதர் மன்மோகன் அவர்கிட்ட நம்ம ஊழலைப் பத்தி ரொம்ப தோண்ட வேணாம்னு கொஞ்சம் சொல்லுங்க,உங்களுக்கு புண்ணியமா போகும்.
அப்டியே குமாரசாமி வந்தா கொஞ்சம் கண்டிச்சு வைங்க.அந்தாளு சூன்யம் வைச்சதுதா இந்த பாடு படுத்துது


இப்படி நாட்டின் முதன்மரும் மாநில முதல்வர்களும் தொழுது வணங்கி செய்யும் மரியாதைக்கு தகுதியானவர்தானா சாய்பாபா என்று பார்த்தால் நிச்சயமாக இல்லை என்ற பதிலே கிடைக்கும்.
புட்டபர்த்தி சாய்பாபா கடவுளின் அவதாரம் என்று நீண்ட நெடுங்காலமாக செய்யப்பட்டு வரும் கள்ள பரப்புரைக்கு கணிசமானோர் பலியாகி உள்ளனர்.அதன் வெளிப்பாடாக பாபா எங்கு சென்றாலும் பக்தர்கள் கூட்டம் அலைமோதுகிறது.அவரது அருள் கிட்டிவிட்டால் மற்ற அனைத்தும் கிடைத்து விடும் என்ற அப்பாவித்தனமான நம்பிக்கையில் அம்மக்கள் மூழ்கி உள்ளனர்.


சாய்பாபா கடவுளின் அவதாரமாக சொல்லிக்கொண்டு செய்யும் அற்புதங்கள் அனைத்தும் தந்திர வேலைகளே என்று பகுத்திறவு இயக்கத்தினர் பலமுறை நிரூபித்து காட்டியுள்ளனர்.மேலும் சாய்பாபா ஒரு கீழ்த்தரமான பாலியல் குற்றவாளி என்பதும் ஆதாரங்களுடன் அம்பலப்படுத்தப் பட்டுள்ளது.தனது பாலியல் இச்சைகளுக்கு அவர் ஆசிரமம் நடத்தும் கல்வி நிறுவனங்களில் பயிலும் சிறுவர்களை பயன்படுத்துகிறார் என்ற குற்றச்சாட்டும் ஆதாரங்களுடன் முன்வைக்கப்பட்டுள்ளது.சாய்பாபாவின் ஆசிரமத்தில் தங்கியிருந்தவர்களே கொடூரமாக கொலை செய்யப்பட்டதும் உண்டு.


இவையெல்லாம் காழ்ப்புணர்ச்சியால் உந்தப்பட்டு யாரும் இட்டுக்கட்டியவை அல்ல.இக்குற்றச்சாட்டுகள்  பிரித்தானிய ஒலிபரப்பு நிறுவனத்தால்  (BBC) ஆதாரங்களுடன் ஒளிபரப்பப்பட்டு கோடிக்கணக்கான மக்களை சென்றடைந்துள்ளன.அவற்றை தமிழில் மொழிபெயர்த்து பெரியார் திராவிடர் கழகம் வெளியிட்டுள்ள ஒளிப்பட தொகுப்பை கீழ்காணும் சுட்டிகளில் காணலாம்.


http://www.youtube.com/watch?v=jjRaReI5b2Q&feature=related
http://www.youtube.com/watch?v=vdsYsRaNA4k&NR=1
http://www.youtube.com/watch?v=QmUn7lkGevE&NR=1
http://www.youtube.com/watch?v=iK3QlPGYiJA&feature=related
http://www.youtube.com/watch?v=RskbqOOh6Ig&NR=1
http://www.youtube.com/watch?v=M3oWmzZI_hs&NR=1

பார்த்துவிட்டீர்களா நண்பர்களே.இப்போது சொல்லுங்கள்.சாய்பாபா கடவுளின் அவதாரமா இல்லை செப்படி வித்தையால் ஊரை,அல்ல,உலகை ஏய்க்கும் கயவனா.


இது தவிர சாய்பாபா பணத்தின் மீது பேராசை கொண்டவர் என்பதும் அம்பலமாகியுள்ளது.தனது பக்தர்களை தாராளமாக ஆசிரமத்துக்கு நிதி உதவி செய்ய தூண்டும் பாபா பக்தர்கள் தங்களது சொத்துக்களை ஆசிரமத்துக்கு தானமாக அளிப்பதையும் ஊக்குவிக்கிறார்.அவ்வாறு விசயவாடாவை சேர்ந்த ஒரு மூதாட்டி அவர் இறந்தபின் அவரது வீடு பாபாவின் ஆசிரமத்துக்கு தானமாக வழங்கப்பட வேண்டும் என்று தனது 55 -வது வயதில் உயில் எழுதி வைத்த பாவத்திற்காக உயிருடன் இருக்குபோதே வீட்டை பாபாவின் ஆசிரமத்திடம்  பறி கொடுத்த பரிதாபத்தை கீழே உள்ள சுட்டியில் காணலாம். 
http://exposedsaibaba.blogspot.com/

ஆக கொலைக்கஞ்சா கொடியவர்களின் ஆசிரமத்தின் தலைவர்,தெருவோரத்தில் வித்தை காட்டி பிழைக்கும் செப்படி வித்தைக்காரனின் தந்திர வேலைகளை அற்புதங்கள் போன்று செய்துகாட்டி ஏய்க்கும் ஒரு மோசடி பேர்வழி, பேராசை கொண்ட ஒரு பணப்பேய் கடவுளின் அவதாரமாக இருக்க முடியுமா.


சாய்பாபாவை கடவுளின் அவதாரமாக நம்புவோரிடம் நாம் கேட்க விரும்பும் சில கேள்விகள்.


சாய்பாபா தங்கத்தாலான கடவுள் சிலையை (லிங்கம்) வாயிலிருந்து அல்லது வயிற்றிலிருந்து எடுக்கிறார்.அவரே படைத்த ஒரு பொருள் போல் அதை பக்தர்கள் என்ற பேரில் கூடியிருக்கும் ஆட்டு மந்தையிடம் காட்டி கை தட்டல் பெறுகிறார். காற்றில் கையை சுழற்றி தங்க சங்கிலி வரவழைக்கிறார்.வெறும் கையால் தங்க மோதிரத்தை தருவிக்கிறார்.இவையெல்லாம் உண்மையென்றால்,வெறும் காற்றிலிருந்தும் தனது வயிற்றிலிருந்தும் இவ்வளவு செல்வங்களை படைக்க வல்ல சாய்பாபா இப்படி தங்க கட்டிகளை படைத்து இந்தியாவின் உள்நாட்டு,வெளிநாட்டு கடன் அத்தனையும் அடைத்துவிடலாமே.ஏன் செய்யவில்லை.


தங்கத்தையே வரவழைக்க வல்லவர் பக்தர்களிடம்  பிச்சை எடுப்பது  ஏன். 


கொல்லர் பட்டறையில் தங்க நகை உருவாகும்.மனிதனின் வயிற்றில் என்ன உருவாகும்.சாய்பாபா வயிற்றில் தங்கம் உருவாகிறதென்றால் பெரும்  பொருட்செலவில் கோலார் தங்க வயலில் தேடுவதற்கு பதிலாக சாய்பாபாவை வைத்து வேண்டிய அளவுக்கு தங்கத்தை தேடிகொள்ளலாமே. இந்திய அரசுக்கு இந்த யோசனையை நீங்கள் ஏன் தெரிவிக்கவில்லை.


சாய்பாபா கடவுளின் அவதாரம் என்றால் 50 களில் துள்ளி திரிந்த அவர் கடந்த சிலபல ஆண்டுகளாக தள்ளாமையால் தடுமாறுவது ஏன்.


தனது தள்ளாமையையும் மூப்பையும் சமாளிக்க முடியாமல் தத்தி தத்தி நடந்து வரும் ,சமயங்களில் சக்கர நாற்காலியில் வரும் , பாபா பக்தர்களின் குறைகளை தீர்த்து விடுவார் என்பதை நம்ப முடியுமா.
எண்ணிப்பாரீர்.


நமக்கு தெரிந்த இந்த உண்மைகள் நாட்டின் முதன்மருக்கும் மாநில முதல்வர்களுக்கும் தெரியும்தானே. அப்படியிருந்தும் அவர்கள் பாபாவை பணிந்து நிற்பதேன்.இந்த கேள்விக்கு விடை தேடி எங்கும் அலைய வேண்டியதில்லை.மேற்கண்ட இந்து நாளிதழின் செய்தியிலேயே இதற்கு விடை இருக்கிறது.


அந்த பட்டமளிப்பு விழாவில் கலந்து கொண்ட பெரும்புள்ளிகளின் பட்டியல்.
1.நாட்டின் முதன்மர்.மன்மோகன்.
2.ஆந்திர முதல்வர்.
3.கர்நாடக முதல்வர்.
4.தமிழக துணை முதல்வர்.(பெரியார் இல்லாதது வசதியாக போய்விட்டது .)
5.அண்மையில் மகராட்டிர முதல்வர் பதவியை இழந்த அசோக் சவான்.
6.ஆந்திர ஆளுநர்.
7.பஞ்சாப் ஆளுநர்.
8.திரிபுரா ஆளுநர்.
9.டாட்டா நிறுவனங்களின் தலைவர் ரத்தன் டாட்டா.
10.டி.வி.எசு.நிறுவனங்களின் தலைவர் வேணு சீனிவாசன்.


இப்படி பெரும்புள்ளிகள் ஒரு பட்டமளிப்பு விழாவில் ஏன் ஒன்று கூடவேண்டும். ஓரிரு பிரபலங்கள் போதாதா.உண்மையில் ஆட்சியில் இருப்போருக்கும்,உயர் அதிகாரிகளுக்கும்,பெரும் முதலாளிகளுக்கும் இடையிலான வேலைகளை செவ்வனே முடித்து தரும் தரகு வேலையைத்தான் பெரும்பாலான சாமியார்கள் செய்து வருகிறார்கள்.அந்தவகையில் தாங்கள் வேலைகளை சாதித்து கொள்வதற்காகவே பெரும்புள்ளிகள் மடங்களையும் ஆசிரமங்களையும் தேடி வருகின்றனர்.அப்படிப்பட்ட தரகர்களின் முன்னணி வரிசையில் உள்ளவர்கள்தான் சாய்பாபாவும் அவரது அல்லக்கைகளும்.இத்தகைய விழாக்கள் அவர்கள் கூடுவதற்கான ஒரு வாய்ப்பு,ஒரு சாக்கு.


அதனால்தான் பாபா போன்றோரின் குற்றவியல்,பொருளாதார,பாலியல் குற்றங்கள் மூடி மறைக்கப்பட அரசுகள் உடந்தையாக உள்ளன.ஆசிரமத்தில் கொலையே நடந்தாலும் முதல்வர்கள் தொழுது வணங்கும் பாபா மீதோ அவரது அடிவருடிகள் மீதோ முதல் தகவல் அறிக்கை பதிவு செய்ய காவல்துறையினருக்கு துணிவு வருமா என்று எண்ணிப்பாருங்கள்.


இப்படியான பின்னணியில்தான் சாய்பாபா அப்பழுக்கற்றவர் போல் நடித்து கடவுளின் அவதாரம் என்று நாடகமாட முடிகிறது.பெரும்பாலான மக்கள் விழிப்புணர்வு பெறாதவரை பாபாக்களுக்கு கொண்டாட்டம்தான்.

Sunday, November 14, 2010

காங்கிரசுடன் கூட்டணி;செயலலிதாவின் கனவு பலிக்குமா.

தனியார் தொலைக்காட்சி ஒன்றுக்கு நேர்காணல் அளித்த அ.தி.மு.க.தலைவி செயலலிதா காங்கிரசுடன் கூட்டணி அமைத்து வரவிருக்கும் 2011 தமிழக சட்டப்பேரவை தேர்தலை சந்திக்கும் தனது ஆவலை மறைமுகமாக வெளியிட்டுள்ளார்.

இரண்டாம் தலைமுறை அலைபேசி பணிக்கான அலைக்கற்றை ஒதுக்கீட்டில் 1 .76 இலட்சம் கோடி உருவாக்கள் அரசுக்கு இழப்பு ஏற்பட மைய அமைச்சர் அ.ராசா காரணமாக இருந்திருக்கிறார் என்று தலைமை கணக்கு தணிக்கையாளரின் அறிக்கை குற்றம் சாட்டியுள்ளதாக செய்திகள் கசிந்துள்ளன.இந்த நிலையில் டைம்சு நவ் என்ற ஆங்கில தொலைக்காட்சிக்கு அளித்த நேர்காணலில் மைய அமைச்சர் அ.ராசாவை அமைச்சர் பதவியிலிருந்து நீக்குமாறு முதன்மர்.மன்மோகன் சிங்கிற்கு கோரிக்கை விடுத்துள்ளார்.அப்படி ராசாவை நீக்கும்பட்சத்தில் 18 நாடாளுமன்ற உறுப்பினர்களை கொண்ட தி.மு.க.மைய அரசுக்குஅளித்து வரும் ஆதரவை விலக்கி கொண்டால் அந்த 18 உறுப்பினர் இழப்பை தான் ஈடு கட்டுவதாகவும் உறுதி அளித்துள்ளார் செயா.தனது ஆதரவுக்கு நிபந்தனை எதுவும் விதிக்க போவதில்லை என்றும் கூறியுள்ளார்.


அ.தி.மு.க.வின் மக்களவை உறுப்பினர் வலு ஒன்பதுதான்.மீதி ஒன்பது பேரின் ஆதரவை எப்படி திரட்டுவார் என்பதை அவர் தெரிவிக்கவில்லை.குதிரை பேரம்தான் அதற்கான வழியென்றால் அந்த வணிகத்தில் காங்கிரசு கும்பலும் கில்லாடிகள் என்பதை மறந்து விட்டு பேசுகிறார்,அல்லது கருணாதியின் தூக்கத்தை கெடுப்பதற்காக ,யாரந்த ஒன்பது கருப்பு ஆடுகள்.என்று தலையை பிய்த்து கொள்ளட்டும் என்ற எண்ணத்தில் இப்படி கூறியிருக்கலாம்.


இத்தகைய பெரும் ஊழலை செய்த மைய அமைச்சர் அ.ராசாவை பதவி நீக்கம் செய்வதன் மூலம் அரசியல் நேர்மை நிலை நாட்டப்பட வேண்டும் என்கிறார் செயா.ஊழல் குற்றத்திற்காக இரண்டு ஆண்டுகள் சிறைத்தண்டனை விதிக்கப்பட்டு தேர்தலில் போட்டியிட தகுதியற்ற நிலையில் இருந்தபோதும் 2001 -ல் முதல்வர் பதவி ஏற்க தயங்காத செயா.அரசியல் தூய்மை பற்றி பேசுகிறார்.அ.ராசா தார்மீக பொறுப்பேற்று தானாக பதவி விலகுவார் என எதிர்பார்க்க வேண்டாம்,அவரை பதவி நீக்கம் செய்யுங்கள் என மன்மோகனுக்கு ஆலோசனை சொல்லும் செயலலிதாதான் உச்ச நீதிமன்றம் பதவியை விட்டு போ என விரட்டியடிக்கும் வரை முதல்வர் பதவியில் ஒட்டிக்கொண்டிருந்தார்.எனவே அரசியல் தூய்மை, ஊழல் பற்றி பேசுவதெல்லாம் மேம்போக்கானது.அவரது உண்மையான நோக்கம் காங்கிரசுடன் கூட்டணி அமைப்பதுதான்.காங்கிரசு கூட்டணிதான் அவரது நோக்கம் என்பதை தமிழக சட்டமன்றத்தில் இரண்டு நாட்களுக்கு முன் நடைபெற்ற விவாதம் ஒன்று தெளிவாக்கியுள்ளது.காங்கிரசு அ.தி.மு.க.வுடனான கூட்டணிக்கு கதவை சாத்திவிட்டதாக கருணா தெரிவித்தபோது அ.தி மு.க சட்டமன்ற துணைத்தலைவர் ஒ.பன்னீர்செல்வம் கதவு எப்போது திறக்கும் என்று தங்களுக்கு தெரியும் என்று சொல்லியிருக்கிறார்.


செயலலிதா எப்படியாவது தமிழக முதல்வர் பதவியை பிடிக்கவேண்டும் என்ற வெறி கொண்ட நிலையில் இருப்பதையே அவரது பேச்சு காட்டுகிறது. இல்லையென்றால் சோனியா அந்நிய நாட்டவர்,இந்தியாவின் முதன்மராக தகுதியற்றவர் என்றெல்லாம் ஆறு ஆண்டுகளுக்கு முன் தூற்றியவர் இப்போது அதே சோனியாவின் கண்ணசைவுக்கு காத்திருக்கும் மைய அரசுக்கு ஆதரவு தந்து காங்கிரசுடன் கூட்டணி கட்ட துடிப்பாரா.


செயாவின் இன்றைய நிலையை பார்க்கும்போது நமக்கு நாவலர் நெடுஞ்செழியனின் ''அரும் பெரும் பொன்மொழி''ஒன்று நினைவுக்கு வருகிறது.தி.மு.க.வை விட்டு எம்.சி.ஆர்.ஐ இடைநீக்கம் செய்து கட்சியை விட்டு வெளியேற்றியதில் முதன்மையான பங்கு வகித்த நாவலர் பின்னாளில், பெரும்பாலான தி.மு.க.தலைவர்கள் செய்தது போன்று, தி.மு.க.வை விட்டு விலகி எம்.சி ஆரிடம் போய் சேர்ந்தார்.மற்றவர்கள் விலகியதை சாதாரணமாக எடுத்துக்கொண்ட கருணா நாவலர் விலகிய போது கடும் எதிர் வினையாற்றினார். மற்றவர்களுடன் சேர்ந்து புரூட்டசும் தன்னை கத்தியால் குத்தியபோது சீசர் ''நீயுமா புரூட்டசு''என்று கேட்டதை எடுத்துகாட்டி ''நீங்களுமா நாவலரே''என்று கேட்டு,கேட்டு அவரை தொடர்ந்து வறுத்தெடுத்து கொண்டிருந்தார்.சிறிது காலம் போன பின்னால் ஒரு செய்தியாளர் சந்திப்பில் மனம் திறநது பேசிய நாவலர் பல ஆண்டுகள் அமைச்சராக,ஆள் அம்பு.பதவி என செல்வாக்குடன் இருந்துவிட்டு பதவி இல்லாமல் தம்மை போன்றவர்களால் இருக்க முடியாது என்று சொல்லி அதற்கு ஒரு எடுத்துக்காட்டும் சொன்னார்.''சிரங்கு வந்தவன் சொரியாமல் இருக்க முடியாது''என்றார்.அப்படித்தான் முதல்வர் பதவியில் இல்லாத ஒவ்வொரு நாளும் ,ஏன்,ஒவ்வொரு வினாடியும் செயலலிதாவுக்கு சகிக்க முடியாததாக இருக்கிறது.அதனால்தான் எப்பாடு பட்டாவது முதல்வர் பதவியை பிடிக்க முனைகிறார்.


ஆனால் தற்போதைய காங்கிரசு செயாவிடம் அவ்வளவு எளிதில் ஏமாந்துவிடும் என்று சொல்வதற்கில்லை.ஒரு 13 மாத காலம் செயாவின் ஆதரவில் நடுவணில் ஆட்சி நடத்திய வாச்பாயி பட்ட சிரமங்களை நாடே பார்த்தது.இதையே பின்னாளில் வாச்பாயி மிகவும் உருக்கமாக  ''எனது வாழ்நாளில் மிகவும் துயரமான காலம் செயாவின் ஆதரவில் ஆட்சி நடத்திய காலம்தான்'' என்று மனம் நொந்து சொன்னார்.இது காங்கிரசுக்கும் தெரியும்தானே.


1999 -நாடாளுமன்ற தேர்தலில் காங்கிரசுடன் கூட்டணி கட்டி போட்டியிட்ட செயலலிதா சோனியாவுடன் ஒரே மேடையில் பேச மறுத்து அவரை அவமானப்படுத்தியதை சோனியா அவ்வளவு எளிதில் மறந்து விடுவாரா.ராசீவ் கொலைக்காக பதினெட்டு ஆண்டுகள் வஞ்சம் வைத்து காத்திருந்து ஒட்டு மொத்த ஈழ தமிழினத்தையே பழி தீர்த்த சோனியா செயாவை மறப்போம் மன்னிப்போம் என ஏற்றுகொள்வார் என சொல்ல முடியாது.


மேலும் தமிழகத்தில் பணவலு,ஆள்வலு,அச்சு ஊடகவலு,தொலைக்காட்சி ஊடக வலு,என அனைத்திலும் அ.தி.மு.க.வை விட தி.மு.க.வே முன்னணியில் உள்ளது.எனவே இருப்பதை விட்டு விட்டு பறப்பதை பிடிக்க முயல காங்கிரசு ஒன்றும் ஏமாளிகளின் கூடாரமல்ல.பெரும்பான்மை வலு இல்லாத நிலையில் காங்கிரசு ஆதரவில் ஆட்சி நடத்திக்கொண்டு  ஆட்சியில் பங்கு தராமல் கருணா அவமானப்படுத்தினாலும் மைய ஆட்சியை கருத்தில் கொண்டு சகித்துக்கொண்டு தி.மு.க. கூட்டணியில் தொடருவதையே காங்கிரசு தெரிவு செய்யும்.


பாவம் செயா.சொந்தவலுவில்.தமிழக அரசியலில் அவரை விட்டால் வேறு போக்கிடம் இல்லாத பொதுவுடைமை கட்சிகள்,வைகோ,முதலானவர்களுடன் கூட்டணி கட்டிக் கொண்டு தேர்தலை சந்திக்க வேண்டியதுதான்.


பி.கு.
இந்த கட்டுரையை எழுதிக்கொண்டிருக்கும் போது அ.ராசா மைய அமைச்சர் பதவியை விட்டு தாமாகவே முன் வந்து விலகி இருப்பதாக செய்திகள் வெளியாகியுள்ளன.நாடாளுமன்றம் சுமுகமாக நடைபெற வேண்டி ராசா விலகுவதாக தி.மு.க விளக்கம் அளித்திருந்தாலும் எதிர்கட்சிகள் கொடுத்த அழுத்தமும் கூட்டணி சித்து விளையாட்டும் இதில் முதன்மையான பங்கு வகிக்கின்றன.காங்கிரசு கதவு அ.தி.மு.க.வுக்கு திறக்க எந்த வகையிலும் வாய்ப்பு இருக்க கூடாது என்பதில் கருணாநிதி உறுதியாக உள்ளார் என்பதையே பதவி விலகல் காட்டுகிறது.  



Saturday, November 13, 2010

கோவை குழந்தைகள் கொலையும் முந்தைய கொலை நிகழ்வொன்றும்

கோவையில் இரண்டு பள்ளிகுழந்தைகள்  கடத்தி கொலை செய்யப்பட்டநிகழ்வு நாம் வாழ்நாளில் சந்தித்த மறக்க முடியாத கொடூரங்களில் ஒன்றாக உள்ளது. .இந்த குழந்தைகள் கொலைக்காக வருந்தாதவர்கள் எவரும் இருக்க முடியாது.  இந்த கொலைகள் கோவை பகுதியில் மட்டுமல்ல தமிழகம் முழுவதும் அதிர்ச்சியையும் வருத்தத்தையும் ஏற்படுத்தியுள்ளது.

70 களின் இறுதியில் நான் பள்ளிச்சிறுவனாக இருந்த போது நிகழ்ந்த இது போன்ற ஒரு நிகழ்வை இளைய தலைமுறையினர் அறிந்து கொள்ளவும் நாற்பது வயதை கடந்தவர்கள் நினைவு படுத்திக் கொள்ளவும் இங்கு பதிவு செய்கிறேன்.


அப்போது தில்லியில் இரண்டு பள்ளி மாணவிகளை பணம் பறிக்கும் நோக்கில் கடத்தி கொலை செய்து விட்டனர் பில்லா, ரங்கா என்ற இரு கயவர்கள்.கொலை நடந்து ஒரு சில மாதங்களில் கொலையாளிகளை காவல் துறையினர்  கைது செய்து விட்டனர்.அது பற்றிய வழக்கு ஊடகங்களில் பரபரப்பாக பேசப்பட்டு வந்தது. 


எங்கள் வீட்டில் நாள்தோறும் தினமணி நாளிதழ்தான் வாங்குவார்கள்.அதுதான் ''தரமான''நாளிதழ் என்பதில் எங்கள் தந்தைக்கு அசைக்கமுடியாத நம்பிக்கை. நாங்கள் 'கன்னித்தீவிற்காகவும்' எந்த எந்த திரையரங்குகளில் வசந்த மாளிகையும் நாளை நமதேவும் எத்தனாவது நாளாக வெற்றி நடை போடுகிறது என்ற வரலாற்றில் தனி இடம் பிடிக்கும் செய்திகளுக்காகவும் தினத்தந்தி வாங்க வேண்டும் என எவ்வளவுதான் போராடினாலும் எங்கள் தந்தையின் தரத்தின் மீதான பற்றுக்கு முன் நாங்கள் தோற்று போனோம்.எனவே நாள்தோறும் சற்று தொலைவில் இருந்த முடி திருத்தும் கடைக்கு சென்று தினத்தந்தி படிப்பதை வழக்கமாக கொண்டிருந்தேன்.
அந்த பழக்கம் சற்று பெரியவன் ஆனபோது அந்த கடைக்கு அருகில் இருந்த ''அறிஞர் அண்ணா படிப்பகத்துக்கு''சென்று முரசொலி படிப்பதும் அங்கு இருக்கும் பெரியவர்கள் பேசுவதை கேட்பதும் எதிர் வரிசையில் இருந்த ''சிவாசி ரசிகர் மன்றத்துக்கு''(அங்கும் செய்தியேடுகள் இருக்கும்.பெயர் நினைவில்லை) போய் அங்கு நடக்கும் உரையாடல்களை கேட்பதுமாக நீண்டது.


பில்லா,ரங்கா செய்த கொடூர கொலைகள் பற்றி இப்போது கோவை கொலைகளை தொடர்ந்து மக்களிடம் எழுந்துள்ள சினத்திற்கு எள்ளளவும் குறையாத அதிர்ச்சியும் ,சினமும் இந்தியா முழுவதும் ஏற்பட்டது. பலியான அந்த இளம் குருத்துகளுக்காக நாடே வருந்தி கண்ணீர் வடித்தது என்று கூட சொல்லலாம். மிகையாகாது. படிப்பகத்திலும்.மன்றத்திலும் இருக்கும் அண்ணன்கள் கண்ணில்  பில்லாவும் ரங்காவும் தென்பட்டார்கள் என்றால் அவர்களை அடித்தே கொன்று விடுவார்கள் என்று எனக்கு தோன்றும்.அந்த அளவுக்கு அந்த வழக்கு பற்றிய செய்திகளை படிக்கும் போதும்,படித்து முடித்த பின்னரும் கடும் சினம் தெறிக்க பேசுவார்கள்.


வழக்கு தொடர்ந்து நடைபெற்று அந்த கயவர்கள் இருவருக்கும் சாவு தண்டனை விதிக்கப்பட்டு தூக்கிலிடப்பட்டனர்.


அதன் பின் தமிழகத்தில் நடந்ததுதான் குரூரமான நகைச்சுவை. பில்லா,ரங்கா என்ற அந்த இரு கயவர்களுக்கும் கிடைத்திருந்த எதிர் மறை புகழையும் காசாக்கி கொள்ளும் கயமையில் இறங்கினர் ஆபாசத்தையே வணிக பொருளாக கொண்ட திரைத்துறை கழிசடைகள்.ரசினிகாந்த் கதாநாயகனாக நடிக்க ''பில்லா''என்றும் ''ரங்கா''என்றும் இரண்டு திரைப்படங்கள் வெளிவந்து கயவர்கள் மீது மக்களுக்கு இயல்பாக ஏற்படும் ஆத்திர உணர்வை மழுங்கடித்தன.இன்றோ                        ''பில்லா ரங்கா பாசாதான்''பிஸ்டல் பேசும் பேசாதான்''
என்று ஏதோ விடுதலை போராட்ட வீரர்களின் பெயர் போல் பில்லா,ரங்கா என்ற அயோக்கியர்களின் பெயர் பாடப்படுகிறது.


ஊடகங்கள் எந்த அளவுக்கு மக்களின் இயல்பான உணர்வுகளை கட்டுபடுத்தவும்.தாங்கள் விரும்பும் திசையில் மக்களின் உணர்வலைகளை செலுத்தவும் வல்லமை பெற்றுள்ளார்கள் என்பதை நாம் புரிந்து கொள்ளவேண்டும்.
யார் கண்டது.ஒரு சில ஆண்டுகளுக்கு பின்னால் கோவை கொலையாளி மோகன்ராசு பெயரிலும் திரைப்படம் வரக்கூடும்.
      ''மோகன ராசா,நீயே உலகின் ராசா''என்பது போன்று எவனாவது ஒரு காரியகிறுக்கன் அதற்கும் பாட்டெழுதி தரலாம்.


தமிழ்மக்கள் எச்சரிக்கையுடன் இருக்க வேண்டிய காலம் இது.மோகன்ராசு போன்ற கயவர்கள் மக்களுக்கு எந்த விதமான ஊறும் விளைவித்து விடாமலும் அத்தகைய குற்றவாளிகளை போற்றுகின்ற பண்பாட்டு சீரழிவை தமிழ் சமூகத்தில் நுழைய விடாமலும் காக்கின்ற பொறுப்பு நம் எல்லோருக்கும் உள்ளது.       

Saturday, November 6, 2010

அமெரிக்கா மனித குலத்தின் எதிரி. ஆகவே,ஒபாமாவே திரும்பி போ.

நான்கு நாள் பயணமாக அமெரிக்க குடியரசுத்தலைவர் பாரக் ஒபாமா இந்தியா வந்துள்ளார்.அவர் இரண்டு நாட்கள் மட்டும் மும்பையில் தங்குவதற்கு 1800 கோடி உருவாக்கள் அமெரிக்க அரசு செலவிடுகிறதாம்.இந்திய அரசு எவ்வளவு செலவிடப் போகிறது என்ற விவரம் இன்னும் வெளிவரவில்லை.ஒபாமாவின் வருகை  வரலாற்று சிறப்புமிக்கது,இருநாட்டு உறவில் ஒரு மைல்கல் என்று பலவாறு சிறப்பித்து கூறப்படுகிறது.


ஆக்ரமிப்பு போர் வெறியன் சார்ச் புசு தொடங்கிய ஆப்கன்,இராக் போரை தான் வெற்றி பெற்றால் முடித்து வைக்க போவது போல் பம்மாத்து காட்டி அமெரிக்க மக்களை ஏமாற்றி வாக்குகளை வாங்கி வெற்றி பெற்ற ஒபாமா பதவிக்கு வந்த பின் போரை வெறியுடன் தொடர்கிறார்.ஆப்கனுக்கு கூடுதல் படைகளை அனுப்பி வைத்துள்ள ஒபாமா இராக்கில் படைக்குறைப்பு செய்வதாக நாடகமாடி விலக்கிக்கொள்ளும் படைகளை குவைத்தில் குவித்து வருகிறார்.அதன் மூலம் மத்திய கிழக்கு நாடுகளை தொடர்ந்து அச்சுறுத்தி வருகிறார்.பேரழிவு ஆயுதங்களை குவித்து வைத்துள்ளதாக இராக் மீது பொய்க்குற்றம் சாட்டி அந்நாட்டை புசு தலைமையில் ஆக்கிரமித்து இலக்கக் கணக்கான இராக்கியர்களை கொன்று குவித்த அமெரிக்கா தற்போது ஒபாமா தலைமையில் இரான் அணு ஆயுதங்கள் அணியமாக்குவதாக குற்றம் சாட்டி போர் தொடுப்பதற்கான எத்தணிப்புகளை செய்து வருகிறது.


இவை மட்டுமல்ல,உலகெங்கும் தனக்கு அடிமைப் பணி புரிய மறுத்த அரசுத்தலைவர்களையும் அரசியல் தலைவர்களையும் தனது உளவுத்துறை மூலம் படுகொலை செய்த,உலகின் பல பகுதிகளிலும் உள்நாட்டு போரை தூண்டிவிட்டும்,நாடுகளிடையே போர்பதற்றத்தை திட்டமிட்டு உருவாக்கியும் ஆயுதங்கள் விற்று கொள்ளையடித்துக் கொண்டிருக்கும்,பல இலக்க மக்களின் உயிரை குடித்து உயிர் வாழும்  அமெரிக்க ஏகாதிபத்தியத்தின் தற்போதைய தலைவரான ஒபாமா மனித குலத்தின் எதிரிகளின் தலைவன் என்பதில் ஏதேனும் ஐயம் இருக்கமுடியுமா.


சரி.இந்த கொள்ளை கும்பல் தலைவன் ஒபாமா எதற்காக இந்தியாவுக்கு வருகிறார். இதற்கு பெரிதாக ஒன்றும் ஆராய்ச்சி செய்யவேண்டியதில்லை. அக்டோபர் 28 -ஆம் நாளைய தினகரன் நாளிதழை பார்த்தாலே போதும். அவர்களே தம் வாயால் தங்கள் நோக்கத்தை தெளிவாக சொல்லிவிட்டார்கள்.

பார்க்க;
http://www.dinakaran.com/Obama-india-visit-details.aspx?id=19034&id1=67

இதில் இந்திய பொருளாதாரத்திற்கு,அதன் வளர்ச்சிக்கு உதவும் அம்சம் ஏதேனும் இருக்கிறதா.ஆக,அமெரிக்க நிறுவனங்கள் இந்தியாவில் அமைக்கவிருக்கும் அணு உலைகளில் கதிரியக்க பேரழிவு விபத்து நிகழுமேயானால் அந்நிறுவனங்கள் அற்ப சொற்பமான இழப்பீடு கொடுத்தாலே போதும் என இந்திய ஆட்சியாளர்களை ஒப்புக்கொள்ள வைக்க அழுத்தம் கொடுப்பதற்காகவும்,இந்திய சில்லறை வணிக சந்தையில் வால்மார்ட் போன்ற பெரும் நிறுவனங்கள் நுழையவும்.அவர்களை வைத்து ஏற்கனவே இங்கு சில்லறை வணிகத்தில் ஈடுபட்டுள்ள கோடிக்கணக்கான இந்திய வணிகர்களை வியாபாரத்தை விட்டே விரட்டியடித்து விட்டு நாடு முழுவதும் கொள்ளையிடவும் வர்த்தக ஒப்பந்தங்கள் போட வரும் ஒபாமாவை வரவேற்பது நாட்டுக்கும் நாட்டு மக்களுக்கும் செய்யும் துரோகமாகும்.


எனவேதான்  ''ஒபாமாவே திரும்பி போ'' என கோருகிறோம்.



Friday, November 5, 2010

கசுமீர் இந்தியாவின் ஒருங்கிணைந்த பகுதியல்ல. சரியாக சொன்னாய் தாயே,அருந்ததி ராயே.

இந்தியாவும் வேண்டாம்,பாகிசுத்தானும் வேண்டாம்.விடுதலை பெற்ற கசுமீரே எங்களுக்கு வேண்டும் என போராடும் கசுமீரிகள்.


அண்மையில் நடைபெற்ற கருத்தரங்கு ஒன்றில் உரையாற்றிய புகழ்பெற்ற எழுத்தாளர் அருந்ததி ராய் கசுமீர் இந்தியாவின் ஒருங்கிணைந்த பகுதியாக ஒருபோதும் இருந்ததில்லை என கூறியதையடுத்து அவர் மீது பாய்ந்து குதற தாவிக் குதிக்கிறார்கள் நாட்டுபற்றாளர்கள் என்று நாட்டை ஏமாற்றிகொண்டிருக்கும் சங் பரிவார பாசிச கும்பலும்,ஆளும் காங்கிரசு கும்பலும்.

அருந்ததி ராய் மீது நாட்டு துரோக வழக்கு பதிவு செய்யப்படலாம் என முதலில் செய்திகளை கசியவிட்ட காங்கிரசு கும்பல் இப்போது பதுங்கி பின்வாங்குகிறது.(இந்திய குற்றவியல் சட்டம் 124 -அ ,பிரிவின் கீழ் வரும் நாட்டு துரோக குற்றத்திற்கு உச்சபட்சமாக வாழ்நாள் சிறைத்தண்டனை விதிக்கலாம்).விடுதலை கோரி போராடும் கசுமீர் மக்களோடு அமைதிப் பேச்சு நடத்த தூதுக்குழுவை அனுப்பிவிட்டு இந்தப்பக்கம் கசுமீர் பற்றிய ஒரு உண்மையை சொன்னதற்காக அருந்ததி ராய் மீது வழக்கு போட்டால் தனது அமைதிப்பேச்சு நாடகம் அம்பலமாகிவிடும் என்பதால் அடக்கி வாசிக்கிறது காங்கிரசு.

பாசிச சங் பரிவாரோ தட்டிக் கேட்க ஆளில்லை என்றால் அண்ணன் சண்டப்பிரசண்டன்தான் என்ற பழமொழிகேற்ப தொடை தட்டி தாவிக் குதிக்கிறது. அருந்ததி ராய் மீது கடும் நடவடிக்கை எடுக்க வேண்டும் என மைய அரசை நெருக்குகிறது.ஓவியர் உசேனை நாட்டை விட்டு விரட்டியடித்தது போல் அருந்ததி ராயையும் விரட்டியடிப்போம் என வெறியுடன் உறுமுகிறது பச்ரங் தள்.ப.ச.க.வின் மகளிர் அணியினர் முன்னறிவிப்போ,காவல் துறையின் அனுமதியோ இன்றி அருந்ததி ராயின் வீட்டின் முன் ஆர்ப்பாட்டம் என்ற பெயரில் கூடி அவர் மீது வசைமாரி பொழிந்ததோடு அவரது வீட்டின் மீதும் தாக்குதல் நடத்தியுள்ளனர்.


தாக்குதலுக்கு உள்ளான அருந்ததி ராயின் வீடு.

வாழ்நாள் தண்டனை விதிக்கும் அளவுக்கு,நாட்டை விட்டே விரட்டியடிக்கும் அளவுக்கு, கசுமீர் இந்தியாவின் ஒருங்கிணைந்த பகுதியல்ல என்று சொல்வது நாட்டுக்கு துரோகம் செய்வதாகுமா.
இந்த கேள்விக்கு விடை காண்பதற்கு நாம் காசுமீரின் வரலாற்றை சற்றே புரட்டிப் பார்க்க வேண்டியிருக்கிறது.

காசுமீரின் அண்மைய வரலாற்றை அறிய,
பார்க்க;

1846 -ம் ஆண்டு பிரித்தானிய இந்தியாவின் ஆட்சியாளர்கள் ஆங்கிலேயருக்கும் சம்மு பகுதியின் மன்னர் ராசா குலாப் சிங்குக்கும் ஏற்பட்ட அமிர்தசரசு ஒப்பந்தப்படி கசுமீரை அதன் மக்களோடு சேர்த்து ஆங்கிலேயர்கள் அந்த மன்னருக்கு விற்றனர்.(கசுமீர் என்ன கடைச்சரக்கா அல்லது ஆங்கிலேயனின் அப்பன் வீட்டு சொத்தா விற்பதற்கும் வாங்குவதற்கும்.கசுமீர் மக்கள் என்ன ஆடு மாடுகளா அடைத்து வைத்த பட்டியோடு சேர்த்து விற்பதற்கு)ஆகவே டோங்கிரியா பரம்பரை காசுமீரின் ஆட்சி உரிமையை பெற்றதே மோசடியானது.

டோங்கிரியா மன்னர்கள் கசுமீரில் கொடுங்கோல் ஆட்சியே நடத்தி வந்தனர்.மக்கள் தொகையில் பெரும்பான்மையாக இருந்த கசுமீர் முசுலிம்கள் அரசுப்பணி,காவல்துறை,ராணுவம் என்று எதிலுமே இடம் பெற விடாமல் வகுப்புவாத வெறி கொண்டு ஆட்சி நடத்தினர்.அவர்களது ஆட்சியின் கீழ் பசு மாட்டை தோலுக்காகவோ,இறைச்சிக்காகவோ அறுப்பது சாவுத்தண்டனைக்குரிய குற்றமாக இருந்தது.ஒரு மனித உயிரும் ஒரு மாட்டின் உயிரும் ஒன்றா என யாரும் கேள்வி கேட்க முடியாது.(2002 -ல் அரியானா மாநிலம் லச்சார் நகரத்தில் ஒரு பசு மாட்டின் தோலை உரித்ததற்காக ஐந்து தலித் இளைஞர்கள் (காந்தியாரின் கடவுளின் குழந்தைகள் தத்துவப்படி அவர்களும் இந்துக்கள்தான்) சங் பரிவார் காலிகளால் காவல்நிலையம் எதிரிலேயே அடித்தே கொல்லப்பட்ட நிகழ்வு உங்களுக்கு நினைவுக்கு வரலாம்.அந்த காலிகளுக்கும் டோங்கிரியா மன்னர்களுக்கும் ஏதேனும் வேறுபாடு இருக்க முடியுமா.
டோங்கிரியா மன்னர்களின் கொடுங்கோன்மைக்கு எதிராக கசுமீர் மக்கள் போராடி வந்த நிலையில் 1947 ஆட்சி மாற்றம் நிகழ்கிறது. 

ஆட்சி மாற்றம் தவிர்க்கவியலாமல் இந்தியா,பாகிசுதான் என்ற இரண்டு தனிநாடுகளை கொண்டுவந்தது.முசுலிம்கள் கூடுதலாக வாழும் பகுதிகள் பாகிசுதான் என்ற நாடாகவும் ஏனைய பகுதிகள் இந்தியா என்ற நாடாகவும் உருப்பெற்றன.அப்போது இந்திய துணைக்கண்ட நிலப்பரப்பில் 500-க்கும் மேற்பட்ட மன்னராட்சி பகுதிகள் இருந்தன.அவை இந்தியாவுடனோ அல்லது பாகிசுதானுடனோ இணைந்து கொள்ளலாம் என அறிவிக்கப்பட்டது.ஆட்சியாளர்கள் விருப்பமே முதன்மையான பங்கு வகித்தாலும் புவியியல் காரணங்களும் மக்களின் விருப்பமும் தவிர்க்க முடியாத பங்காற்றின.அவ்வாறே முசுலிம்கள் பெரும்பான்மை கொண்ட மன்னராட்சி பகுதிகள் பாகிசுதானோடு இணைந்தன.இந்துக்கள் பெரும்பான்மை கொண்ட மன்னராட்சி பகுதிகள் இந்தியாவோடும் இணைந்தன.மன்னரின் விருப்பமும் மக்களின் விருப்பமும் முரண்படுமாயின் மக்களிடம் பொது வாக்கெடுப்பு நடத்தி எந்த நாட்டுடன் இணைவது என்று முடிவு செய்து கொள்ளலாம் என அறிவிக்கப்பட்டது.அதை இந்தியாவும் பாகிசுத்தானும் ஏற்றுகொண்டன. 

அப்போது கசுமீர் டோங்கிரியா பரம்பரையின் கடைசி மன்னர் மகாராசா அரிசிங்கின் ஆட்சியின் கீழ் இருந்தது.கசுமீர் முசுலிம்கள் பெருவாரியாக வாழும் பகுதி என்பதால் தன்னோடு இணைய வேண்டும் என்று பாகிசுதான் வலியுறுத்தி வந்தது. பெரும்பான்மையான கசுமீர் மக்கள் கசுமீர் மன்னராட்சியிலிருந்து விடுபட்டு தனி நாடாக இருக்க வேண்டும் என வலியுறுத்தி வந்தனர் .  ஆட்சியிலிருந்த இந்து மன்னரான அரிசிங் எந்த நாட்டுடனும் இணையாமல் காலம் கடத்தி வந்தார். இந்தியா கசுமீர் தன்னோடு இணைய வேண்டுமென உள்ளூர விரும்பியது.அதற்கான திரைமறைவு வேலைகளையும் செய்து வந்தது.இந்த நிலையை பயன்படுத்திக் கொண்டு அரிசிங் தொடர்ந்து ஆட்சியில் ஒட்டிக்கொண்டு இருப்பதற்கான எத்தணிப்புகளை செய்து வந்தார்.

இந்த நிலையில் பாகிசுதான் தனது வடமேற்கு பகுதியில் வாழும் பழங்குடியினருக்கு ஆயுதங்கள் அளித்து கசுமீரை ஆக்ரமிக்க ஏவிவிட்டது.அவர்களோடு பாகிசுதான் ராணுவத்தினரும் ஆக்கிரமிப்பு போரில் ஈடுபடுத்தப்பட்டனர்.வலு குறைந்த படையே  கொண்டிருந்த அரிசிங் ஆக்கிரமிப்பு படைகளை எதிர்கொள்ள முடியாமல் இந்தியாவிடம்  ராணுவ உதவி கோரினார்.அரிசிங்கின் இக்கட்டான நிலையை பயன்படுத்திக் கொண்ட இந்தியா அவர் இந்தியாவுடன் கசுமீரை இணைப்பதாக ஒப்பந்தம் போட்டால் மட்டுமே படைகளை அனுப்பமுடியும் என்று அழுத்தம் கொடுத்தது.வேறு வழி ஏதுமின்றி அரிசிங் இணைப்பு ஒப்பந்தத்தில் 26 -10-1947-ல் கையெழுத்திட்டார்.இந்தியப்படைகள் கசுமீரில் போய் இறங்கின.முதல் இந்தியா-பாகிசுதான் போர் வெடித்தது. 

இப்படித்தான் கசுமீர் இந்தியாவுடன் இணைந்தது.தெற்காசியாவின் புற்று நோயான கசுமீர் பிரச்னை வேர்விட்டது.

போர் தொடர்ந்து நடந்து கொண்டிருந்த நிலையில் போரை நிறுத்தி கசுமீர் பிரச்னையை தீர்க்க உதவுமாறு இந்தியா 01 -01 -1948  அன்று ஐக்கிய நாடுகள் அவையில் முறையிட்டது. ஐ.நா.வின் சமாதான முயற்சியின் பலனாக 01 -01 -1949 அன்று போர் நிறுத்தம் ஏற்பட்டது.ஐ.நா.வின் சமாதான ஏற்பாடு பின்வரும் அம்சங்களை கொண்டிருந்தது.

1. கசுமீர் மக்களுக்கு தன்னிலை தேர்வுரிமை (Right to self -determination) உண்டு.

2. போரை நிறுத்திக்கொண்டு இந்தியாவும் பாகிசுதானும் கசுமீரிலிருந்து படைகளை   விலக்கிக் கொள்ளவேண்டும்.

3.போரை நிறுத்தும்போது இந்திய,பாக்.படைகள் நிலைகொண்டிருந்த பகுதிகள் அந்தந்த நாடுகளின் கட்டுப்பாட்டில் இருக்கும்.

4.படைகள் விலக்கப்பட்டு அமைதி திரும்பியபின் கசுமீர் மக்களிடம் பொது வாக்கெடுப்பு நடத்தப்பட்டு அவர்களது விருப்பத்தின் அடிப்படையில் கசுமீர் இந்தியாவுடன் இணைவதா,பாகிசுதானுடன் இணைவதா,இந்த இரண்டுமின்றி கசுமீர் ஒரு தனிநாடாக இருப்பதா என்பது தீர்மானிக்கப் படவேண்டும்.

இந்த அம்சங்கள் அனைத்தையும் இந்தியாவும் பாகிசுதானும் ஏற்று கொண்டு போர் நிறுத்தம் அமுலுக்கு வந்தது.ஆனால் இன்று வரை இந்தியாவும் பாக்-கும் வாக்குறுதி எதையும் நிறைவேற்றாமல் கசுமீர் மக்களுக்கு துரோகம் செய்து கசுமீரை தங்கள் ஆக்கிரமிப்பின் கீழ் வைத்திருக்க தகிடுதத்தங்களை செய்து வருகின்றன.

பாக்.தனது கட்டுப்பாட்டில் உள்ள கசுமீர் பகுதியை ''ஆசாத் கசுமீர்''(விடுதலை பெற்ற கசுமீர்)என அறிவித்துள்ளது.பாக்.ன் அரசியல் சட்டப்படி கசுமீர் அதன் மாநிலங்களில் ஒன்றல்ல என்றாலும் தனது படைகளை விலக்கிக்கொள்ளாமல் ஆக்கிரமிப்பை தொடர்கிறது.அதன் மூலம் பொது வாக்கெடுப்புக்கு தடையாக இருக்கிறது.

போர் முடிவுற்றபின் சிறிது காலம் வாக்கெடுப்புக்கு அணியமாக இருப்பது போலும் வாக்கெடுப்புக்கு ஏற்பாடு செய்யபோவது போலும் பம்மாத்து காட்டிவந்த இந்தியா நாளடைவில் கசுமீரை தன்னுடன் வைத்திருப்பதற்கான மோசடிகளை செய்யத்துவங்கியது.தனது அரசியல் சட்டம் 370-வது பிரிவின் மூலம் காசுமீருக்கு சிறப்பு நிலை வழங்கியுள்ளது.அதன்படி 

1.கசுமீர் தனியொரு நாடு போன்று தனித்த அரசியல் அமைப்பு சட்டம் ஒன்றை கொண்டு இயங்கும்.

2.அந்த அரசியல் அமைப்பு சட்டத்தை இயற்ற அரசியல் அமைப்பு அவை தேர்ந்தெடுக்கப்படும்.

3.காசுமீரின் ஆட்சித் தலைவர் முதன்மர்(premier) என்றே அழைக்கப்படுவார்.

4.கசுமீர் தனித்த அரசியல் சட்டம் கொண்டது என்பதால் அது பிற இந்திய மாநிலங்களை போன்றதல்ல.எனவே கசுமீரில் அந்நாட்டை சேராத இந்தியர்கள் யாரும் சொத்து வாங்க முடியாது.

5.வெளியுறவு,பாதுகாப்பு.நாணயம் ஆகிய துறைகள் இந்திய அரசு வசம் இருக்கும்.நாட்டு நிர்வாகம்,நீதி பரிபாலனம் என அரசு நிர்வாகம் முழுவதும் கசுமீர் அரசு வசம் இருக்கும்.

பொது வாக்கெடுப்பு உள்ளிட்டு அனைத்து வாக்குறுதிகளையும் (பிற மாநிலத்தவர்கள் சொத்து வாங்க முடியாது என்பதை தவிர) இந்தியா காற்றில் பறக்க விட்டு விட்டது. இந்தியா கசுமீரில் துப்பாக்கியின் நிழலில் நடத்தும் தேர்தல்களை பொது வாக்கெடுப்புக்கு இணையானது என மாய்மாலம் செய்து வருகிறது.கசுமீருக்கான தனித்த அரசியல் சட்டம் வகுக்கப்படவில்லை.அதற்கான அவையும் அமைக்கப்படவில்லை.1953- ல் இந்திய அரசு உச்ச நீதிமன்றத்தின் ஆளுகை எல்லைக்குள்  (jurisdiction limit)கசுமீரும் அடங்கும் என அறிவித்ததின் மூலம் இந்தியாவின் மாநிலங்களில் ஒன்றுதான் கசுமீர் என மறைமுகமாக அறிவித்தது.இந்த துரோகங்களின் தொடர்ச்சியாகத்தான் 1957-முதல் கசுமீர் இந்தியாவின் ஒருங்கிணைந்த பகுதி என இந்திய ஆட்சியாளர்கள் வெளிப்படையாகவும் அடாவடியாகவும் கூறுகின்றனர்.

இவற்றையெல்லாம் எண்ணிப்பார்க்கின்ற நியாய உள்ளம் கொண்ட எவரும் அருந்ததி ராயின் கூற்றை ஏற்கவே செய்வர்.அது மட்டுமல்ல கசுமீர் மக்களின் தன்னிலை தேர்வுரிமைக்கு குரல் கொடுக்க வேண்டிய கடமை மக்கள்நாயகத்தில் நம்பிக்கை கொண்ட அனைவருக்கும் உள்ளது என்பதை  உணர்ந்து வினையாற்றிய அருந்ததி ராயை வாழ்த்தவே செய்வர்.அந்த வகையில் அருந்ததி ராயின் கருத்தில் தவறேதுமில்லை என துணிவுடன் கருத்துரைத்த விடுதலை சிறுத்தைகள் கட்சித்தலைவர் திருமாவளவனை பாராட்டுகிறோம்.

''புறநானூற்று தாய்மார்களின் வரிசையில் வைத்து போற்றத்தக்க வீரத்தாயே,அருந்ததி ராயே உன்னை வாழ்த்துகிறோம்''    


Sunday, October 24, 2010

இல.கணேசனுக்கு மறுப்பு.



கடந்த 23 -09 -10 .அன்று தினமணி நாளிதழில் தமிழக பா.ச.க.வின் முதன்மை தலைவர்களுள் ஒருவரான இல.கணேசன் அயோத்தி பாபர் மசூதி பிரச்னை குறித்து எழுதியுள்ள பொய்யும் புனை சுருட்டும் நிரம்பிய கட்டுரைக்கு நமது மறுப்பு.

தினமணியில் வெளியான கட்டுரையை முதலில் பார்க்கலாம்.

பாபர் மசூதி இடிப்பதற்கு முன்னால் - உள்புறத் தூண்கள்
நான் ஒரு பாரதிய ஜனதா கட்சிக்காரன். அடிப்படையில் ஆர்.எஸ்.எஸ்.காரன். இந்த பா.ஜ.க. என்றால் என்ன, ஆர்.எஸ்.எஸ். என்றால் என்ன என்பதை எத்தனை முஸ்லிம்கள் அறிந்திருப்பார்கள்? அவர்கள் நிச்சயமாகத் தவறாக இந்த இரு அமைப்புகள் குறித்தும் தெரிந்துவைத்திருப்பார்கள். ஆர்.எஸ்.எஸ். என்றால் என்ன என்பதை ஒரு ஆர்.எஸ்.எஸ்.காரன் வாயால் கேட்டவர்கள், பா.ஜ.க. என்றால் என்ன என்பதை ஒரு பா.ஜ.க.காரனிடமிருந்து கேட்டவர்கள் இஸ்லாமிய சமுதாயத்தில் மிகச் சிலரே.
குறிப்பாக பாரத நாட்டு இஸ்லாமியன் குறித்து ஆர்.எஸ்.எஸ். மற்றும் பா.ஜ.க. என்ன  கருதுகிறது? இஸ்லாம் என்ற மதம் வெளிநாட்டில் தோன்றிய மதம் என்பது உண்மை. இஸ்லாம் வெளிநாட்டில் தோன்றி நம் நாட்டுக்கு வந்தது.
ஆனால், இந்த நாட்டு இஸ்லாமியர்கள் வெளிநாட்டிலிருந்து வந்தவர்கள் அல்ல. விதிவிலக்கான ஒரு சிலரைத் தவிர மற்றவர்கள் இந்த நாட்டின் ஆதிமக்கள். அவர்களது பாரம்பரியமும் எனது பாரம்பரியமும் ஒன்று. பண்பாடு ஒன்று. உடலில் ஓடக்கூடிய ரத்தம் ஒன்று. நாம் அனைவரும் இந்தியர்கள்.
ஆங்கிலேயன் நம்நாட்டை ஆண்டபோது, அவனை எதிர்த்து ஹிந்துக்களும் முஸ்லிம்களும் ஒன்றுபட்டே போரிட்டனர். இந்த ஒற்றுமை ஆபத்து என ஆங்கிலேயன் கருதினான்.
அயோத்தி நகரில் ஹிந்துக்களும் முஸ்லிம்களும் ஒன்றுபட்டு ஆங்கிலேயனை எதிர்த்தனர். இந்த அயோத்திப் பிரச்னை இந்து-முஸ்லிம் ஒற்றுமைக்குப் பாதகமாக இருப்பதாக மக்கள் கருதினார்கள்.
இஸ்லாமிய சமுதாய மக்கள் கூடிப் பேசினார்கள். பிரச்னைக்குரிய இடத்தில் தொழுகை நடைபெற்றதேயில்லை. இந்துக்கள் அதை ராமஜென்ம பூமியாகக் கருதி வழிபடுகிறார்கள். எனவே, அந்தப் பகுதியின் மீது எங்களுக்கு உரிமை கோரவில்லை என இந்துத் தலைவரிடம் எழுதித் தந்து சமாதானம் ஆனார்கள். இருதரப்பிலும் மகிழ்ச்சி. ஆனால், விஷயம் அறிந்த ஆங்கிலேய அதிகாரிகள் ஓடிவந்தார்கள். இந்த ஒற்றுமை தங்களுக்கு ஆபத்து என உணர்ந்தார்கள். உடன்படிக்கையை வாங்கி, கிழித்தெறிந்தார்கள். உடன்படிக்கை செய்துகொண்ட இந்துப் பிரதிநிதியையும் முஸ்லிம் பிரதிநிதியையும் பகிரங்கமாக, மக்கள் முன்பு, மரத்தில் தூக்கிலிட்டார்கள்.
  டிசம்பர் 6, 1992-க்கு முன்பு நான் அந்த ஆலயத்துக்குச் சென்றிருக்கிறேன். வெளியில் இருந்து பார்த்தால் மசூதிபோன்ற தோற்றம். உள்ளே போனால் கோயில். தரையிலிருந்து சுற்றிலும் ஐந்தடி உயரத்தில் உள்ள சுவர்களில் எல்லாம் நமது கோயில்களில் காணப்படும் சிற்பங்கள். யாழி, பாவை விளக்கு, தசாவதாரச் சிற்பங்கள் போன்றவைகளோடு பூவேலைப்பாடுகள். அண்ணாந்து மேலே பார்த்தால் தஞ்சாவூர் தொளைகால் மண்டபம் (சரியான பெயர் என்ன என்று தெரியாது. இப்படித்தான் அழைத்து வருகிறோம்) உள்ளே இருப்பதுபோல் அமைப்பு. இதுதான் இடிபட்டது.
அது ராமஜென்ம பூமி. அந்தப் பகுதி காவல் நிலையத்துக்கு பெயர் ஜன்ம ஸ்தான் போலீஸ் ஸ்டேஷன். ஜன்ம ஸ்தான் தபால் ஆபீஸ். முஸ்லிம் சமுதாயத்தின் இரு பிரிவுக்கிடையே அந்த மசூதியின் உரிமைமீது வழக்கு வந்தபோது, அங்கிருந்த மசூதிக் கட்டடத்தை அவர்களே ஜன்ம ஸ்தான் மஸ்ஜித் என்றுதான் குறிப்பிட்டுள்ளார்கள்.
ஒருநாளும் தொழுகை நடக்காத அந்த இடம் மசூதி அல்ல; மசூதிக்கான கட்டட அமைப்பு இல்லை. எந்த இடத்தில் மசூதி அமையக்கூடாது என அவர்களது நூல்கள் சொல்கின்றனவோ அந்த எல்லா எதிர்மறை அம்சங்களும் இந்த இடத்துக்குப் பொருந்தும்.
சிலர் இது பாபரது கல்லறை எனத் தவறாக நினைத்துக் கொண்டிருக்கிறார்கள். பாபர் கட்டியதால் பாபர் மசூதி. ஹிந்து ஆலயத்தை இடித்து கட்டியதா அல்லது காலி மனையில் கட்டப்பட்டதா என்பது வழக்கு. 1950-லிருந்து நடைபெறும் வழக்கு, நாளை தீர்ப்பை எதிர்பார்த்து நிற்கிறது. இனி எவரும் பாபர் மசூதி கட்ட முடியாது. மன்மோகன் சிங் கட்டினால் அது மன்மோகன் மசூதி என்றே அழைக்கப்படும்.
பாபர் யார்? அவர் இந்தியரல்ல, அந்நியர். படையெடுத்து ஆக்கிரமிக்க வந்த அந்நியர். இரண்டாவது முறை அவர் தொடுத்த போரில் அவருக்கு வெற்றி கிடைத்தது. அந்த வெற்றியைக் கொண்டாட அவர் அமைத்த வெற்றிச் சின்னம்தான் ராமர் கோயிலை இடித்துக் கட்ட முயற்சித்த மசூதிக் கட்டடம்.
அன்னியனுக்கு வெற்றிச் சின்னம் என்றால் அடிமைப்பட்டவனுக்கு அடிமைச் சின்னம். ஆக்கிரமிப்பு அகன்ற உடனேயே மீண்டும் அடிமைச் சின்னத்தை மாற்றி அமைத்திருக்க வேண்டும்.
பாபர் எங்கள் மதத்தவன், அதனால் அந்தச் சின்னம் அடிமைச் சின்னமானாலும் அது போற்றுதலுக்குரியது எனக் கருதுவது தேசபக்தியின் வெளிப்பாடாக ஆகாது.
நாளையே பாகிஸ்தான் நம் நாட்டின் மீது படையெடுத்தால், பாகிஸ்தான் அதிபரும், மக்களும் எங்கள் மதத்தைத் சார்ந்தவர்கள். அதனால், அவர்களை வரவேற்போம் என்று எந்த இந்திய இஸ்லாமியரும் நினைக்க மாட்டார்கள். அப்படி நினைத்தால், அது நியாயமானது என எந்த மதச்சார்பற்றவாதிகளும் கருதமாட்டார்கள். அதுபோலத்தானே இதுவும்.
ராஜாஜி முதலமைச்சராக இருந்தபோது, மவுண்ட் ரோட்டில் இருந்த சில ஆங்கில மன்னர்களது சிலைகளை இரவோடு இரவாக நீக்கி, அருங்காட்சியகத்தில் வைத்தார் - அவை அடிமைச் சின்னம் என்பதால் அப்போது எந்தக் கிறிஸ்தவரும் எதிர்க்கவில்லை.
சோமநாதபுரம் ஆலயம் கொள்ளையடிக்கப்பட்டது வரலாறு. இடித்து மசூதியாக மாற்றப்பட்டது. நாடு விடுதலை பெற்ற பிறகு சர்தார் வல்லபாய் படேல் சபதம் ஏற்று, அந்த மசூதியை அகற்றி, மீண்டும் பிரம்மாண்டமாக சோமநாதபுரம் ஆலயத்தை காந்திஜியின் ஆசியோடு எழுப்பினாரே! அதுபோலத்தானே இதுவும்.
மதம் வேறு வேறாக இருக்கலாம். ஆனால், அது எல்லை மீறியதாக இருக்கக்கூடாது. தேசம்தான் முக்கியம். நாம் எந்த மதத்தைச் சார்ந்தவராய் இருந்தாலும், நமக்கு முதன்மையாகத் தேவைப்படுவது தேசபக்தி.
நீண்ட காலமாகவே நான் பகிர்ந்து கொள்ள விரும்பிய கருத்துகள் இவை. அயோத்தி பிரச்னை தொடர்பாக உள்ள ஒரு வழக்கில் நாளை தீர்ப்பு வெளிவர இருக்கும் இந்த நேரத்தில், எனக்குள் எழுந்த உரத்த சிந்தனையின் வெளிப்பாடுதான் இந்தக் கட்டுரை. என்னைப் பொறுத்தவரை அயோத்திப் பிரச்னையை மதத்தின் அடிப்படையில் அணுகாமல் இந்தியன் என்கிற அடிப்படையில் நாம் அணுகுவதுதான் சரியாக இருக்கும் என்று கருதுகிறேன்.
நமது மறுப்பு.

இல கணேசன்
 ஆர்.எசு.எசு.க்கும் பா.ச.க வுக்கும் ஏதோ மாபெரும் வேறுபாடு உள்ளது போல் காட்ட முயல்கிறீர்கள். காமராசரின் ( நினைவு வருகிறதா? உங்கள் சன சங்கத்தின் கொலைவெறி தாக்குதலுக்கு உள்ளான அதே காமராசர்தான் ) சொற்களில் சொல்வதானால் இரண்டும் ஒரே குட்டையில் ஊறிய மட்டைகள்தான்.
     பார்ப்பணிய ஆதிக்கத்தை  பாதுகாக்கவும் பனியாக்களின் சுரண்டல் நலன்களுக்காகவும் மராட்டிய சித் பவன பார்ப்பனர்களால் நடத்தப்படும் ஆர்.எசு.எசு. எனும் மதவெறி அமைப்பின் பல்வேறு கிளைகளில் ஒன்றுதான்     பா.ச. க.  ஒரு தொலைகாட்சி விவாதத்தின் போது பா.ச.க -ஆர் எசு. எசு. உறவை காந்தியார் -காங்கிரசு உறவுடன் ஒப்பிட்டு நீங்களே ஒரு முறை கருத்து தெரிவித்தீர்கள். அவ்வளவு ஏன் ஆர் எசு. எசு. விருப்பம் இல்லாமல் பா.ச.க வில் யாரும் பதவிக்கு வரமுடியாது. பதவியில் நீடிக்கவும் முடியாது. எடுத்துக்காட்டு :- சின்னாவை மதச்சார்பற்றவர் என்று கூறியதற்காக அத்வானி ஆர் எசு.எசு.வின் சினத்திற்கு ஆளாகி பா.ச.க தலைவர் பதவியை இழக்க வேண்டியிருந்தது. ஆகவே இரண்டும் வேறு வேறானவை என்று காதில் பூச்சுற்ற வேண்டாம்.
     அடுத்து முசுலிம்களும், நீங்களும் ஒரே " பண்பாடு" கொண்டவர்கள் என கதைக்கிறீர்கள். எப்படி! பிறப்பால் உயர்வு தாழ்வு கற்பிக்கும் இந்து மதத்திலிருந்து வெளியேறி பிறப்பால் சகோதரர்கள் என கூறும் இசுலாமிய மதத்தை பின்பற்றுபவர்களும், நீங்களும் எப்படி ஒரே பண்பாடு உடையவர்கள் என்கிறீர்கள்.
     முசுலிம்களின் உணவு பழக்க வழக்கங்கள் வேறு உங்களின் உணவு பழக்க வழக்கங்கள் வேறு. அவர்களது பெருநாட்கள் வேறு. உங்களது பண்டிகைகள் வேறு. இப்படி ஏராளமாக சொல்லிக்கொண்டே போகலாம். உண்மை இப்படியிருக்க ஒரே பண்பாடு என்ற பசப்பல் ஏன். அவ்வளவு ஏன், இந்து மத சகோதரர்களிலேயே வேறுபட்ட கலாசாரங்கள் பின்பற்றபடுகின்றன. இந்து மக்களில் சில சாதியினர் கைம்பெண் மறுமணத்தை அனுமதிக்கிறார்கள். உங்களை போன்ற மேல் சாதியினர் கைம்பெண் திருமணத்தை  ஏற்பதில்லை. பிறகு ஒரே பண்பாடு என்ற பசப்பல்கள் ஏன்.
     அடுத்து பாபர் அந்நிய நாட்டிலிருந்து வந்த படைஎடுப்பாளன் என்று சொல்லியிருக்கிறீர்கள். யார் இல்லை என்று சொன்னது. அந்த காலகட்டத்தில் மன்னர்களுக்கு பிற நாடுகளை கைப்பற்றி தனது ஆட்சி பகுதிகளை விரிவுபடுத்துவது என்பது வழக்கமாக இருந்து வந்தது.அந்த வகையில் பாபர் படையெடுத்து வந்து இந்தியாவின் வட பகுதியை கைப்பற்றி ஆட்சி நடத்தினார். ஆனால் முகலாயர்களும், பிற முஸ்லிம் மன்னர்களும் இந்த நாட்டையே சொந்த நாடாக வரித்துக் கொண்டு இங்கேயே தங்கிவிட்டவர்கள். ஆங்கிலேயன் நாம் நாட்டை ஆண்டபோது நம்மை சுரண்டி கொள்ளையிட்டு அவன் நாட்டை வளப்படுத்தியது போன்ற அயோக்கியத்தனத்தை அவர்கள் செய்யவில்லை. காரணம் இந்த நாட்டை அவர்கள் தாய்நாடாக வரித்துக் கொண்டதுதான். சொந்த வீட்டில் கொள்ளையிட வேண்டிய அவசியம் அவர்களுக்கு இருக்கவில்லை.

      மற்றபடி இங்கு வாழும் முசுலிம்கள்  வேற்று நாட்டிலிருந்து வந்தவர்களல்லர்.சாதிய ஒடுக்குமுறையிலிருந்து தப்புவது போன்ற சமூக காரணங்களுக்காகவும்  ஆன்மீக காரணங்களுக்காகவும்  இந்து மதத்திலிருந்து    இசுலாத்திற்கு மதம் மாறியவர்கள்.
   அடுத்து  பாபர் இந்த நாட்டை கைப்பற்றியதற்காக, தனது வெற்றியை கொண்டாட அயோத்தியில் பாபர் மசூதியை கட்டியதாக எந்த ஆதாரமும் இல்லாமல் ஒரு வரலாற்று புரட்டை அவிழ்த்து விட்டுள்ளீர்கள். அதற்காக ராமர் கோவிலை இடித்தார் என்றும் குற்றம் சாட்டுகிறீர்கள். எனவே பாபர் மசூதி அவமான சின்னம், அகற்றப்பட வேண்டியது என்றும் கூறியிருக்கிறீர்கள்.
     போர் வெற்றியை கொண்டாட மசூதி கட்டுவது முகலாயர் வழக்கம் என சொல்ல முடியாது. அக்பர் ராசஸ்தான் பகுதியை வென்றதை கொண்டாட பதேபூர் சிக்ரி கோட்டையைத்தான் கட்டினார். மசூதி கட்டவில்லை. மேலும் பாபர் கோவிலை இடித்து மசூதி கட்டியிருப்பாரா என்று அவர் தனது மகன் ஹுமாயுனுக்கு எழுதிய உயிலை படித்துவிட்டு முடிவு செய்யலாம்.

பாபரி நாமா எனும் நூலில்  கி.பி 11.01.1527 அன்று தனது புதல்வர் ஹூமாயூனுக்கு விட்டுச் சென்ற புகழ்பெற்ற உயிலில் பாபர் பின்வருமாறு கூறுகிறார் :
‘‘அருமை மகனே! வகை வகையான மதங்களைப் பின்பற்றுபவர்கள் இந்தியாவில் வாழ்கிறார்கள்.  இத்தகைய நாட்டின் அரசாட்சியை மன்னாதி மன்னராம் கடவுள் உன்னிடம் ஒப்படைத்ததற்கு நீ நன்றி செலுத்த வேண்டும்.  ஆகவே நீ பின்வருவனவற்றைக் கடமைகளாக அமைத்துக் கொள்”
“நீ உனது மனதைக் குறுகிய மத உணர்வுகள், தப்பெண்ணங்கள் பாதிக்க அனுமதிக்கக் கூடாது.  மக்களின் எல்லா பிரிவினர்களும் பின்பற்றுகின்ற மதசம்பந்தமான மென்மையான உணர்ச்சிகளுக்கும் மதப்பழக்கங்களுக்கும் நீ உரிய மதிப்புக் கொடுத்து பாரபட்சமற்ற முறையில் நீதி வழங்க வேண்டும்.”
“நீ மற்ற சமூகத்தினரின் வழிபாட்டுத் தலங்களை ஒரு போதும் இடித்துச் சேதப்படுத்தக் கூடாது.  நீ எப்போதும் நியாயத்தை நேசிப்பவனாக விளங்க வேண்டும்.  இதனால் மன்னருக்கும் மக்களுக்குமிடையே சுமுகமான இனிய உறவு நிலவ முடியும்.  அப்போதுதான் அமைதியும் திருப்தி உணர்வும் நிலைபெறும்.”
 பாபரின் இந்த உயில் மறுக்க முடியாத வரலாற்று ஆவணமாகும்.  ஒரு வேளை பாபர் மசூதி இருந்த இடத்தில் ராமன் கோவில் இருந்து அதை இடித்திருந்தால் மறைக்க வேண்டிய அவசியமும் பேரரசனான பாபருக்கு அன்று இல்லை.  இருபதாம் நூற்றாண்டில் ஆர்.எசு .எசு. எனும் கூட்டம் தன்மீது குற்றம் சாட்டும் என்று அவர் எதிர்பார்த்திருக்கவும் வாய்ப்பில்லை.
இப்போது சொல்லுங்கள்.பாபர் ராமர் கோவிலை இடித்துவிட்டு மசூதி கட்டியிருப்பாரா.

மேலும் பாபர் மசூதி கட்டப்பட்ட அதே காலத்தில் அயோத்தியில் வாழ்ந்து வந்த புகழ் பெற்ற ''ராம சரிதா மனஸ்''இயற்றிய ராம பக்தர் துளசி தாசர் அந்நூலில் பாபர் கோவிலை இடித்ததாக எதுவும் எழுதவில்லை.கோவில் இடிக்கப்பட்டிருந்தால் துளசி தாசரும் அதை மறைக்க வேண்டிய அவசியம் இல்லையே.  
    பாபர் மசூதி ஒரு அவமானச் சின்னம் என்பது உங்கள் சங் பரிவாரத்தின் நச்சுப் பரப்புரையை அன்றி வேறல்ல.
    அடுத்து பாபர் நம் மதத்தவன் என்பதால் முசுலிம்கள் பாபர் மசூதி மீது உரிமை கொண்டாடுவதாக கூறியிருக்கிறீர்கள். அதை வைத்து பாகிஸ்தான் இந்தியா மீது படையெடுத்தால் நம் மதத்தவர்கள் என்பதால் முசுலிம்கள்     ஆதரிக்கமாட்டார்கள்தானே என நச்சுப்பரப்புரை வேறு. பாகிஸ்தானுடனான அத்தனை போரிலும் முசுலிம்கள் செய்த அளப்பரிய தியாகங்களை இழிவுபடுத்துவதாக உங்கள் கூற்று உள்ளது. அண்மைய கார்கில் போரில் கூட போர்த்தந்திர கேந்திர முக்கியத்துவம் வாய்ந்த " புலிக்குன்றை" இந்தியாவுக்கு முசுலிம் வீரர்கள் தான்  பெரும் உயிரிழப்பை சந்தித்து கைப்பற்றி தந்தார்கள் என்பதை நினைவில் கொண்டு பேசுங்கள். 
     பாபர் கட்டினார் என்பதற்காக முசுலிம்கள் பாபர் மசூதி மீது உரிமை பாராட்டவில்லை. 450 ஆண்டு காலம் தொழுகை நடத்திய தங்கள் வழிபாட்டுத்தலம் என்ற அடிப்படையில்தான் உரிமை கோருகிறார்கள். இந்திய அரசியல் சட்டம் வழங்கியுள்ள வழிபாட்டு உரிமை இந்தியாவில் நடைமுறை படுத்தப்படுகிறது என்பது உண்மையானால் பாபர் மசூதி முசுலிம்களிடம் ஒப்படைக்கப்படவேண்டும். 

 \\பிரச்னைக்குரிய இடத்தில் தொழுகை நடைபெற்றதேயில்லை. இந்துக்கள் அதை ராமஜென்ம பூமியாகக் கருதி வழிபடுகிறார்கள். எனவே, அந்தப் பகுதியின் மீது எங்களுக்கு உரிமை கோரவில்லை என இந்துத் தலைவரிடம் எழுதித் தந்து சமாதானம் ஆனார்கள்// 

     இப்படி ஒரு புளுகு மூட்டையை அவிழ்க்கிறீர்கள்.மசூதி கட்டப்பட்ட காலம் முதல் உங்கள் சங்க பரிவார் கூட்டம் 1949 -டிசம்பர் மாதம் 22-ஆம் நாள் பாபர் மசூதிக்குள் அத்து மீறி நுழைந்து ராமர் சிலையை வைத்த நாள் வரை அங்கு தொழுகை  நடைபெற்று வந்தது.முசுலிம்கள் இப்படி எழுதி தந்தார்கள் என்பதும் ஆதாரமற்ற கற்பனை.

\\
அயோத்தி நகரில் ஹிந்துக்களும் முஸ்லிம்களும் ஒன்றுபட்டு ஆங்கிலேயனை எதிர்த்தனர்.//


சரியாகத்தான் சொல்லியிருக்கிறீர்கள். ஆங்கிலேயனை எதிர்த்து இந்து முசுலிம் மக்களின் ஆதரவுடன் வீரப்போர் புரிந்த அயோத்தியின் அரசி பேகம் கசரத் மகல்-ஐ.காட்டி கொடுத்தவர்களை பற்றியும் சொன்னீர்கள் என்றால் தமிழ் மக்களும் தெரிந்து கொள்வார்களே.


Wednesday, October 20, 2010

எண்களே யாதுமாகி நிற்குமா?

                எண்ணும்  எழுத்தும் கண்ணென தகும்.

                 அதற்காக எண்களும் எழுத்துக்களும்  எல்லாம் தர வல்ல சூத்திரம் ஆகுமா?
   
இந்திய தகவல் தொடர்பு நிறுவனத்தின் சென்னை தொலைபேசிகள்  கவர்ச்சிகரமான எண்களை மின் ஏலத்தில் விற்பனை செய்யவுள்ளது. 94456 மற்றும் 94459 வரிசை எண்களை சென்னை தொலைபேசிகள் அறிமுகப்படுத்துவதை தொடர்ந்து இந்த ஏல அறிவிப்பு வந்துள்ளது.கவர்ச்சி எண்கள் மூன்று நிலைகளாக பிரிக்கப்பட்டு குறைந்த பட்ச ஏலத்தொகை  முறையே 7000 ,5000 ,மற்றும் 3000 ,என அறிவிக்கப் பட்டுள்ளது,
  
கடந்த முறை 2009 டிசம்பர் மாதத்தில் இது போன்ற கவர்ச்சி எண்கள் ஏலம் விடப்பட்டதில் பி.எசு.என்.எல். ரூ 8 லட்சம் உருவாக்களை மக்களிடமிருந்து கொள்ளை அடித்துள்ளது. அதில் உச்சபட்ச கவர்ச்சிகரமான எண் ரூ.1.8 லக்கத்திற்கு விலைபோனதாம்.
    என்ன ஒரு முட்டாள்தனம் பாரீர். மீள் விற்பனை மதிப்பு இல்லாத ஒரு பொருளுக்கு இலக்கக் கணக்கான உருவாக்களை அள்ளி இறைக்க மனிதரில் இத்தனை மூடர்களா.அலைபேசியில் நம்மை தொடர்புகொள்ள உதவும் ஒரு எண்ணுக்காக பல லக்க உருவாக்களை வாரி இறைக்க மக்கள் அணியப் படுத்தப்பட்டுள்ளனர். எந்த எண்ணைகொண்டு அழைத்தால் என்ன. நாம் எப்படி பிறரிடம் பேசி அணுக்கமாக நடந்து கொள்கிறோமோ அதற்கு தகுந்தவாறு நம் பேச்சின் விளைவு இருக்கும். முன்சினம் கொண்ட முட்டாள் ஒருவன் எத்தகைய கவர்ச்சிகரமான  எண்ணை கொண்டிருந்தாலும் தனது முரட்டு பேச்சினால் மொத்த வேலையையும் கெடுத்துவிடுவான்.சாதுரியமும் சாமர்த்தியமும் உள்ள ஒருவன் வாயில் நுழையாத எண்ணை கொண்டிருந்தாலும் கனிவான பேச்சின் மூலம் வெற்றியடைவான்.
   
"பெயரியல் பேராசான்களும்" "எண்ணியல் வல்லுனர்களும் " நம் மக்களிடையே மூட நம்பிக்கை தீயை மூட்டி குளிர்காய்ந்து கொண்டிருப்பதன் மூலம் இத்தகைய கொள்ளைகளுக்கு வழியை திறந்துவிட்டுள்ளனர். அதுவும் அரசுத்துறை நிறுவனமான சென்னை தொலைபேசிகள்  இந்த வேலையை வெட்கமின்றி செய்து வருகிறது.
   
நினைவில் இருத்துவதற்கு எளிதானவை என்று கவர்ச்சிகரமான எண்களை விலை கொடுத்து வாங்குவது நியாயப்படுத்தப்படுகிறது. இன்றைய நவீன யுகத்தில் அனைத்து தொலைபேசி எண்களும் அலைபேசியிலோ  நிலை தொலைபேசியிலோ பதிவு செய்யப்பட்டு அதன் வழிதான் அழைக்கப்படுகின்றன. இதில் நினைவு வைத்துகொள்வது என்பதெல்லாம் கேலிக்கூத்து. சப்பைக்கட்டு.

ஒரு வினாடியின் நூற்றில் ஒரு பங்கு பின்தங்கியதால் பன்னாட்டு விளையாட்டு போட்டிகளின் ஓட்டப்பந்தயங்களில் பதக்கம் வெல்லும் வாய்ப்பை பறிகொடுத்த வீரர்கள் ஏராளம். (நமது பி.டி.உசா அப்படி தவறவிட்டது இன்றளவும் நமக்கு வருத்தத்தை தருகிறது) அவர்களது பெயரோ, தொலைபேசி எண்ணோ இந்த பேராசான்களின் அறிவுரை பெற்று மாற்றப்பட்டால் அடுத்தடுத்த போட்டிகளில் வெற்றிகிட்டி விடுமா? கடும் உழைப்பும் பயிற்சியுமே வெற்றியை பெற்றுத்தரும்.
      பெயரும் எண்களும் ஒரு மனிதனின் வாழ்வில் எந்த மாற்றத்தையும் ஏற்ப்படுத்தமுடியாது. அவற்றை நம்பி மோசடி பேர்வழிகளின் பின்னால் போவது முட்டாள்தனம் என்பதை நம் இன சகோதரர்களுக்கு எடுத்து சொல்வோம்.வாரீர்!

Monday, October 18, 2010

101 பதக்கங்கள்.ஆலையில்லா ஊருக்கு இலுப்பை பூ சர்க்கரை.

  Prime Minister Manmohan Singh is seen with wrestler Sushil Kumar and other medal winners during an interaction at his residence in New Delhi on Friday. Photo: Rajeev Bhatt
  பதக்கம் வென்ற வீரர்களை பாராட்டும் தலைமை அமைச்சர்.                                              
                                                           
                           ஒரு வழியாக, 42 கோடிப்பேர் வறுமையிலும் பட்டினியிலும் பரிதவிக்கும் நாட்டில் பல்லாயிரம் கோடி உருவாக்களை விழுங்கிவிட்டு,இரண்டு இலக்கம் பேரை வீடுகளை விட்டு விரட்டியடித்து வீதிகளில் அலைய விட்டுவிட்டு  பொதுச்செல்வ நாடுகள் விளையாட்டு போட்டிகள் முடிவடைந்திருக்கின்றன.

101 பதக்கங்களுடன் இந்தியா பதக்கப் பட்டியலில் இரண்டாவது இடம் பிடித்திருக்கிறது.ஆளும் கும்பல் மற்றும் விளையாட்டு சங்கங்களின் ஊழல்,முறைகேடுகள்,மற்றும் அலட்சியப்படுத்துதல் போன்ற தடைக்கற்களை மீறி சாதனை படைத்த இந்திய வீரர்களை பாராட்டுகிறோம்.
                            
                            இரண்டு ஆண்டுகளுக்கு முன் நடைபெற்ற ஒலிம்பிக் போட்டிகளில் ஒற்றைக்கையால் விரல் விட்டு எண்ணும் அளவுக்கே பதக்கங்கள் வென்ற இந்திய வீரர்கள் இந்த போட்டிகளில் 101 பதக்கங்கள் வென்றதன் மூலம் இது உலகத்தரம் வாய்ந்த போட்டிகள் அல்ல என்பதை நாம் விளங்கிகொள்ளலாம்.தெற்காசிய விளையாட்டு போட்டிகளை விட சற்று மேம்பட்டவை என்று வேண்டுமானால் சொல்லலாம்.இருந்தாலும் நம் வீரர்களின் உழைப்பையும் முயற்சியையும் பாராட்டுகிறோம்.எனவேதான் இந்த வெற்றியை ஆலையில்லா ஊருக்கு இலுப்பை பூவே சர்க்கரை என்கிறோம்.

                           இந்த போட்டிகள் தவிர்க்கவியலாமல் இரண்டு நன்மைகளை நமக்கு செய்திருக்கிறது.
                           ஒன்று,பொது செல்வ நாடுகள் என்பதே இங்கிலாந்தின் அடிமைகள் கூடாரம். அதில் நாம் ஏன் இன்னும் உறுப்பு  நாடாக நீடிக்க வேண்டும்.நம் முகத்தில் குத்தப்படும் அடிமை முத்திரையை நீக்க அந்த அமைப்பில் இருந்து இந்தியா வெளியேற வேண்டும் என்பது மக்களிடையே விவாதப் பொருளாகியிருக்கிறது.இந்த விவாதம் அதன் வளர்ச்சிப்போக்கில் நாட்டின் உண்மையான விடுதலையை நோக்கி நம்மை இட்டுச்செல்லலாம்.

                             இரண்டு,நம் இளைஞ்ரகளை  சீரழிக்கும், துணைக்கண்ட விளையாட்டு துறையை பீடித்த புற்று நோயான மட்டைப் பந்து (கிரிக்கெட்)விளையாட்டு அன்றி வேறு விளையாட்டுகளும் உள்ளன என்று அவற்றின் மீதான ஆர்வத்தை நம் இளைஞர்களிடம ஏற்படுத்தி விட்டு சென்றுள்ளன இந்த போட்டிகள்.அந்த வகையில் ஆளும் கும்பல் தாமறியாமலேயே மக்களுக்கு உதவியுள்ளனர்.

                                     

                                         

Tuesday, October 12, 2010

ராசபக்செவுக்கு சிவப்பு கம்பளம்.வெந்த புண்ணில் வேல் பாய்ச்சும் இந்திய அரசு.


தில்லியில் நடைபெற்று வரும் பொது செல்வ நாடுகள் விளையாட்டு போட்டிகள் நிறைவு விழாவில் தலைமை விருந்தினராக இன வெறியன் ராசபக்சே கலந்து கொள்வார் என செய்திகள் வெளியாகியுள்ளன.பல்லாயிரம் ஈழத்தமிழர்களை பன்னாட்டு போர் நெறிகளை மீறி கொன்று குவித்த,இலக்கக் கணக்கான ஈழ மக்களை முள்கம்பி வேலிக்குள் அடைத்து வைத்து மகிழும்,ஈழ நாட்டையே திறந்த வெளி சிறையாக்கி எம்மின சகோதரர்களை வதைக்கும்,அம்மிருகம் நம் வரிப்பணத்தில் விருந்துண்டு களிக்க வருகிறது.
                                                             போர் முடிந்தபின் ஈழ நிலைமைகளை நேரில்  கண்டு வர இந்தியாவிலிருந்து தமிழக நாடாளுமன்ற உறுப்பினர்கள் குழுவொன்று இலங்கைக்கு அனுப்பப்பட்டது.அக்குழுவினர் இலங்கையின் அரசுத்தலைவர் என்ற முறையில் ராசபக்செவையும் சந்தித்தனர்.அப்போது அக்குழுவில் இடம் பெற்றிருந்த திருமாவளவனை சுட்டிக்காட்டி ''இவர் பிரபாகரனின் நெருங்கிய நண்பர்.அந்த சமயத்தில் இவர் அங்கு இருந்திருந்தால் இவரையும் போட்டுதள்ளியிருப்போம்''என்று சொன்னார்,இது ஆதாரபூர்வமாக ஏடுகளில் வெளிவந்த செய்தி.இன்னொரு நாட்டின் பிரதிநிதியாக தம்மை சந்திக்கும் தூதுக் குழுவினரிடம் ஒரு அரசுத்தலைவர் பேசுகிற பேச்சா இது.ஆகவே ராசபக்சே அரசுதந்திர உறவுகளில் கடைபிடிக்க வேண்டிய நாகரீகத்தை காற்றில் பறக்க விடும் நாகரீகமற்ற ஒரு மூளையற்ற முண்டம் இல்லையா.ஒரு அரசுத்தலைவர் இப்படி பேசுகிறார் என்றால் அவரது உள்ளம் எத்தகைய இனவெறி கொண்டதாக இருக்கவேண்டும்.
                                                             இப்படிப்பட்ட ஒருவர் நிறைவு விழாவில் தலைமை விருந்தினராக கலந்து கொள்ள தகுதி உடையவரா.
                                                              இந்த நிறைவு விழாவை புறக்கணிக்க போவதாக திருமாவளவன் அறிவித்துள்ளார்.பன்னாட்டு நீதிபதிகள் தீர்ப்பாய விசாரணையிலிருந்து ராசபக்சேவை பாதுகாக்கவே இப்படி ஒரு கௌரவத்தை அவருக்கு இந்திய அரசு வழங்குவதாக வைகோ குற்றம் சாட்டியுள்ளார்.புதிய தமிழகம் கட்சியின் தலைவர் கிருசுனசாமியும் ராசபக்சே வருகையை எதிர்த்துள்ளார்.ஆனால் இதற்கெல்லாம் இந்திய ஆளும் கும்பல் மசியப்போவதில்லை.சிங்களவனின் இனவெறிக் குட்டையில் நீந்திக் களிக்கும்  எருமைகள் மழைத்தூரலுக்கா அஞ்சப்போகின்றன.
                                                         
                                                         ஆகவே எமது வலைப்பூ விருந்தினர்களுக்கு நாம் விடுக்கும் வேண்டுகோள்;
                                                  நிறைவு விழா நிகழ்ச்சிகளின் தொலைகாட்சி நேரடி ஒளிபரப்பை புறக்கணிப்போம்.தமிழர்கள் மட்டுமல்ல பிற மொழி சகோதரர்களையும் நமது வருத்தத்தை எடுத்து சொல்லி புறக்கணிக்க வேண்டுவோம்.நமது இந்த சிறுபொறி காட்டுத்தீயாக பற்றி பெருந்தொகையினர் புறக்கணிப்பார்களேயானால் வருமானம் போய்விடுமே என்ற கவலையில் தொலைக்காட்சி முதலாளிகளே இனி வரும் காலங்களில் ராசபக்சேவை விரட்டும் பொறுப்பை ஏற்றுக்கொள்வார்கள்.