Sunday, December 25, 2011

vijay தொலைக்காட்சியின் ''நீங்களும் வெல்லலாம் ஒரு கோடி'' மடையர்களாவது எப்படி.

விசய் தொலைக்காட்சி ஒரு கோடி பரிசு வழங்கும் ''அறிவு''போட்டி ஒன்றை நடிகர் சூர்யாவை வைத்து நடத்துவதாக அறிவித்து அந்த போட்டியில் பங்கு பெறுவதற்கான தகுதியை தீர்மானிக்க இன்று முதல் ''பொது அறிவு'' கேள்வியை வெளியிட்டுள்ளது.அந்த கேள்வி.


''தமிழ்த்தாய் வாழ்த்து பாடலின் முதல் வரி என்ன.
விடைகள்.சீராரும்,ஈராறும்,பேராறும்,நீராரும்.
இதில் ஒன்றை தேர்ந்தெடுக்க வேண்டுமாம்.எப்பேர்ப்பட்ட அறிவார்ந்த கேள்வி பார்த்தீர்களா.


எட்டுக்கால் பூச்சிக்கு எத்தனை கால் என்ற விவேக்கின் கேள்வியை ஒத்த மடத்தனமான இந்த கேள்வியை கேட்டு நம்மை மூடர்களாக்கும் கயமையல்லவா இது. இப்படி ஒரு எளிதான கேள்வியை கேட்டு பலரையும் விடை அனுப்ப தூண்டுகிறார்கள்.குறுஞ்செய்தி மூலம் விடைகள் அனுப்ப வேண்டுமாம்.ஒவ்வொரு குறுஞ்செய்திக்கும் குறிப்பிட்ட அளவு கட்டணம் வசூலிப்பார்கள் எனும் போது எத்தனை கோடிகளை தமிழ் மக்களிடமிருந்து கொள்ளையிடுகிறார்கள் என்பதை எண்ணிப் பார்க்க வேண்டியுள்ளது.


சரி,இந்த போட்டிகள்தான் அறிவை வளர்க்க உதவுகின்றனவா என்று பார்த்தால் இல்லை என்பதே உண்மையாக உள்ளது.இத்தகைய போட்டிகள் வெறும் விவரங்களை பற்றிய அறிவையே கோருகின்றன. 


ஐக்கிய நாடுகள் அவையின் பொது செயலாளர் பெயர் என்ன என்பதையும், ஐ.நா.பாதுகாப்பு அவையின் நிரந்தர உறுப்பு நாடுகளையும்,அவை veto அதிகாரத்தை எத்தனை முறை பயன்படுத்தி இருக்கின்றன என்பதையும் தெரிந்து வைத்திருப்பதால் ஒரு பயனுமில்லை.மாறாக ஐ.நா.அவை எப்படியெல்லாம் ஏகாதிபத்தியங்களுக்கு ஊழியம் செய்து வருகிறது, வல்லரசு நாடுகள் எவ்வாறு உலக மக்களுக்கு எதிராக அந்த அவையை கேடாக பயன்படுத்திக் கொள்கின்றன என்பதை அறிந்து கொள்வதுதான் பயனுள்ளது.


தமிழ் நாட்டின் முதல் மற்றும் தற்போதைய ஆளுநர் யார் என்பதை தெரிந்து கொள்வதால் என்ன பயன்.மாறாக ஆளுநர் பதவி என்பதே எப்படி பிரித்தானிய காலனி ஆதிக்கத்தின் நீட்சியாக உள்ளது என்பதையும் ஆளுநர் பதவியின் மூலமாக நடுவண் அரசு எப்படி தமிழ் நாட்டை தனது அடிமை நாடாக நடத்துகிறது என்பதையும் புரிந்து கொள்வதுதான் உண்மையான அறிவு.அதை விடுத்து வெறும் பெயர்களில்,அவற்றை அறிந்து கொள்வதில் அறிவுக்கு என்ன வேலை இருக்கிறது.


ஆனால் இப்படி வெறும் விவரங்களை அறிந்து வைத்திருப்பதே ''அறிவு'' என மக்களை மதி மயக்கத்தில் ஆழ்த்துகின்றன இந்த வகையான ''பொது அறிவு போட்டிகள்''.மிகப் பெரும் தொகை ஒன்றை பரிசாக அறிவித்து ஏற்கனவே நுகர்வு கலாச்சாரத்தில் மூழ்கி கிடக்கும் மக்களை தூண்டில் போட்டு இழுக்கிறார்கள்.அப்பாவி மக்களோ அவன் யாருக்கோ கொடுக்கப்போகும் பரிசுக்காக குறுஞ்செய்தி அனுப்பி பல கோடி உருவாக்கள் மொய் எழுதிக் கொண்டிருக்கிறார்கள்.


ஆகவே தமிழ் மக்கள் இந்த போட்டியை அறவே புறக்கணித்து ஒதுக்கி தள்ள வேண்டும்.







Tuesday, November 29, 2011

சில்லறை வணிகத்தில் அந்நிய முதலீடு.பகற் கொள்ளைக்கு பட்டு கம்பள வரவேற்பு.



காலம்.பா.ச.க.ஆட்சிக்காலம்.
இடம். மாநிலங்களவை.


சில்லறை வணிகத்தில் அந்நிய முதலீட்டை அனுமதிப்பது குறித்து விவாதம் தூள் பறக்கிறது.பா.ச க,அரசு அந்நிய முதலீட்டை அனுமதிக்க எத்தணிக்கிறது.தாடியும் தலைப்பாகையுமாக ஒரு முதியவர் அரசின் கருத்தை கடுமையாக எதிர்த்து பேசுகிறார். நாடாளுமன்றத்துக்கு உள்ளேயும் வெளியேயும் கடும் எதிர்ப்பு கிளம்பியதால் பா.ச.க அரசு தனது முயற்சியை கை விட்டு பின்வாங்குகிறது.


காலம்.2011  
இடம்.அதே நாடாளுமன்ற வளாகம்.


சில்லறை வணிகத்தில் அந்நிய முதலீட்டை அனுமதிப்பது என காங்கிரசு கயவாளி கும்பல் முடிவெடுத்ததை நாடாளுமன்றத்தில் கடுமையாக எதிர்க்கிறது பா.ச.க. அதே தாடிக்காரர் சில்லறை வணிகத்தில் அந்நிய முதலீட்டை எதிர்க்கும் எதிர்க்கட்சிகளை சமாதனப்படுத்த அனைத்துக் கட்சி கூட்டம் கூட்டப்படும் என அறிவிக்கிறார்.


ஆம்.நண்பர்களே அந்த தாடிக்காரர் நமது முதன்மர் மன்மோகன்தான்.இன்று எதிர்ப்பதாக நாடகமாடும் பா.ச.க சந்தர்ப்பம் கிடைத்தால் எத்ததைய துரோகத்துக்கும் தயங்காது என்பதை அதன் கடந்த கால ஆட்சியே சான்றாக இருக்கிறதல்லவா.எப்பேர்ப்பட்ட நயவஞ்சகர்களிடம் நாடு சிக்கிக் கொண்டுள்ளது,பார்த்தீர்களா.


நாட்டை ஏகாதிபத்திய நாடுகளிடம் அடிமையாக்கி,பல கோடி மக்களின் வாழ்வாதாரத்தை பறித்து சூறையாடி பன்னாட்டு ஏகபோக நிறுவனங்கள் கொள்ளையடிக்க அடிகோலும் இந்த சில்லறை வணிகத்தில் அந்நிய முதலீடு எனும் ஆபத்தை அரசியல் கட்சிகளை நம்பியிராமல் மக்களே போராடி வீழ்த்த அணி திரள வேண்டிய தருணமிது.

Monday, November 14, 2011

எண்ணியல்,பெயரியல்.ஏமாளிகளின் புகலிடம்.எத்தர்களின் உறைவிடம்.





நேற்று விசய் தொலைக்காட்சியில் ஒரு அருமையான நிகழ்ச்சியை பார்க்க முடிந்தது. நீயா நானா எனும் தலைப்பிலான அந்நிகழ்ச்சியில் எண்ணியல் [எண் கணிதம்] ,பெயரியல் குறித்து விவாதம் நடந்தது.அவற்றை நம்புபவர்கள் ஒரு புறமும் நம்பாதவர்கள் மறுபுறமுமாக நின்று வாதிட்டனர்.


எண்ணியல்,பெயரியல் என்ற பெயரில் நடத்தப்படும் மோசடியை ஒரு கட்டத்தில் மிக அருமையாக தோலுரித்து காட்டினார் நிகழ்ச்சி ஒருங்கிணைப்பாளர் கோபிநாத்.இந்த எண்ணியல்,பெயரியல் எவ்வளவு காலமாக இருந்து வருகிறது என்று அவர் கேட்டபோது இந்த மூடத்தனத்தின் ஆதரவாளர்களால் அண்மைக்கால நூல்களையே ஆதாரமாக காட்ட முடிந்தது.அதை வைத்து இந்த இயல்களின் வயது 60 தானா அவர் கேட்டபோது திணறிப்போன அவர்கள் ஏதேதோ பழங்கால நூல்களை சொல்லி சமாளிக்க முயன்றனர்.ஆனாலும் திறந்த மனதோடு எண்ணிப்பார்க்கும் எவரும் எண்ணியல்,பெயரியல் என்பவையே கடந்த இருபது முப்பது ஆண்டுகளாகத்தான் மக்களிடையே பெயர் பெற்றுள்ளன என்பதை உணர முடியும்.


 வாசுது,அதிருசுடம்.நல்ல நேரம்,கெட்ட நேரம்,சாதகம்,சோதிடம், ராசி,அந்த இல்லாத ராசியை வளைத்துப்பிடித்து பைக்குள் போட்டுக்கொள்ள ராசிக்கல்,ராசிவண்ணம்,சூலம்,அட்டமி,நவமி.என மக்களிடையே மண்டிக்கிடக்கும் அறியாமை இருளை பயன்படுத்தியே இந்த எண்ணியல்,பெயரியல்  பெருச்சாளிகள் தமிழ் சமூகத்தினுள் நுழைந்து விட்டனர் என்பதுதானே உண்மை.


 எண்ணியல்,பெயரியல் ஆதரவாளர்கள் திரும்ப திரும்ப சொன்னதும் தங்கள் தரப்பை மெய்ப்பிக்க ஆதாரமாக காட்டியதும் ஒன்றே ஒன்றுதான்.பிறந்த தேதிக்கேற்ப ராசியான எண் தரும் வகையில் பெயர் வைத்துக்கொண்டால் அல்லது பெயரை மாற்றிக்கொண்டால்  வாழ்வில் முன்னேற்றம் நிச்சயமாம்.இந்த வாதத்திற்கு மகுடம் சூட்டுவது போல் அவர்கள் தரப்பு சிறப்பு விருந்தினர் ''shelvi'' [ஆண்தான்,புனைபெயராம்] தனது தாமோதரன் என்ற பெயரை இப்படி மாற்றிக்கொண்ட பின் தனக்கு புகழும் பணமும் கிடைத்ததாக கூறினார். [இப்படி மக்களை ஏய்த்து பிழைப்பதால் கிடைப்பது ''புகழ்'' என்று சொன்னால் புகழ் என்ற சொல்லே இழிவு பட்டு போகும்].நாம் சொல்கிறோம்,தாமோதரன் பெயரும் புகழும் பெற்றதுக்கு காரணம் மக்களிடம் மண்டிக் கிடக்கும் மூட நம்பிக்கைகளே காரணமேயன்றி பெயர் ஒரு காரணமேயல்ல.அவர் எந்த பெயரை புனை பெயராக வைத்துக் கொண்டிருந்தாலும்  இதுதான் நடந்திருக்கும்.எண்ணிப்பாருங்கள்,மூடநம்பிக்கைகள் குறைவான ஒரு சமூகத்தில் இவர் இப்படி பேர் வாங்கியிருக்க முடியுமா.


அந்த செல்வி தனது வாதத்தை துவக்கும்போதே ஒரு மனிதனுக்கு தன் விருப்பபடி பெயர் வைத்துக் கொள்ளவும் மாற்றிக்கொள்ளவும் உரிமை உண்டு என்றார்.அத்தோடு விட்டாரா,அப்படி பெயரை மாற்றிக் கொள்பவர் அதன் பின் வாழ்வில் முன்னேற்றம் காண்பாராயின் அதற்கு அவரது உழைப்பும் முயற்சியும் ஒரு புறம் காரணமாக இருந்தாலும் அவரது பெயர் மாற்றமே முதன்மையான காரணம் என ஏன் நாங்கள் நம்ப கூடாது என ஒரு ''அறிவார்ந்த''கேள்வியையும் எடுத்து விட்டார்.போதாதா கூடியிருந்த மூடர்களுக்கு.சிரிப்பும் மகிழ்ச்சியுமாக கைதட்டல் தூள் பறந்தது.அடுத்து சில வினாடிகளிலேயே அவர்கள் முகத்தில் ஈயாடாமல் உட்கார்ந்திருக்க வேண்டியிருந்தது. அப்படி ஒரு அருமையான வாதத்தை எடுத்து வைத்து மூட நம்பிக்கையின் முதுகெலும்பை முறித்தார் எதிர்த் தரப்பு சார்பாக சிறப்பு விருந்தினராக வருகை தந்திருந்த சுப.வீரபாண்டியன்.


அவரது சொற்களிலேயே அதனை பார்க்கலாம்.''உங்கள் விருப்பபடி பெயர் வைக்கவும் மாற்றவும் உங்களுக்கு உரிமை உண்டு.மறுக்கவில்லை நாங்கள்.அதனால் நீங்கள் முன்னேற்றம் அடைவதாக நீங்கள் நம்புகிறீர்கள் என்றால் அந்த நம்பிக்கையிலும் நாங்கள் தலையிடவில்லை.ஆனால் அதை அறிவியல் என்று சொல்வதை நாங்கள் மறுக்கிறோம்.அறிவியல் என்றால் அதனை மெய்ப்பித்து காட்டவேண்டும்.பெயர் மாற்றம் நிச்சயம் முன்னேற்றம் தரும் எனபது மெய்ப்பிக்கப்படாதது.ஆகவே அது அறிவியல் அல்ல.வெறுமனே உளவியல் சம்பந்தப்பட்டது அது.''


அதுவரை அறிவியல் என்றும் கணக்கு தவறாது என்றும் தம்பட்டம் அடித்துக் கொண்டிருந்த   மூடநம்பிக்கை ஆதரவாளர்கள் வாயடைத்து போயினர்.ஆம் மெய்ப்பிப்பது எனபது கனவில்  வேண்டுமானால் நடக்கலாம்.நனவில் நடக்காதே.


சுபவீயின் ஒரு கருத்தில் நாம் வேறுபட வேண்டியுள்ளது.எண்ணியல்,பெயரியல் வல்லுனர்களின் ஆலோசனைபடி பெயரை மாற்றிக்கொள்வதால் நன்மைகள் விளையும் என்ற நம்பிக்கையில் நாம் தலையிடவேண்டியிருக்கிறது.அதற்கான உரிமை சமூகத்தின் பால் அக்கறை கொண்டவர்களுக்கு இருக்கிறது.பெயரியல் ''பேராசான்''களுக்கும் ,எண்கணித ''மேதை''களுக்கும் அள்ள அள்ள குறையாத செல்வச்சுரங்கமாக இருக்கும்  பெயர் மாற்றமும் அதன் நன்மைகளும் குறித்த நம்பிக்கை ஒரு தனிமனிதரோடு முடிந்து விடுவதில்லை.அது ஒரு அறிவியல் என பம்மாத்து செய்யும் கயவர்கள் வலையில் சிக்கும் ஒருவரைப் பார்த்து மற்றொருவர்,அவரைப் பார்த்து மற்றொருவர் என சமூகம் முழுவதும் பரவுகின்ற நோய் அது.ஆகவே அந்த நோய் தாக்குதலை தடுக்க அது முழுக்க முழுக்க மூடநம்பிக்கை என எடுத்துச் சொல்லும் கடமை நமக்கு உண்டு.


தொடர்புடைய எமது பதிவுகள்.


எண்களே யாதுமாகி நிற்குமா?http://thippuindia.blogspot.com/2010/10/blog-post_20.html


சோதிடக்கலை அறிவியலா?   http://thippuindia.blogspot.com/2010/09/blog-post_05.html




புத்தம் புதிய பேய்கள்  http://thippuindia.blogspot.com/2010_08_01_archive.html




சாய்பாபா சாவு.''கடவுள்''தோற்றார்.இயற்கை வென்றது. http://thippuindia.blogspot.com/2011/04/blog-post_24.html 


Monday, November 7, 2011

தமிழினத்தின் புதிய விபீடணன் அப்துல் கலாம்.

மரங்களை வெட்டிச்சாய்க்கும் கோடரியின் காம்பு ஒரு மரத்தால் ஆனது எனபது எத்தகைய குரூரமான உண்மை.அதே வகையில் கூடங்குளம் அணு உலையை மூடி தங்கள் உயிரையும் வருங்கால சந்ததியினரின் உயிரையும் பாதுகாக்க கோரி போராடும் தமிழக மக்களை ஏய்த்து அணு உலையை இயங்க வைக்க இந்திய ஏகாதிபத்தியம் செய்து வரும் பல்வேறு நரித்தந்திரங்களில் ஒன்றாக இப்போது முன்னாள் அரசவை கோமாளி அப்துல் கலாம் களமிறக்கப் பட்டுள்ளார்.


ஆம்,நண்பர்களே,சாக்கடையை சீர்படுத்தி கொசுவை கூட ஒழிக்க வக்கற்ற இந்தியா 2020 -ல் வல்லரசாக உருவெடுக்கும் என பிதற்றி வருபவரை ''கோமாளி''என சொல்லாமல் வேறு எப்படி அழைப்பது.

இந்த அதிமேதாவி நேற்று காலை கூடங்குளம் அணு உலையை பார்வையிட்டு அங்கு செய்யப்பட்டிருக்கும் பாதுகாப்பு ஏற்பாடுகளை ''ஆய்வு'' செய்தாராம்.அரை நாளிலேயே தமது ''ஆய்வை''நிறைவு செய்த கலாம் உடனடியாக செய்தியாளர்களை சந்தித்து ''கூடங்குளம் அணு உலை பாதுகாப்பானது''என சான்றிதழ் கொடுத்துவிட்டு வந்த வேலை முடிந்தது என கிளம்பி விட்டார்.

இந்தியாவின்  அணு ஆயுத உற்பத்தியிலும் அணு ஆயுதங்களை சுமந்து சென்று தாக்கவல்ல ஏவுகணைகளை  உருவாக்குவதிலும் பெரும்பங்கு வகித்த,அணு ஆற்றலை பயன்படுத்தி மின்சாரம் தயாரிப்பதாக நாடகமாடி உண்மையில் அணு குண்டுகளை செய்து குவிக்கும் இந்திய அரசின் அரசுத்தலைவராக இருந்த ஒருவர்,அப்பட்டமான ஒரு அணு ஆயுத வெறியர்  வேறு எப்படி சொல்வார்.அவரது கூடங்குளம் வருகைக்கு முன்பே அவரது ''சான்றிதழ்'' எப்படி இருக்கும் எனபது நாம் அனைவரும் அறிந்ததே.


அணு உலைகள் மின் உறபத்திக்காகவா,அணு குண்டு உறபத்திக்காகவா.

அணு உலைகள் பெரும் பொருட்செலவில் நிறுவப்படுவது மின் உற்பத்திக்காக என்று நம்மை நம்பச் சொல்கின்றது இந்திய ஆளும் கும்பல்.ஒரு எளிய கேள்வி இந்த பித்தலாட்டத்தை தோலுரித்து விடும். இரண்டு முறை அணு குண்டுகளை வெடித்து சோதனை செய்துள்ளது இந்திய அரசு.சோதனை நடந்தது தார் பாலைவனத்தில் பொக்ரான் என்ற இடத்தில் என்று நமக்கு தெளிவாக அறிவித்த அரசு அந்த அணு குண்டுகளை எங்கு,எப்போது செய்தோம் என்பதை தெரிவிக்கவில்லையே. ஏன். எங்கே செய்திருப்பார்கள் எனபது ஊரறிந்த கமுக்கம்.வேறு எங்கே செய்ய முடியும்.கலாம் ஏற்றிப் போற்றும் அணு உலைகளில்தான். மின் உற்பத்தி என்ற போர்வையில் அணு உலைகள் அணு குண்டு செய்யவே பயன்படுத்தப் படுகின்றன என்பது இதிலிருந்தே தெளிவாகவில்லையா.


அணு உலையின் முதன்மை விளைபொருள் அணுகுண்டே.பக்க விளைபொருளே மின்சாரம்.


அணு உலைகளின் முதன்மையான விளைபொருள் எதுவென புரிந்து கொள்ள அவற்றின் செயல்பாட்டை சுருக்கமாக பார்ப்போம்.  இயற்கையாக கிடைக்கும் யுரேனிய தாதுவை அணு உலைகளில் செறிவூட்டி யுரேனிய  அணுக்களை அணுப்பிளவு [fission] செய்வதன் மூலம் .ப்ளுட்டோனியம்  உற்பத்தி செய்யப்படுகிறது.இந்த புளுட்டோனியம்தான் அனுகுண்டுகளுக்கான மூலப்பொருள்.

இந்த மூலப்பொருளை உருவாக்குவதற்கான அணுப்பிளவின் போது மிகுந்த வெப்பம் வெளிப்படுகிறது.அதை தணிக்காவிட்டால் யுரேனியம் வைக்கப்பட்டிருக்கும் கொள்கலனை உருக்கி பெரும் கதிரியக்க விபத்தை ஏற்படுத்திவிடும்இதுதான் புக்குசிமாவில் நடந்தது. வெப்பத்தை தணிப்பதற்காக அந்த கொள்கலனில் மீது குளிர்ந்த நீர் பாய்ச்சப் படுகிறது.அந்த நீர் வெப்பத்தினால் நீராவியாக மாறி வெளியேறும் பாதையில் மின்னாக்கியின் சுழல் சக்கரங்களை வைத்து மின்சாரம் உற்பத்தி செய்யப்படுகிறது. இப்படியாக அணுகுண்டு செய்வதற்கான ஏற்பாட்டையே மின் உற்பத்தி என மாய்மாலம் செய்கிறது இந்திய அரசு.

கூடங்குளம் அணுஉலை பாதுகாப்பானதா.

கூடங்குளம் என்றில்லை,உலகின் எந்த ஒரு அணு உலையும் பாதுகாப்பானது அல்ல.இதை அமெரிக்காவின் மூன்று மைல் விபத்தும், ருசியாவின் செர்நோபில் விபத்தும் காட்டியுள்ளன.எல்லாவற்றுக்கும் மேலாக சப்பானின் புகுசிமா விபத்து அணு உலைகள் பாதுகாப்பு குறித்த அத்தனை பிரமைகளையும் தகர்த்து விட்டது.

கூடங்குளம் பகுதிக்கு நிலநடுக்கம்,ஆழிப்பேரலை போன்ற அபாயங்கள் குறைவு என திருவாய் மலர்ந்துள்ளார் நவீன விபீடணன் கலாம்.மேலும் அணுக்கழிவுகள் கடலில் கொட்டப்படாது,அவை ஆழ குழி தோண்டி புதைக்கப்படும் என்றும் தெரிவித்துள்ள அவர் ஒரு உண்மையை சேர்த்து சொல்லியிருந்தால் அவரது அறிவு நாணயத்தை பாராட்டலாம்.அந்த கழிவுகள் ஐம்பதாயிரம் ஆண்டுகளுக்கு கதிரியக்கத்தை வெளிப்படுத்தும் என்பதை அவர் சொல்லாதது ஏன்.[சொல்லியிருந்தால் மக்கள் அவர் முகத்தில் காறித் துப்பியிருப்பார்கள்]

வெறும் முப்பது ஆண்டுகள் சில ஆயிரம் மெகாவாட் மின்சாரம் உற்பத்தி செய்வதற்காக பல்லாயிரம் ஆண்டுகள் கதிரியக்க அபாயத்தை தமிழக மக்கள் சுமக்க வேண்டுமா.இந்த ஐம்பதாயிரம் ஆண்டுகளில் ஒரு முறை கூட நிலநடுக்கமோ,ஆழிப்பேரலையோ கூடங்குளம் பகுதியை தாக்காது என்று எந்த முட்டாளும் உறுதி அளிக்கமாட்டான்.ஆனாலும் வாய்ப்பு குறைவு என கூறும் கலாமை எப்படி அழைப்பது என நீங்களே முடிவு செய்து கொள்ளலாம்.அப்படி ஒரு விபத்து ஏற்பட்டு ஆழ்குழி பெட்டகம் பாதிக்கப்படுமானால் தமிழக மக்களின் கதி என்ன எண்ணிப் பார்க்கும் மனசாட்சியுள்ள எவரும் கூடங்குளம் அணு உலையை ஆதரிக்க மாட்டார்கள்.

பெரும் முதலீடு செய்தபின் கூடங்குளம் அணு உலையை மூடக் கோருவது நியாயமா.

ஒரு நாட்டின் இறையாண்மை எனபது அந்த நாட்டின் மக்களிடமிருந்துதான் பிறக்கிறது.அந்த இறையாண்மையின் பெயரால்தான் இந்திய அரசு கொள்கை மற்றும்  திட்ட முடிவுகளை எடுக்கிறது.அந்த வகையில் தமிழ்நாட்டுக்கு என்ன தேவை எது தேவையில்லை என முடிவு செய்யும் உரிமை தமிழக மக்களுக்கு உண்டு. மேலும் அணு உலை குறித்த கருத்தாக்கங்களை புகுசிமாவுக்கு முன், புகுசிமாவுக்கு பின் என பிரித்து பார்க்கும் அளவுக்கு பேரழிவை ஏற்படுத்தி இருக்கிறது அந்த விபத்து.ஆகவே கூடுதல் விழிப்புணர்வு ஏற்பட்டுள்ள இன்றைய நிலையில் கூடங்குளம் அணு உலையை தமிழக மக்கள் மூடக் கோருவது நியாயமானதுதான்.மக்களின் உயிரை விட பணம் பெரிதா என்ன.

அணு ஆயுதங்கள் நாட்டின் பாதுகாப்பை உறுதி செய்து விடுமா.

அணு ஆயுதங்கள் இரண்டாம் உலகப் போருக்கு பின் பயன்படுத்தப் பட்டதில்லை.பெரும் நாசம் விளைவிக்கும் அவற்றை பயன்படுத்தவும் மனித சமூகம் அனுமதிக்காது.நாய் பெற்ற தெங்கம் பழத்தை போல உருட்டி கொண்டிருப்பதற்காக ஏன் அணு குண்டுகளை செய்ய வேண்டும்.அணுகுண்டு வைத்திருந்தால் எதிரி நாடுகள் நம் மீது தாக்குதல் தொடுக்க அஞ்சும் என்பதும் கற்பனைதான்.1998 பொக்ரான் அணுகுண்டு வெடிப்பு சோதனைக்கு பின்னர்தான் 1999 ல் இந்தியாவின் கட்டுப்பாட்டில் உள்ள காசுமீர் பகுதியின் கார்கில் மலைக் குன்றுகளை பாக்கிசுத்தான் அத்துமீறி நுழைந்து ஆக்கிரமித்தது.அண்டைநாடுகளுடன் சமாதான சக வாழ்வை கடைப்பிடிப்பதுதான் பாதுகாப்பை உறுதி செய்யும்.

ஆகவே இந்தியா வல்லரசு கனவில் அணுஆயுதங்களை செய்து குவிக்க தமிழகத்தை சுடுகாடாக்குவதை அனுமதிக்க முடியாது.

கூடங்குளம் மக்களுக்கு ''லஞ்சம்''கொடுத்து ஏய்க்க முயல்கிறார் கலாம்.

கூடங்குளம் உலையின் பாதுகாப்பு ஏற்பாடுகளை ''ஆய்வு''செய்ய வந்த கலாம் தமக்கு தொடர்பேதும் இல்லாத வகையில் அப்பகுதியில் செய்ய வேண்டிய வளர்ச்சி திட்ட பணிகளை பட்டியலிட்டுள்ளார்.குடிநீர் வசதி,பாசன வசதி,நடுவண் பள்ளிக்கூடங்கள்  நிறுவுவது என மக்களுக்கு ''நல்லது'' செய்வோம் என வாக்கு கேட்டு வரும் அரசியல்வாதி போல் பேசுகிறார்.அதாவது கூடங்குளம் அணு உலையை செயல் பட அனுமதித்தால் இவையெல்லாம் உங்களுக்கு கிடைக்கும்;அனுமதிக்க மறுத்தால் இவையெல்லாம் கிடைக்காது என பசப்பும் மொழியல்லவா இவை.

இதற்கு ஒரே வரியில் நாம் விடையளிப்போம்.அய்யா,அறிவாளியே,இந்த வளர்ச்சி பணிகள் எல்லாம் மக்களுக்கு செய்து தர வேண்டியது ஒரு மக்கள் நல அரசின் கடமையல்லவா.மக்களை எப்போது வேண்டுமானாலும் காவு வாங்க கூடிய ஒரு திட்டத்தை அனுமதித்தால்தான் அவை கிடைக்கும் எனபது கடைந்தெடுத்த பித்தலாட்டமில்லையா.

ஆகவே கலாம் என்ன யாராக இருந்தாலும் நவீன கால விபீடணர்களை புறக்கணிப்போம். தமிழினம் உயிர் பிழைத்திருக்க போராடும் கூடங்குளம் மக்களின் போராட்டத்திற்கு தோள் கொடுப்போம்.


Thursday, November 3, 2011

தூணிலும் இருக்கும் துரும்பிலும் இருக்கும்.அதன் பெயர் தீண்டாமை.

 சென்னை உயர்நீதிமன்ற நீதிபதி கர்ணன் ஒரு தலித் என்பதால் சக நீதிபதிகளாலும் சில வழக்கறிஞர்களாலும் தொடர்ந்து அவமானப் படுத்தப்பட்டு வந்துள்ளார்.இன்று செய்தியாளர்களுக்கு நேர்காணல் அளித்த அவர் தான் அவமானப் படுத்தப்பட்ட அதிர்ச்சியூட்டும்  நிகழ்வுகளை பட்டியலிட்டுள்ளார்.

ஒரு நீதிபதி சப்பாத்து [shoe] அணிந்த கால்களால் அவரை வேண்டுமென்றே மிதித்து விட்டு ''சாரி'' என்ற சொல்லை அலட்சியமாக உதிர்த்து விட்டு போயிருக்கிறார்.பிறிதொரு சமயத்தில் அதே ''நாகரீக கோமான்'' கர்ணன் என்ற பெயர் எழுதப்பட்டிருந்த அறிவிப்பு சீட்டை எடுத்து கீழே போட்டு தனது சப்பாத்து கால்களால் மிதித்து கசக்கி தள்ளியிருக்கிறார்.அந்த ஈனச்செயலை ரசித்து பார்த்து மகிழ்ந்திருக்கின்றனர் வேறு இரு நீதிபதிகள்.

குடிபோதையில் வழக்கறிஞர் கும்பல் ஒன்று நீதிமன்ற வளாகத்திலேயே கர்ணன் அவர்களை ஏசிப் பேசி அவமானப்படுத்துவதும் நடந்து வந்திருக்கிறது.

காலம் மாறிவிட்டது,இப்போதெல்லாம் யார் சாதி பார்க்கிறார்கள் என்று பாசாங்கு மொழிகள் கூறி பார்ப்பனியம் என்பதே காலப் பொருத்தம் அற்றது என்று பம்மாத்து செய்வோரின் முகத்தில் அறைகிறது எதார்த்தம். அதற்கு ஒரு சான்றுதான் கர்ணன் மீதான தீண்டாமை வன்கொடுமை. 

செய்தியாளர் சந்திப்பில் ஒரு செய்தியாளர் கர்ணனை நோக்கி எழுப்பிய கேள்வி ஒன்று.
''சென்னை உயர் நீதிமன்றத்தில் பத்து தலித் நீதிபதிகள் உள்ளனர்.நீங்கள் மட்டும் இப்படி ஒரு குற்றச்சாட்டை சொல்கிறீர்களே ஏன்''
இந்த கேள்விக்கு மிக அழகாக இப்படி விடை அளித்தார் கர்ணன்.
''மற்ற நீதிபதிகள் பற்றி நான் ஏதும் சொல்ல முடியாது.என் மீதான வன்மத்துக்கு காரணம் நான் எனது சுய மரியாதையை பேணுவதுதான்''

இப்போது புரிகிறது இல்லையா நண்பர்களே, ஒரு தலித் உயர்நிலைக்கு வருவதையும் தப்பி தவறி வந்துவிட்டாலும் பார்ப்பனிய சாதிய படிநிலையின் நியதிகளை மதித்து நடக்க மறுப்பதையும் சாதி வெறி கொண்டோர் விரும்புவதில்லை.எந்த நிலையில் இருந்தாலும் தலித் என்றால் கூழை கும்பிடு போட்டுத்தான் வாழ வேண்டும்.மறுத்தால் ''பரமக்குடிதான்'' என்று ஆட்டம் போடுகிறது ஆதிக்க சாதி திமிர். கருத்து ரீதியாகவும்.களத்திலும் அந்த திமிரின் இடுப்பொடிக்காமல் தமிழகத்தை சாதியத்தின் கோரப்பிடியிலிருந்து மீட்க முடியாது. 

இத்தகைய சாதிவெறி கொண்டோர் நீதி பரிபாலனம் செய்யும் நாட்டில் இட ஒதுக்கீடு உள்ளிட்ட ஒடுக்கப்பட்ட மக்களின் நலன்கள் எந்த அழகில் பாதுகாக்கப்படும் என்பதையும் நாம் இந்த இடத்தில் எண்ணிப் பார்க்க வேண்டியுள்ளது.

கர்ணன் தன் மீது நிகழ்த்தப்பட்ட வன்கொடுமைகள் குறித்து  தேசிய தாழ்த்தப்பட்டோர் ஆணையத்துக்கு முறையீடு அனுப்பியுள்ளார்.அந்த மனுவை ஆணையம் உச்ச நீதிமன்றத்துக்கு மேல்நடவடிக்கைக்காக அனுப்பியுள்ளது.

நடுவண் அரசு இந்த பிரச்னையில் தலையிட வேண்டும்.தீண்டாமை கொடுமை புரிந்த நீதிபதிகள் மீது உடனடியாக நாடாளுமன்றத்தில் பதவி நீக்க தீர்மானம் கொண்டு வந்து நிறைவேற்ற வேண்டும்.அத்துடன் நில்லாது அவர்கள் மீது வன்கொடுமை தடுப்பு சட்டத்தின் கீழ் வழக்கு பதிவு செய்து தீண்டாமை குற்றத்துக்காக தண்டிக்க வேண்டும்,என்று அனைவரும் குரல் கொடுக்க வேண்டும். 

Tuesday, September 13, 2011

பரமக்குடி.அரசு மூட்டிய தீ.காவல்துறையின் சதிச்செயல்.

Police lathicharge protestors in Paramakudi on Sunday. Photo: L. Balachandar


கடந்த ஞாயிறு அன்று தியாகி இமானுவேல் சேகரன் குருபூசை நடைபெற்ற பரமக்குடியில் காவல்துறையினர் நடத்திய துப்பாக்கிச்சூட்டில் ஏழு  தாழ்த்தப்பட்ட சமூகத்தவர்கள் உயிரிழந்தனர்.இப்படித்தான் ஊடகங்கள் நமக்கு ''செய்தி''யை வழங்குகிறார்கள்.ஆனால் உண்மை அதுவல்ல இது திட்டமிட்டதொரு படுகொலை. இதை உணர்ந்து கொள்ள எதிர்க்கட்சியினர் கோருவது போல நீதிவிசாரணை எதுவும் தேவையில்லை.நடந்த நிகழ்வுகளை சற்றே சீர் தூக்கி பார்த்தாலே போதும்.  

தியாகி இமானுவேல் சேகரன் குருபூசை கடந்த இருபது ஆண்டுகளுக்கும் மேலாக அவர் கொல்லப்பட்ட பரமக்குடியில் நடைபெற்று வருகிறது.இது எப்படி துவங்கியது என்று பார்க்கலாம். ஆண்டுதோறும் அக்டோபர் திங்கள் 30  ஆம் நாள் பசும்பொன்னில் தேவர் குருபூசை நடத்தப்படுகிறது. அந்த விழாவுக்கு தென்மாவட்டங்களின் பல்வேறு பகுதியிலிருந்தும் தேவர் சமுதாய மக்கள் பசும்பொன்னுக்கு செல்வது வழக்கம்.அவர்களை ஏற்றிச்செல்லும் வாகனங்கள் வழியில் ஒவ்வொரு ஊரையும் கடக்கும்போது கூச்சலும் கும்மாளமும் தூள் பறக்கும்.தேவர் சமூகம் மட்டுமல்ல,பிற சாதிசங்கங்கள்  நடத்தும் சாதி மாநாடுகளுக்கு செல்வோரும் கூட இதே போன்ற ஆர்ப்பாட்டங்களுடன்தான் செல்வது வழக்கம்.தேவர் சமூகத்திற்கும் தாழ்த்தப்பட்ட் சமூகத்திற்கும் இடையிலான நீண்டகால முறுகல் மற்றும் மோதல்களின் காரணமாக சில தேவர் சாதி வெறியர்கள் தாழ்த்தப்பட்ட சமூகத்தினர் வாழுமிடங்களை கடக்கும்போது அவர்களை இழிவு படுத்தி முழக்கங்கள் எழுப்புவதும் வம்பிழுப்பதும் நிகழ்வதுண்டு.


இப்படியான நிலையில்தான் தாழ்த்தப்பட்டவர்களும் இமானுவேல் சேகரன் குருபூசை நடத்த துவங்கினர்.தென்மாவட்டங்களில் ஆதிக்க சாதியாக திகழும் தேவர்களின் தலைவரான பசும்பொன் முத்துராமலிங்கத்தை அச்சமின்றி எதிர்த்து களப்பலியான இமானுவேல் சேகரன் குருபூசை நாயகனாக தேர்ந்தெடுக்கப்பட்டதே தலித்களின் ''இனியும் சாதிய அடக்குமுறைக்கு அஞ்சி அடங்கிக் கிடப்பதில்லை''என்ற முடிவை உலகுக்கு அறிவித்தது.அதற்கேற்ப ஒவ்வொரு ஆண்டும் பரமக்குடிக்கு குருபூசைக்கு வருவோரின் எண்ணிக்கை கூடிக்கொண்டே செல்கிறது.அப்படி போவோர் மற்ற சாதியினர் எப்படி ஆர்ப்பாட்டமாக செல்கிறார்களோ அதே போன்று செல்கிறார்கள்.


மற்ற சாதியினரின் ஆர்ப்பாட்டங்களை அமைதியாக ரசித்தும் சகித்தும் பார்க்கும் காவல்துறையும் உயர்சாதி சமூகமும் தாழ்த்தப்பட்டவர்களின் ஆர்ப்பாட்டங்களை எரிச்சலுடன் பார்க்கிறார்கள்.''பள்ளு,பறைக்கெல்லாம் வந்த வாழ்வை பார்,என்னா திமிரு இவனுங்களுக்கு''என்ற மேல்சாதியின் பொருமல்தான் காவல்துறையின் சதியாக உருவெடுத்து ஆறு தலித்களின் உயிரை குடித்துள்ளது.


நாம் இதை ஏதோ வாய் புளிச்சதோ,மாங்காய் புளிச்சதோ என்ற வகையில் கூறவில்லை.எண்ணிப்பாருங்கள்.சான்பாண்டியனை திடீரென்று இந்த குருபூசையில் மட்டும் கலந்து கொள்ளவிடாமல் தடுத்து கைது செய்ய வேண்டிய அவசியம் என்ன வந்தது.


அவர் இதற்கு முன்னால் பரமக்குடியில் குருபூசையில் கலந்து கொண்டபோது ஏதேனும் கலவரம் நடந்துள்ளதா.இல்லையே. 


சரி இந்த ஆண்டு நிலைமை சரியில்லை என்றால் முதல் நாளே அவரை கைது செய்திருக்கலாமே.குருபூசை நாள் வரை காத்திருந்து அவரது ஆதரவாளர்கள் பரமக்குடியில் குவிந்த பின் கைது செய்தது ஏன்.


குருபூசை நாள் அன்று சான்பாண்டியனை கைது செய்தால் பரமக்குடியில் குவிந்திருக்கும் தாழ்த்தப்பட்டோர் அவரை விடுதலை செய்ய கோரி போராடுவார்கள்.அவர்கள் ஏடாகூடமாக எதையாவது செய்யட்டும்.நாம் மொத்தமாக கணக்கு தீர்த்து விடலாம் என்பதே காவல்துறையினரின் சதித்திட்டம்.தென்மாவட்டங்களை பொறுத்தவரை அ.தி.மு.க. தேவர்களின் கட்சி எனபது ஊரறிந்த கமுக்கம்.அந்த அ.தி.மு.க. செயலலிதாவின் பிடியில்,அந்த செயலலிதா கள்ளர் இனத்தை சேர்ந்த சசிகலா நடராசனின் பிடியில் என்ற நிலையில் தமது பதவிக்கு ஆபத்து ஏதுமிருக்காது என்ற துணிச்சலில்தான் காவல்துறை இந்த அக்கிரமத்தை அரங்கேற்றியிருக்கிறது.



Police resort to lathicharge to disperse a mob in Paramakudi on Sunday. — Photo: L. Balachandar


இந்த படத்தை பாருங்கள்.பொதுவாக கலவரத்தை கட்டுபடுத்த தடியடி நடத்தும் காவல்துறையினர் அந்த இடத்தில் யாரையும் நிற்க விடாமல் அடித்து விரட்டுவதுதான் வழக்கம்.கேட்டால் 144 போடப்பட்டுள்ளது, நான்கு பேருக்கு மேல் கூடி நின்றால் அடிதான் என்பார்கள்.ஆனால் படத்தில் பொதுமக்கள் கைகளை கட்டிக் கொண்டு நின்றபடி காவல்துறையினரின் தாக்குதலை வேடிக்கை பார்க்கிறார்கள்.அவர்கள் மேல்சாதியினராக இருக்க கூடும்.அந்த அளவுக்கு காவலர்கள் போராடும் தாழ்த்தப்பட்டவர்களை மட்டும் குறி வைத்து தாக்கி விரட்டுகிறது.அப்படிப்பட்ட காவல்துறை போராட்டக்காரர்கள் காவல்துறை வாகனங்களை தாக்கி தீ வைக்குபோது எங்கே போனது.இதைத்தான் நாம் சதி என்கிறோம்.வேண்டுமென்றே போராடுபவர்கள் மீது தடியடி நடத்தி அவர்களை ஆத்திரமூட்டி விட்டு அவர்கள் தவறு செய்ய ஏதுவாக நிகழ்விடத்திலிருந்து சற்று நேரம் விலகி இருந்திருக்கிறது காவல்துறை.பின்னர் சுட்டிக்காட்டி நியாயப்படுத்தி கொள்ள போராடுபவர்களின் தீவைப்பு நிகழ்ந்தவுடன் துப்பாக்கி சூடு நடத்தி ஆறு தாழ்த்தப்பட்டவர்களின் உயிரை குடித்திருக்கிறது.


இது சதிதான் என்பதற்கு மேலும் ஒரு ஆதாரம் மதுரையில் நடந்த துப்பாக்கி சூடு.குருபூசைக்கு சென்றவர்களின் வாகனத்தை மறித்து எந்த ஒரு எச்சரிக்கையும் அளிக்காமல்,தடியடி,கண்ணீர் புகை குண்டு வீச்சு எதுவும் நடத்தாமல் [அதாவது தலித்கள் ஏதேனும் வன்முறையில் ஈடுபட்டிருந்தால்,ஆனால் மதுரையில் வன்முறை நிகழ்வு எதுவும் நடக்கவில்லை] எடுத்த எடுப்பிலேயே காவல்துறை துப்பாக்கியால் சுட்டு இருவரை கொல்ல முயன்றிருக்கிறது.


ஆக மொத்தத்தில் தமிழகத்தில் நடைபெறுவது தாழ்த்தப்பட்ட மக்களுக்கு எதிரான அடக்குமுறை ஆட்சி என்பதையும்,இந்த நாட்டில் சாதிவெறி எங்கெங்கும் நீக்கமற நிறைந்துள்ளது என்பதையும் தமது குருதியால் வரலாற்றின் ஏடுகளில் பதிவு செய்து விட்டு களப்பலியாகியுள்ளனர் அந்த ஆறு தலித்கள்.தமிழினத்தை சாதியத்தின் கோரப்பிடியிலிருந்து மீட்க    என்ன செய்ய போகிறீர்கள்.இதுதான் காலம் நம் முன் வைத்திருக்கும்  கேள்வி.




Wednesday, August 31, 2011

நிரபராதி தமிழர்கள் மூவரை சாவின் பிடியிலிருந்து விடுவிப்போம். கருணாவின் துரோகத்தையும்,செயாவின் கபட நாடகத்தையும் முறியடிப்போம்.

9 வால்ட் மின்கலம் [Battery cell] இரண்டை வாங்கினார் என்பதை வைத்து ஒருவருக்கு சாவுத்தண்டனை வழங்க முடியும் என்று சொன்னால் அதை உங்களால் நம்ப முடிகிறதா.ஆம்,நண்பர்களே,ராசீவ் காந்தி கொலை வழக்கில் சிக்க வைக்கப்பட்டுள்ள பேரறிவாளன் மீதானகுற்றச்சாட்டு 9 வால்ட் மின்கலம் இரண்டை வாங்கி ராசீவ் கொலையாளிகளுக்கு கொடுத்தார் என்பதுதான்.இதுவும்  பொய்யான குற்றச்சாட்டு.

ராசீவ் காந்தி கொலை வழக்கில் தூக்கு தண்டனை விதிக்கப்பட்டுள்ள சாந்தன்,முருகன்,பேரறிவாளன் ஆகிய மூவர் மீதும் குற்றம் ஐயத்திற்கு இடமின்றி நிரூபிக்கப்படவில்லை.இந்த வழக்கு கொடும் ஆள்தூக்கி சட்டமான ''தடா''வின் கீழ் பதிவு செய்யப்பட்டு விசாரணை நடத்தப்பட்டு தீர்ப்பளிக்கப்பட்டுள்ளது.இந்த இடத்தில் நாம் ஒன்றை நினைவு படுத்திக்கொள்ள வேண்டும்.இந்திய தண்டனை சட்டத்தின்படி காவல் துறையினரிடம் குற்றம் சாட்டப்பட்டவர் அளிக்கும் வாக்குமூலம் நீதிமன்றத்தில் செல்லாது. ஒரு நீதிபதியிடம் அளிக்கும் வாக்குமூலம் மட்டுமே ஆதாரமாக எடுத்துக்கொள்ளப்படும்.ஆனால் தடா சட்டப்படி காவல் துறையினரிடம் அளிக்கப்படும் வாக்குமூலங்களை நீதிமன்றங்கள் ஆதாரமாக ஏற்கவேண்டும்.இந்த வழக்கை பொறுத்தவரை காவல்துறையினர் குற்றம் சாட்டப்பட்டவர்களை அடித்து மிதித்து துன்புறுத்தி பெற்ற ஒப்புதல் வாக்குமூலங்கள் தவிர இவர்கள் மீது குற்றத்தை நிரூபிக்க எந்த ஆதாரத்தையும் சிறப்பு புலனாய்வு குழு நீதிமன்றத்தில் தாக்கல் செய்யவில்லை.இவ்வழக்கின் மேல்முறையீட்டில் தீர்ப்பளித்த உச்ச நீதி மன்றம் இவ்வழக்கிற்கு ''தடா''சட்டம் பொருந்தாது என கூறியுள்ளது. இருப்பினும் தடாவின் கீழ் பெறப்பட்ட ஒப்புதல் வாக்குமூலங்களை ஆதாரமாக கொண்டு வழங்கப்பட்ட தீர்ப்பு உறுதி செய்யப்பட்டுள்ளது. இது நீதியா,அநீதியா.


இந்த வழக்கை புலனாய்வு செய்த தலைமை புலனாய்வு அதிகாரி ரகோத்தமன் ''ராசீவை கொன்ற இடுப்புவார் வெடிகுண்டை [Belt bomb] செய்தது யார் என கண்டுபிடிக்க முடியவில்லை''என்கிறார். அப்படி யாரென்றே தெரியாத நபரிடம் பேரறிவாளன் மின்கலனை கொடுத்தார் என்பதை மட்டும் ''கண்டு பிடிக்கிறார்கள்''. யாருடன் சேர்ந்து கொலைசதியில் ஈடுபட்டார் என்றே சொல்ல முடியவில்லை.ஆனால் கொலைசதிக்காக சாவுத்தண்டனை வழங்குவேன் என்று சொன்னால் அது நீதியா,அநீதியா. 



செய்யாத கொலைக்கு 21 ஆண்டுகள் சிறைத்தண்டனை அனுபவித்த இந்த அப்பாவி தமிழர்களை,வாழ்வின் வசந்த காலமான இளமை பருவத்தை சிறை கொட்டடியின் இருண்ட மூலையில் தொலைத்து விட்டு நிற்கும் இந்த பரிதாபத்திற்கு உரிய அப்பாவி தமிழர்களை, மீண்டும் ஒரு தண்டனையாக தூக்கில் ஏற்றுவது நீதியா,அநீதியா.

இந்த தீர்ப்பு அநீதியானது.ஆகவே தமிழ் மக்கள் இந்த தீர்ப்பின்படி இந்த நிரபராதிகள் மூவரையும் தூக்கிலிட அனுமதிக்க முடியாது.

கருணாநிதியின் துரோகம்.

இம்மூவரையும் விடுவிக்க வேண்டும் என்று இப்போது வாய்கிழிய பேசும் கருணாதான் 2000 ஆம் ஆண்டு முதல்வர் என்ற முறையில் இவர்களின் கருணை மனுக்களை மறுதலிக்குமாறு ஆளுநருக்கு ஆலோசனை வழங்கினார் என்பதை நாம் மறக்கமுடியாது.அப்போது நளினிக்கு மட்டும் தண்டனை குறைப்பு செய்துவிட்டு இம்மூவரையும் கைவிட்டவர்தான் கருணா.செயலலிதா,சோ,சுப்ரமணியசாமி முதலான பார்ப்பன கும்பலின் ''இவர்களுக்கு கருணை காட்ட கூடாது'' என்ற வெறிக்கூச்சல் கொடுத்த அழுத்தத்திற்கு பணிந்து அன்று துரோகம் இழைத்துவிட்டு இன்று முதலை கண்ணீர் வடிக்கிறார்.அப்போது நளினிக்கு தண்டனை குறைப்பு செய்தததையே எதிர்த்தவர்தான் செயலலிதா என்பதும் மறக்க முடியாதது.

செயலலிதாவின் கபட நாடகம்.

மூன்று தமிழர்களை காப்பாற்றுமாறு தமிழக முதல்வர் என்ற முறையில் செயாவிடம் பலரும் கோரிக்கை வைத்தபோது தனக்கு அதிகாரமில்லை என அப்பட்டமாக புளுகினார் செயா.தூக்கு தண்டனையிலிருந்து ஒரு கைதியை காப்பதற்கு ஒரு மாநில அரசுக்கு முழு அதிகாரம் உண்டு என்பதை தெளிவு படுத்தும் வகையில் முன்னாள் உச்ச நீதிமன்ற நீதியரசர் V.R.கிருசுன அய்யர் சொல்வது.

''நீண்ட பல்லாண்டு முன்பு இந்தத் திருவனந்தபுரம் நகரத்தில் நான் உள்துறை அமைச்சராக இருந்தபோது... நாங்கள் பதவியேற்ற சிறிது காலத்திற்கெல்லாம் ஒரு வழக்கு என்னிடம் வந்தது. அவர் பெயர் சி.ஏ. பாலன் என்று நினைவு. அவருக்கு மரண தண்டனை விதிக்கப்பட்டிருந்தது. நான் மரண தண்டனையை எதிர்ப்பவன். இந்த பாலன் முன்பே மாநில ஆளுநருக்கு வேண்டுகோள் விண்ணப்பம் அனுப்பியிருந்தார். அது மறுக்கப்பட்டது. பிறகு குடியரசுத் தலைவருக்கு அனுப்பினார். அதுவும் மறுக்கப்பட்டது. பிறகு தான் 1957 ஏப்ரலில் நாங்கள் ஆட்சிக்கு வந்தோம். உள்துறை அமைச்சர் என்ற முறையில் என்னிடம் இந்த வழக்கு மறுபடியும் கொண்டு வரப்பட்டது. நான் சொன்னேன், இந்த மனிதரைத் தூக்கிலிடக்கூடாது. தூக்கைத் தூக்கிலிடு! இது என் உறுதியான நிலைப்பாடு.
உள்துறைக்குப் பொறுப்பு வகிக்கும் அமைச்சர் என்ற முறையில் நான் இந்த வழக்கை ஆளுநரின் பார்வைக்கு அனுப்பினேன். பாலனின் மரண தண்டனை குறைக்கப்பட வேண்டும் என்று எழுதி அனுப்பினேன். இதற்கிடையில் தில்லியிலிருந்து கடிதம் வந்தது. பாலனின் கருணை மனுவைக் குடியரசுத் தலைவர் முன்பே நிராகரித்து விட்டதால் ஆளுநர் இதனை மறுபரிசீலனை செய்ய முடியாது. அவருக்கு அந்த அதிகாரம் கிடையாது என்று!
மத்திய உள்துறை அமைச்சர் கோவிந்த வல்லப பந்த் எனக்கு எழுதினார். நான் அவருக்கு விடை எழுதினேன். வழக்கறிஞர், சட்டவியல் அறிஞர் என்ற முறையில் என்னால் புரிந்து கொள்ள முடிகிறது. ஒருங்கே குடியரசுத் தலைவருக்கும், மாநில ஆளுநருக்கும் இந்த அதிகாரம் உள்ளது. ஆனால்இந்த அதிகாரம் இப்போதும் தீர்ந்து போய்விடவில்லை. மறுப்பதற்குப் பயன்படுத்திய அதே அதிகாரத்தை மறுபரிசீலனை செய்வதற்கும் பயன்படுத்தலாமே! தூக்குத் தண்டனையை நிறைவேற்றக் கூடாது என்று பரிந்துரைக்கும் அதிகாரம் உள்துறை அமைச்சராகிய எனக்குள்ளது. அந்தப் பரிந்துரையை ஆளுநர் ஏற்றுக் கொள்ளத்தான் வேண்டும் என்று வாதிட்டேன். இதையொட்டிப் பெரும் சர்ச்சை எழுந்தது. தூக்கிலிட ஆணையிடும் அதிகாரம் குடியரசுத் தலைவருக்கு மட்டுமே உரியது என்பதால் அதை ஆளுநர் மாற்ற முடியாது என்பதற்கு எம்.சி. சத்தல்வாடு என்ற சட்ட வல்லுநரின் கருத்து எனக்கு எடுத்துக் காட்டப் பட்டது. மாற்ற முடியும் என்பதற்கு நான் எங்கள் அரசின் தலைமை வழக்குரைஞர் கே.வி.சூர்ய நாராயணய்யாவின் கருத்தைப் பெற்று அனுப்பி வைத்தேன். இது பெரும் சட்ட மோதலும் அரசியல் மோதலும் ஆகிவிட்டது.
நான் இதில் விடாப்பிடியாக உள்ளேன் என்பதை சி.பி.பந்த் பார்த்தார். அன்று நான் இளைஞன், கட்டுக்கடங்காதவன், அவர் அதற்கு ஒரு தீர்வு கண்டார்.
சொன்னார்: கிருஷ்ணய்யர், நீங்கள் எங்கள் பெயரைக் காப்பாற்றுங்கள். நாங்கள் உங்கள் நோக்கத்தை நிறைவேற்றி வைக்கிறோம். மரண தண்டனையைக் குறைக்கும்படி நீங்கள் எனக்கு எழுதுங்கள். நான் அதனை என் பரிந்துரையோடு குடியரசுத் தலைவருக்கு அனுப்பி வைக்கிறேன்.
இந்தப் பரிந்துரையை ஏற்றுச் செயல்படுவது தவிர குடியரசுத் தலைவருக்கு வேறு வழியில்லை. இப்படித்தான் உள்துறை, சட்டத்துறை அமைச்சர் என்ற முறையில் என் பதவிக் காலம் தொடங்கியது. குடியரசுத் தலைவரே தூக்கிலிட ஆணையிட்டுவிட்ட ஒருவரின் உயிரை, மரணப் பிடியிலிருந்து மீட்டுவர முடிந்தது. இது ஒரு வரலாற்றுப் பதிவு.''
- ‘மாண்டொழிக மரணதண்டனை’ நூலிலிருந்து.


முதல் நாள் அதிகாரம் இல்லை என மறுத்து எதுவும் செய்ய முடியாது என கை விரித்த செயா மறுநாள் அலறி அடித்துக்கொண்டு மூவரையும் விடுவிக்க வேண்டி தீர்மானம் கொண்டுவர அழுத்தியது தமிழ் மக்களின் வீரஞ்செறிந்த போராட்டங்கள்.தமிழகமே கொந்தளித்து எழுந்து போராடியது. தொடர்வண்டிகள் மறிக்கப்பட்டன,சாலை மறியல்,அரசு அலுவலகங்கள் முற்றுகை,ஆர்ப்பாட்டம்,உண்ணாநோன்பு என தமிழ்நாடு போர்க்கோலம் பூண்டது.ஆடி,அரண்டு போனது செயாவின் அரசு.மக்களை ஏய்த்து அமைதிபடுத்த சட்டமன்றத்தில் தீர்மானம் கொண்டுவந்தார்.ஆனால் அன்றே அந்த தீர்மானத்தின் யோக்கியதையை போட்டு உடைத்தார் நடுவண் சட்ட அமைச்சர்.''இந்த தீர்மானம் யாரையும் கட்டுபடுத்தாது''என்றார்.


ஆகவே நாம் செயாவை கோருவதெல்லாம் கண்துடைப்பு நாடகங்கள் வேண்டாம்.கிருசுன அய்யர் வழியில் செயல்பட்டு மூன்று அப்பாவி தமிழர்களை விடுவிக்க வேண்டும் என்பதுதான்.அதுவரை தமிழக மக்கள் போராட்டம் ஓயாது.

Wednesday, July 27, 2011

சமச்சீர் கல்வி.வெல்லட்டும் மாணவர் போராட்டம்.வீழட்டும் செயாவின் ஆணவம்.ஒழியட்டும் கல்விக் கொள்ளை.

உலகம் இதுவரை கண்டிராத அதிசயமாக கடந்த இரண்டு மாதங்களாக தமிழகத்தில் புத்தகம் எதுவுமின்றி பள்ளிகள் நடந்து வருகின்றன.புர்ர்ரட்சி தலைவி ஆட்சியல்லவா.இது போன்ற புரட்சிகள் இல்லாமல் போனால்தான் ஆச்சரியம்.

இந்தியாவிலேயே தமிழகத்தில் மட்டுமே மாநில அரசின் கட்டுப்பாட்டில் நான்கு வகையான பாடத்திட்டங்கள் பின்பற்றப் படுகின்றன.இதனை மாற்றி ஒரே வகையான பொது பாடத்திட்டத்தினை அறிமுகப் படுத்தும் முகமாக ''சமச்சீர் கல்வி சட்டம்''தி.மு.க அரசால் கொண்டுவரப்பட்டு கடந்த ஆண்டு முதல் மற்றும் ஆறாம் வகுப்புகளுக்கு பொது பாடத்திட்டம் அறிமுகப்படுத்தப் பட்டது.அப்போதே தனியார் பள்ளிகள் என்ற பெயரில் தமிழக மக்களை ஒட்ட சுரண்டி வரும் கொள்ளைக்கும்பல் உச்ச நீதிமன்றம் வரை சென்று சமச்சீர் கல்வியை தடை செய்ய முயன்றதும் நீதிமன்றங்கள் அவர்களை விரட்டி அடித்ததும் உங்களுக்கு நினைவிருக்கும்.அதனை தொடர்ந்து இந்த ஆண்டு அனைத்து வகுப்புகளுக்கும் பொது பாடத்திட்டம் கொண்டு வரப்படும் என அறிவிக்கப்பட்டு அதற்கான புத்தகங்கள் அனைத்தும் 200 கோடி உருவாக்கள் செலவில் அச்சிடப்பட்டு ஆயத்த நிலையில் உள்ளன.

இந்த நிலையில்தான் பார்ப்பன,பாசிச செயா ஆட்சிக்கு வருகிறார். கருணாநிதி எழுதிய பாடப்பகுதிகள் நீக்கப்படும் என செய்திகள் கசிகின்றன.ஆனால் சமச்சீர் கல்வியையே ரத்து செய்து சட்டத்திருத்தம் கொண்டுவந்தார் செயா.மனித உரிமை பாதுகாப்பு மையம்,சமூக ஆர்வலர்கள் அ.மார்க்சு போன்றோர் உயர்நீதிமன்றத்தில் வழக்கு தொடர்ந்ததும் செயா மேலும் மேலும் மூக்கறு பட்டதும் அண்மைய வரலாறு.

தனியார் பள்ளி முதலாளிகள் தங்கள் கொள்ளை தடைபடுகிறது என்று சமச்சீர் கல்வியை எதிர்க்கின்றார்கள் என்றால் ஆளும் பார்ப்பன கும்பல் பார்ப்பனிய ஆதிக்கத்தை கேள்விக்குள்ளாக்கிய பெரியாரும் திராவிட இயக்க வரலாறும் அந்த பாடத்திட்டத்தில் இடம் பெறுவதால் தடை செய்ய துடிக்கிறார்கள்.

பொது பாடத்திட்டத்தின் கீழ் அரசு வெளியிடும் புத்தகங்களை வாங்குவதற்கு ஒரு மாணவனுக்கு ஓரிரு நூறு உருவாக்கள் போதும். ஆனால் பதின்ம [matriculation] மற்றும் ஆங்கிலோ இந்தியன் பாடத்திட்டத்தின்படி ஒரு மாணவனுக்கான புத்தகங்கள் வாங்க சில ஆயிரங்கள் வேண்டும்.தமிழ்நாட்டில் எத்தனை லட்சம் பேர் இந்த பாடத்திட்டங்களில் படிக்கிறார்கள் என்ற பின்னணியில் எண்ணிப்பார்த்தால் புத்தக விற்பனையில் மட்டும் கல்விக் கொள்ளையர்கள் எத்தனை கோடிகளை கொள்ளையிடுகிறார்கள் என்பது தெளிவாகும்.

ஆளும் பார்ப்பன கும்பல் கருணாநிதியை எளிதாக பாடத்திட்டத்திலிருந்து தூக்கியடிக்க முடியும் என்றாலும் பெரியாரையும் அப்படி தூக்கி எறிந்தால் தமிழ் மக்களிடம் அம்பலப்பட்டு போவோம்,நமது உண்மை முகத்தை வெளிச்சம் போட்டு காட்டினாற போல் ஆகி விடும் என்பதால் மொத்தமாக சமச்சீர் கல்வியையே ஊத்தி மூட எத்தணிக்கிறார்கள்.

செயா அரசின் இந்த எதேச்சதிகார போக்கை எதிர்த்து நீதிமன்ற ஆணையிட்டதற்கிணங்க சமச்சீர் புத்தகங்களை வழங்க கோரி மாணவர்கள் கடந்த சில நாட்களாக போராடி வருகின்றனர்.மாணவர்களை திரட்டி போராடும் புரட்சிகர மாணவர் இளைஞர் முன்னணி,இந்திய மாணவர் சங்கம் முதலான அமைப்புகளை வாழ்த்தி அவர்கள் போராட்டத்தை ஆதரித்து வெற்றி பெற செய்ய வேண்டிய கடமை தமிழ் மக்களின் முன் உள்ளது.ஆகவே மாணவர் போராட்டங்களை ஆதரிப்போம்.

வெல்லட்டும் மாணவர் போராட்டம்.
வீழட்டும் செயாவின் ஆணவம்.
ஒழியட்டும் கல்விக் கொள்ளை.
மலரட்டும் கல்வியில் சமத்துவம்.



Tuesday, July 12, 2011

புர்ர்ரட்சித்தலைவியின் பொற்கால தாக்குதல்.3900 கோடிக்கு வரி உயர்வு.


தமிழக அரசு தமிழகத்தில் விற்பனையாகும் பொருட்களின் மீதான மதிப்பு கூட்டு வரி விகிதங்களை கடுமையாக உயர்த்தியுள்ளது.ஏதாவது ஒரு கண்மாயிலிருந்து பாசனத்திற்கு தண்ணீர் திறந்து விடுவதாக இருந்தால் கூட செயலலிதாவின் பேரில் ஆணை வெளியாவது வழக்கம்.ஆனால் தமிழக மக்களிடமிருந்து 3900 கோடி உருவாக்களை கொள்ளையிடும் இந்த வரி உயர்வை நிதித்துறை செயலாளர் அறிவித்துள்ளார்.

முந்தைய அரசு ஒரு இலட்சம் கோடி கடன் வைத்து விட்டு போயிருப்பதால் அரசு நிதி திரட்டுவதற்கு இந்த வரி உயர்வு ''அவசியம்''என்று இந்த கொள்ளையை நியாயப்படுத்தும் அவர் நான்கு விழுக்காடு வரி விதிக்கப்பட்ட பொருட்கள் மீது இனி ஐந்து விழுக்காடு வரி விதிக்கப்படும்  என்றும் 12 .5 விழுக்காடு விதிக்கப்பட்ட பொருட்கள் மீது 15 விழுக்காடு வரி விதிக்கப்படும் என்றும் அறிவித்துள்ளார்.மேலும் கைப்பேசி முதலான மின்னணு பொருட்கள் மீதான வரி நான்கு விழுக்காட்டிலிருந்து 20 விழுக்காடாக உயர்த்தப்பட்டுள்ளது.இது வரை வரிவிலக்கு அளிக்கப்பட்டு வந்த துணி விற்பனையின் மீது இனி ஐந்து விழுக்காடு வரி விதிக்கப்படும்.ஆக மொத்தத்தில் 3900 கோடி அளவுக்கு அரசுக்கு கூடுதல் வருமானம் கிட்டப் போகிறது என்று குதூகலிக்கிறது ஆளும் கும்பல்.

ஏற்கனவே கடும் விலை உயர்வினால் வாழ்க்கையை நகர்த்த அல்லாடிக்கொண்டிருக்கும் மக்கள் மீது இந்த வரி உயர்வு மேலும் கடும் சுமையை ஏற்றுகிறது.இந்த வரி உயர்வு மேலும் விலைவாசி உயர்வதற்கே வழி வகுக்கும்.விலைவாசியை குறைப்பேன் என்று சொல்லி வாக்குகள் வாங்கி ஆட்சியை பிடித்த செயா மக்களின் முதுகில் குத்துகிறார்.வரிகள் எதையும் வணிகர்களோ,ஆலை முதலாளிகளோ தங்கள் சொந்த காசை போட்டு கட்டுவதில்லை.மக்களிடமிருந்து வசூலித்துத்தான் கட்டுகிறார்கள்.ஆக இந்த  3900 கோடி பணத்தை மக்களிடமிருந்து வழிப்பறி செய்கிறார் செயா.

ஒரு இலட்சம் கோடி கடன் இருப்பதை காட்டி இந்த பகற்கொள்ளையை நியாயப்படுத்த பல ''பொருளாதாரப் புலிகள்''கிளம்பி இணைய வலைத்தளங்களில் வலம் வருவார்கள்.
பொருளாதார நெறிமுறைகள் [fiscal norms ] பற்றி நமக்கு பாடம் நடத்துவார்கள்.அவர்களுக்கு நமது எளிய விளக்கம்.இப்போது என்ன அரசுக்கு கொஞ்சமாகவா வருவாய் வருகிறது.இருப்பதை கொண்டு சிறப்புற வாழலாம்.செயா புதிய கடன்கள் வாங்காமல் இருந்தாலே போதும்.இருக்கும் வருவாயை கொண்டு எளிதாக இந்த கடன் சுமையை சமாளிக்கலாம்.

தொடர்புடைய பதிவு.
செயலலிதா ஆட்சி வேறு எப்படி இருக்கும்.மூன்றாம் இருண்ட காலம்தான்.
http://thippuindia.blogspot.com/2011/05/blog-post_14.html

Sunday, July 3, 2011

இந்தி படிக்காததால் தமிழினம் இழந்தது என்ன.




எதையும் இழக்கவில்லை.ஆனால் இந்தி படிக்க விடாமல் ஒரு தலைமுறையையே திராவிட இயக்க அரசியல் பாழ்படுத்திவிட்டதாக   ஒரு கள்ளப்பரப்புரை தமிழகத்தில் கமுக்கமாக நடந்து கொண்டிருக்கிறது.


பேருந்துக்கு காத்திருக்கும் நேரங்களில்,தொடர் வண்டி பயணங்களில், முதன்மையாக பள்ளிக்கூடங்களில் காத்திருக்கும் பெற்றோர்கள் இடையே இந்த முட்டாள்தனமான வாதத்தை மிகுந்த அறிவாளி போன்ற நினைப்பில் பலரும் உளறிக்கொண்டு இருப்பதை நீங்களும் கேட்டிருக்க கூடும்.


''அரக்கோணம் தாண்டி வட நாட்டு பக்கம் போக முடியல சார்''


''அவன் இங்கிலிசு தெரிஞ்சாலும் இந்திலதாங்க பேசுறான்''


''கருணாநிதி பாருங்க உசாரா பேரப்புள்ளைங்கள இந்தி படிக்க வச்சு சென்ட்ரல் மினிஸ்டர் ஆக்கிட்டாரு''


''நாமதாங்க இந்தி படிக்காம வீணா போயிட்டோம் ''


இது போன்ற பல்வேறு ''அறிவார்ந்த''கருத்துக்களை மழையாக பொழிந்து அவர்கள் சொல்ல வரும் நீதி என்னவென்றால் இந்தி படித்தால் தமிழ் இளைஞர்களுக்கு இந்தியா முழுவதும் வேலை வாய்ப்பு உண்டு. இந்தியாவில் எங்கு வேண்டுமானாலும் போய் தொழில் செய்து பிழைத்துக் கொள்ளலாம்.வட நாட்டிலிருந்து பொருட்கள் தருவித்து வணிகம் செய்து சம்பாதிக்கலாம்.  


ஆனால் எதார்த்தம் என்னவென்று எண்ணிப்பார்த்தால் இந்த நச்சுப் பரப்புரையை மேற்கொள்ளும் தமிழினப் பகைவர்கள் முகத்தில் வரலாறு கரி பூசிக்கொண்டிருக்கிறது.


வேலை வாய்ப்பை எடுத்துக்கொண்டால் இந்தி படிப்பதன் மூலம் வடஇந்தியாவில் வேலை கிடைக்கும் எனபது ஏமாற்று வேலை.இந்தி பேசும் உ.பி. பிகார் போன்ற மாநிலங்களில் வறுமையும் வேலை இல்லா திண்டாட்டமும் தலை விரித்து ஆடுகிறது.இந்தியை தாய்மொழியாக கொண்டவனே வேலையின்றி தெருவில் அலையும்போது இந்தி கற்ற தமிழ் இளைஞர்கள் வடமாநிலங்களில் வேலை பெறுவது குதிரைக்கு கொம்பு முளைத்த கதையாக அல்லவா இருக்கும்.


இப்போது தமிழகமெங்கும் வட இந்தியாவை சேர்ந்த இந்தி பேசும் தொழிலாளர்கள் வேலை செய்கிறார்கள்.கட்டுமான வேலை,சாலை போடுதல், மேம்பாலம் கட்டுதல்,மாநகர தொடர்வண்டி [metro rail] .பல்வேறு தொழிற்சாலைகள் ஆகிய துறைகளில் அவர்கள் வேலை செய்வதை பார்க்கிறோம்.தங்கள் வேர்வையையும் குருதியையும் சிந்தி நம் தமிழ் மண்ணை வளப்படுத்தும் அந்த தொழிலாள தோழர்களை நாம் நெஞ்சார தழுவி வரவேற்கிறோம்.தமிழினம் அவர்களை தங்களில் ஒருவராகவே ஏற்றுக் கொண்டுள்ளது.உடலுழைப்பு தொழிலாளர்கள் மட்டுமல்ல தகவல் தொழில் நுட்பம்,வணிக நோக்கிலான பெரும் மருத்துவ மனைகள், பெரிய கட்டுமான நிறுவனங்கள் போன்ற துறைகளிலும் வட இந்திய மூளை உழைப்பு தொழிலாளர்களை நாம் காண்கிறோம்.அப்படியானால் யார் யாருக்கு வேலை போட்டு கொடுத்திருக்கிறார்கள்.எண்ணிப்பாருங்கள் இந்தி படித்தால் வேலை கிடைக்கும் என்பதை விட பெரிய மோசடி எதுவும் இருக்க முடியுமா.


இந்தி படிக்காத இந்த தலைமுறையில் எத்தனை தமிழர்கள் மும்பை, தில்லி, கொல்கத்தா போன்ற வட இந்திய நகரங்களில் பிழைப்பு தேடி குடியமர்ந்திருக்கிறார்கள்.பள்ளியில் இந்தி கற்காத இவர்கள் இப்போது சரளமாக இந்தி பேசுகிறார்களே எப்படி.அவர்கள் யாரும் தி.நகரில் இருக்கும் ''இந்தி பிரச்சார சபா''நடத்தும் பாடங்களை படித்து தேர்வெழுதி அம்மொழியை கற்றுக்கொள்ளவில்லை.மாறாக வாழ்வியல் தேவைகளே அவர்களுக்கு இந்தியை கற்பித்துள்ளது.இங்கு வந்து வேலை செய்யும் வட நாட்டவர் தமிழை கற்றுக்கொண்டு பேசுகிறார்களே.அது போலத்தான். 
வட நாட்டவருடன் வணிகத்தொடர்புக்காக இந்தி கற்பது என்பதும் ஒரு சிலரின் தேவைதான்.அந்த வகையில்தான் பள்ளிகளில் இந்தி கற்காத தமிழர்கள் பலரும் வணிக தேவைகளுக்காக சரளமாக அம்மொழியை பேசும் திறனை தற்போது பெற்றிருக்கிறார்கள்.அதே போல் வட இந்திய வணிகர்கள் பலரும் தமிழ் பேசுகிறார்கள்.தேவை உள்ளவன் இந்தியோ தமிழோ எந்த மொழியையும் கற்றுக்கொள்கிறான்.அதற்காக அனைத்து மாணவர்களையும் இந்தி கற்க சொல்வது பள்ளிக்கல்வியை மேலும் சுமையாக்கும் கயமையல்லவா.தமிழக மக்கள் என்ன இந்தியாவில் இரண்டாந்தர குடி மக்களா.அவர்கள் மட்டும் இந்தி,ஆங்கிலம் என்று இரண்டு அந்நிய மொழிகளை கற்க வேண்டுமா.இந்தியை தாய்மொழியாக கொண்டவர்கள் தாய் மொழியுடன் சேர்த்து ஆங்கிலம் என்ற ஒரு அந்நிய மொழியை மட்டும் கற்றுக்கொண்டால் போதும் என்றால் நமக்கும் தமிழுடன் சேர்த்து ஆங்கிலம் மட்டும் போதுமே.


இந்தி படிக்காத இந்த தலைமுறையில்தான் தமிழ் நாட்டு மருத்துவ கல்லூரிகளில் உலகத் தரத்திலான மருத்துவர்கள் உருவாகி இருக்கிறார்கள்.இந்தி படிக்காத காரணத்தினால் தமிழக பொறியியல் உருவாக்கும் பொறியாளர்கள் சோடை போய் விட்டார்கள் என்று சொல்ல முடியுமா.இந்தி படிக்காத கடந்த நாற்பது ஆண்டுகளில் தமிழகம் தொழில் வளர்ச்சியில் இந்தி பேசும் மாநிலங்களை விட கூடுதலாக சாதித்துள்ளது. 


தயாநிதி மாறன் நடுவண் அமைச்சர் ஆகியிருப்பதற்கும் இந்திக்கும் என்ன தொடர்பு.இந்திய அரசியலை பீடித்திருக்கும் வாரிசு அரசியல்தான் அதற்கு காரணமேயன்றி இந்தி ஒரு காரணமேயல்ல.அதனால்தான் ஆங்கிலம்,இந்தி ஆகிய இரண்டு மொழிகளுமே அறியாத அழகிரியும் அமைச்சர் ஆகியுள்ளார்.ஆனால் இந்தியை தூக்கிப் பிடிக்கும் அடிமைப்புத்தி கொண்டோர் அழகிரி அமைச்சர் ஆகியிருப்பதை வசதியாக மறந்து விடுவார்கள்.


இவற்றையெல்லாம் கருத்தில் கொள்ளாமல் தமிழின பகைவர்கள் கிளப்பிவிடும் ஆதாரமற்ற நச்சுக கருத்துகளை நம்மவர்களும் ஏற்றுக் கொண்டு உளறிதிரிவதுதான் நம்மை வருத்தமுற செய்கிறது.அதுவும் எப்படி.


''நம்ம எப்பவுமே கவர்மென்ட் பசுல போறதில்லைங்க k.p.n. மட்டும்தான்''
இப்படி பெருமை பேசும் அளவுக்கு வசதியாக இருப்பவர்கள்தான், குழந்தையை ஆண்டுக்கு பல ஆயிரம் செலவழித்து மழலையர் பள்ளியில் படிக்க வைத்துவிட்டு,குளிர் பதனம் செய்யப்பட்ட தொடர் வண்டி பெட்டியில் அமர்ந்து கொண்டு இந்தி படிக்காத காரணத்தால் பின் தங்கி விட்டதாக வருந்துகிறார்கள்.

Saturday, May 21, 2011

கலைஞரே நீங்களுமா மூட நம்பிக்கையை வளர்ப்பது.

தமிழ் தொலைக்காட்சிகளில் மூடநம்பிக்கைகளை வளர்க்கும் நிகழ்ச்சிகள் ஏராளம்.அதில் நாங்களும் சளைத்தவர்கள் இல்லை என காட்டிக்கொள்ளும்  கலைஞர் தொலைக்காட்சியில் இன்று missed call என்ற பேய்ப்படம் மீண்டும் ஒளிபரப்பப்பட்டது.ஈரோட்டுப் பாசறையில் பயின்ற பெரியாரின் மாணவன் என பெருமையாக சொல்லிக்கொள்ளும் கருணாநிதியின் பெயரில் நடைபெறும் தொலைக்காட்சியில் மக்களிடம் மூடநம்பிக்கையை விதைக்கும் பேய்ப்படங்கள் ஒளிபரப்பாவது என்ன ஒரு நகைமுரண்.

இந்த படம் முன்பொரு முறை ஒளிபரப்பப்பட்ட போது நமது வலைப்பூவில் வெளியான அது குறித்த கட்டுரையை மீள்பதிவு செய்கிறோம்.



புத்தம் புதிய பேய்கள்

அண்மையில் ஒரு நாள் இரவு கலைஞர் தொலைக்காட்சியை பார்க்க நேரிட்டது. திகில் படம் என்ற பெயரில் பேய் படம் ஒன்று ஓடிக்கொண்டிருந்தது.கல்வி நிறுவனம் ஒன்றில் பயிலும் ஒரு நண்பர் குழாமை சேர்ந்தவர்களை ஒரு பேய் ஒவ்வொருத்தராக கொலை செய்கிறது.கொல்லப்பட இருக்கிறவருக்கு அவரது அலைபேசியில் தவறிய அழைப்பு /missed call / ஒன்று வருகிறது.அதற்கான  குரல் செய்தியில் அவர் சாகப்போகும் நேரமும் அப்போது நடைபெற உள்ள உரையாடலும் இடம் பெற்றுள்ளன.அவ்வாறே அவர் பேயால் கொல்லப்படுகிறார். 

முற்காலத்தில் மனிதன் கால்நடையாகவும் மாட்டுவண்டியிலும் பயணித்து கொண்டிருந்தபோது சாலை ஓர புளியமரத்தில் குடியிருந்து கொண்டு அவனை மிரட்டி கொண்டிருந்த பேய்கள் இப்போது நகரங்களுக்கு இடம் பெயர்ந்து அலைபேசி முதலான நவீன கருவிகளையும் கையாள துவங்கியுள்ளன.நல்ல முன்னேற்றம்தான்.                                                                              

பேய் என்று ஒன்று உண்மையில் இருக்கிறதா என்ற கேள்விக்கு விடை காணும் முன் கலைஞரிடம் 
சில 
கேள்விகள் .

ஒரு மாநில முதல்வரான நீங்கள் மக்களிடையே அறிவியல் கண்ணோட்டத்தை வளர்ப்பதை விடுத்து இப்படி மூட நம்பிக்கைகளை வளர்க்க துணை போகலாமா.

பகுத்தறிவு பரப்புரையால் ஈர்க்கப்பட்டு பொது வாழ்வுக்கு வந்த பெரியாரின் மாணவரான உங்கள் பெயரில் நடைபெறும் தொலைக்காட்சியில் பேய்படம் போடுவது உங்கள் 'நெஞ்சுக்கு நீதி'யாக இருக்கிறதா. 

சரி பேய் இருக்கிறதா என்ற கேள்விக்கு வருவோம்.அகால இறப்பு எய்தியவர்கள்,தற்கொலை செய்து கொண்டவர்கள்,விபத்தில் இறந்தவர்கள் போன்றோர்   பேயாக மாறி உலவுகின்றனர் என்பது மக்களிடையே நிலவும் மூடநம்பிக்கை.அவை தனியாக மாட்டும் மனிதர்களை ஒரே அறையில் கொன்று விடுமாம்.நாம் கேட்கிறோம்.உயிரோடு இருக்கும் மனிதனே உணவு உட்கொள்வதால் மட்டுமே இயங்கும் ஆற்றலை பெறுகிறான்.செத்து போன பின் எதை தின்று பேயாக உயிர் வாழ்கிறான்.ஒரே அறையில் கொன்று விடும் வலு பேய்க்கு எங்கிருந்து வருகிறது,அவ்வளவு வலுமிக்க பேய் தனியாக இருக்கும் மனிதனிடம் மட்டும் வீரத்தை காட்டுவது ஏன்.இரண்டு மூன்று மனிதர்கள் சேர்ந்து இருக்கும் இடத்துக்கு அந்த வீரப்பேய்கள் ஏன் வருவதில்லை.

காரணம் உண்மையில் பேய் என்று உலகில் எதுவும் கிடையாது.மனிதனின் அடிமனதில் தங்கியுள்ள  பேய் குறித்து கேள்விப்பட்ட  கட்டுகதைகள் ஊட்டும் பீதியே சில அசாதாரணமான சூழல்களில் அவனது இதய துடிப்பை இயல்பை விட பன்மடங்கு   கூட வைக்கிறது.அந்த வேகத்தை தாங்க முடியாமல் குருதி குழாய்கள் வெடித்து இறப்பு நிகழ்கிறது.இதுதான் 'பேய் அறைந்து' வந்த சாவு. 

இறுதியாக தமிழக சிற்றூர் ஒன்றில் ஒரு மூதாட்டி பேயை நேரில் பார்த்த உண்மை நிகழ்வை கூறி கட்டுரையை நிறைவு செய்கிறோம்.அதிகாலை நேரம்.இருள் பிரியும் முன்பாகவே தமது புஞ்சை காட்டை நோக்கி நடந்து கொண்டிருந்தார் அந்த மூதாட்டி.அக்கம் பக்கம் ஆள் அரவம் ஏதுமில்லை.ஊர் கோடியை தாண்டியவுடன் ஒரு ஒலி.இரும்பு உலக்கையை தரையில் போட்டு உருட்டினாற்போல் பயங்கர ஓசை.ஓசை வந்த திசையில் ஏறிட்டு பார்த்தால் ஒரு ஒற்றை பனை மரத்தின் உச்சியில்  ஒரு மனித உருவம் தொங்கியபடி பாட்டியை நோக்கி கால்களை ஆவேசமாக அசைத்து கொண்டிருந்தது.அலறி அடித்துக்கொண்டு பாட்டி வீட்டுக்கு திரும்பி ஓடினார்.ஓட்டமும் நடையுமாக வீடு வநது சேர்ந்த பாட்டி அவசரமாக வீட்டுக்குள் நுழைந்து கதவை தாழிட்டுக் கொண்டார்.பாட்டிக்கு பயத்தில் நெஞ்சே வெடித்து விடும் போலிருந்தது.இதயம் தொண்டை குழி வரை வநது துடித்தது.அப்படியே கதவில் சாய்ந்து உட்கார்ந்து விட்டார்.அரை மயக்க நிலையில் எவ்வளவு நேரம் அப்படியே உட்கார்ந்திருந்தோம் என பாட்டிக்கே தெரியவில்லை.பாட்டிக்கு மூச்சு சீராகி முழுமையாக தன்னினைவு திரும்பிய போது நன்றாக விடிந்து விட்டிருந்தது.வெளியே ஆள் நடமாட்டமும் பேச்சு குரலும் கேட்க ஆரம்பித்திருந்தது.சற்றே பயம் விலகி பாட்டி வெளியே வந்தார்.ஆள் நடமாட்டம் தந்த துணிச்சலில்   மீண்டும் காட்டை நோக்கி நடக்க ஆரம்பித்தார்.குறிப்பிட்ட இடம் வந்தவுடன் அந்த பனை மரத்தை பயம் கலந்த ஆர்வத்தோடு பார்த்தார்.பனையின் மேல்பகுதியில் இரண்டு பழுத்த மட்டைகள் பிய்ந்து தொங்கிகொண்டிருந்தன.காற்றில் ஆடிய அம்மட்டைகளின்  நுனிப்பகுதியில்  இருந்த ஓலைகள் இரும்பு உலக்கையை தரையில் போட்டு உருட்டினாற்போல் ஓசை எழுப்பி கொண்டிருந்தன.

Friday, May 20, 2011

சாதி,மத வாரியான மக்கள் தொகை கணக்கெடுப்பு.வரவேற்கத்தக்கது.

2011 ஆம் ஆண்டில் நடத்தப்படும் மக்கள் தொகை கணக்கெடுப்பு சாதி,மத வாரியாக நடத்தப்படும் என தகவல் மற்றும் ஒலிபரப்புத்துறை நடுவண் அமைச்சர் அம்பிகா சோனி அறிவித்துள்ளார்.இது தொடர்பாக நடுவண் அமைச்சரவை எடுத்துள்ள முடிவை செய்தியாளர்களிடம் அறிவித்த அமைச்சர் மக்கள் தொகை கணக்கெடுக்கப் படும்போது வறுமைக்கோட்டிற்கு கீழே வாழும் மக்களின் எண்ணிக்கை,குடிமகன்களின் பொருளாதார,கல்வி,சாதி,மதம் முதலான அனைத்து விவரங்களும் சேகரிக்கப்படும் என தெரிவித்துள்ளார்.

சமூக நீதி ஆர்வலர்களின் நீண்ட நாள் கோரிக்கையான சாதி,மத வாரி மக்கள் தொகை கணக்கெடுப்பு இப்போது நிறைவேறுகிறது.இதன்மூலம் சாதி சங்கங்கள் மனம் போன போக்கில் சொல்லிவந்த அவர்கள் சாதியினர் குறித்த எண்ணிக்கையின் உண்மை நிலவரம் இப்போது தெரிந்து விடும். [சாதி சங்கங்கள் சொல்லிவரும் கணக்குப்படி பார்த்தால் தமிழ்நாட்டின் மக்கள் தொகை 15 கோடியைத் தாண்டும்] இக்கணக்கெடுப்பின் மூலம் ஒவ்வொரு சமூகத்தின் வளர்ந்த நிலையோ,பின்தங்கிய நிலையோ துல்லியமாக தெரிய வாய்ப்பிருப்பதால் பின்தங்கியோரை கைதூக்கி விடுவதற்கான திட்டங்கள் வகுத்து செயல்பட ஏதுவாக இருக்கும். 

சமூக ரீதியாக பின்தங்கியோருக்கு வழங்கப்படும் இடஒதுக்கீடுக்கு எதிராக நஞ்சு கக்கும் பார்ப்பனிய கள்ளப்பரப்புரையை எதிர்கொள்ள சமூக நீதி ஆதரவாளர்களுக்கு இக்கணக்கெடுப்பு பல ஆயுதங்களை வழங்கும். இடஒதுக்கீடு அளிக்கப்பட்டாலும் தாழ்த்தப்பட்ட,பிற்படுத்தப்பட்ட மக்கள் பார்ப்பன,மேல்சாதியினருடன் ஒப்பிடுகையில் எந்த அளவுக்கு பின்தங்கியுள்ளார்கள் என்பதை அறிந்து கொள்ள வாய்ப்பு கிடைக்கும். ஒட்டு மொத்த மக்கள் தொகையில் கணிசமான பகுதியினரை வருமின் கோரப்பிடியில் சிக்க வைத்துவிட்டு நாடு முன்னேறும் என எதிர்பார்ப்பது வண்டிக்கு பின்னல் குதிரையை கட்டுவதற்கு ஒப்பானது.அந்த வண்டி ஓடவே ஓடாது.அந்த நாடு முன்னேறவே முடியாது.ஆகவே இடஒதுக்கீடு ஒடுக்கப்பட்ட மக்களுக்கு அளிக்கப்படும் சலுகையல்ல அது அவர்களின் உரிமை என்பதை உரத்து சொல்ல வேண்டிய அவசியத்தை ஏற்படுத்தும்.

மேலும் இந்தியாவில் இசுலாமிய மக்கள் தொகை வெகுவேகமாக பெருகி வருகிறது என்ற சங் பரிவார் கும்பலின் கள்ளப்பரப்புரையையும் இந்த மக்கள் தொகை கணக்கெடுப்பு முறியடிக்கும் என எதிர் பார்க்கலாம். 

வகுப்புவாத வெறியர்களின் கள்ளப்பரப்புரை எப்படி உள்ளது பாருங்கள்.
முசுலிம்கள் நான்கு மனைவி வரை மணம் முடித்து ஏராளமாக குழந்தை பெற்று கொள்கிறார்கள்.ஒரு மனைவி என்றாலும் நிறைய குழந்தைகள் பெறுகிறார்கள்.

எதார்த்த வாழ்வில் நாம் சந்திக்கும் இசுலாமியர்கள் இப்படியா இருக்கிறார்கள் என உண்மை நிலவரத்தை அறிவின் துணைகொண்டு ஆராய்ந்து பார்க்காமல் இந்த கள்ளப்பரப்புரையை அப்படியே நம்பும் மடமையும் ஒழியலாம்.

ஆக மொத்தத்தில் சாதி,மத வாரியான மக்கள் தொகை கணக்கெடுப்பு.வரவேற்கத்தக்கது.வரவேற்போம். கணக்கெடுப்பாளர்களுக்கு முழு ஒத்துழைப்பு அளிப்போம்.


Wednesday, May 18, 2011

பூனையின் தோழன் பாலுக்கு காவலா. மோடியை கொண்டாடும் செயா மதசார்பற்ற முதல்வரா.

Gujarat Chief Minister Narendra Modi greets Tamil Nadu Chief Minister Jayalalithaa after the swearing-in ceremony in Chennai on Monday.— PHOTO: PTI/ R. Senthil Kumar
உங்க அளவுக்கு முடியாது மோடி.
ஏதோ தமிழ் நாட்டுக்கு ஏற்றமுறையில் 
முசுலிம்களை ஒரு வழி பண்ணிடுறேன்.

செயலலிதா தான் ஒரு அப்பட்டமான பார்ப்பன பாசிச வெறி கொண்ட இந்துத்வா அரசியல்வாதி என அடையாளம் காட்டிக்கொள்ள ஒரு போதும் தயங்கியதில்லை.தமிழகத்தின் பார்ப்பனிய எதிர்ப்பு திராவிட அரசியல் பாரம்பரியம் காரணமாக தமது இந்துத்வ கொள்கைகளை வெளிப்படையாக செயல்படுத்த முடியாமல் செயா சற்றே அடக்கி வாசிக்கிறார்.இல்லையேல் அ.தி.மு.க.வை எப்போதோ தமிழகத்தின் சிவசேனாவாக மாற்றி இருப்பார். அப்படி இருந்தும் கூட இந்துத்வா அரசியலை இலை மறைவு காய் மறைவாக கடைபிடிக்க அவர் தயங்குவதில்லை.

அதற்கான சான்றுகள் தேடி எங்கும் அலைய வேண்டியதில்லை.கடந்த இரு பத்தாண்டுகளில் நிகழ்ந்த நிகழ்வுகளை சற்றே நினைவு படுத்திப் பார்த்தாலே போதும்.

சான்று.1.பாபர் மசூதி இடிப்புக்கு முன்பாக நடைபெற்ற ''நாட்டு ஒருமைப்பாட்டு அவை''கூட்டத்தில் பாபர் மசூதி வளாகத்தில் கர சேவை நடைபெற அனுமதிக்க வேண்டும் என்று கோரிய பா.ச.க.அல்லாத அரசியல் கட்சித்தலைவர் ஒரே ஒருவர்தான்.அவர் வேறு யாருமல்ல.''நான் பாப்பாத்திதான் என்னை யாரும் ஆட்டவோ அசைக்கவோ முடியாது'' என்று தமிழக சட்டப்பேரவையில் அறிவித்த செயாவேதான்.

பாபர் மசூதி விவகாரத்தை காட்டி நாடெங்கும் இந்து மத வெறி நஞ்சை விதைக்கும் நோக்கத்துடன் சங் பரிவார் கும்பல் நடத்திய செங்கல் பூசை ஊர்வலம்,அத்வானியின் ரத யாத்திரை காரணமாக நாடெங்கும் முசுலிம்களுக்கு எதிரான கலவரங்கள் நடத்தப்பட்டு பல ஆயிரம் முசுலிம்கள் கொன்று குவிக்கப்பட்டனர்.அது குறித்து எந்த மன உறுத்தலும் இன்றி சங் பரிவார் கும்பல் மேலும் வகுப்பு கலவரங்கள் நடத்த ஏதுவாக பாபர் மசூதி இடிப்புக்கு வழிவகுக்கும் வகையில் கரசேவை நடத்த அனுமதிக்க கோரிய கல்நெஞ்சக்காரர்தான் செயா. 

2.பாபர் மசூதி இடிப்புக்கு தமிழகத்திலிருந்தும் குண்டர்களை திரட்டி அனுப்பியவர்தான் செயா.

3.2002 ஆம் ஆண்டு இந்திய வரலாறு கண்டிராத வகையில் ஒரு மாநில அரசே திட்டமிட்டு நடத்திய வகுப்பு கலவரம்தான் குசராத் முசுலிம் இனப்படுகொலை.அந்த இனப்படுகொலையை தொடர்ந்து நடந்த சட்டமன்ற தேர்தலில் தூண்டிவிட்ட மதவெறி நெருப்பின் துணை கொண்டு வெற்றி பெற்றார் கொலைபாதகன் மோடி.அப்போது மோடியின் பதவியேற்பு விழாவுக்கு ஓடோடிச்சென்று கலந்து கொண்டு வாழ்த்தி மகிழ்ந்தவர்தான் அன்றைய தமிழக முதல்வர் செயா.அப்போது அவர் பா.ச.க.வுடன் கூட்டணி ஒன்றும் அமைத்திருக்கவில்லை.மாறாக அவரது பிறவி எதிரி தி.மு.க.தான் பா.ச.க.வுடன் கூட்டணி கட்டிக் கொண்டு தில்லியில் பதவி சுகம் அனுபவித்துக் கொண்டிருந்தது.ஆனாலும் அவரை அந்த விழாவில் கலந்து கொள்ளுமாறு உந்தித் தள்ளியது எது.வேறென்னவாக இருக்க முடியும் அவரது பார்ப்பனிய இந்து மத வெறியைத்தவிர.


இதன்மூலமாக அவர் தெரிவித்த,தெரிவிக்கும் செய்தி என்ன.


''சந்தர்ப்பமும் சூழ்நிலையும் ஏதுவாக அமைந்தால் இது போன்ற ஒரு முசுலிம் இனப்படுகொலையை எனது அரசு மூலமாக நானும் நடத்துவேன்'' இதுதான் அவரது செய்தி.


4.தமிழகத்தில் செல்லாக்காசாக கிடந்த பாரதிய சனதா கட்சியை 1998 நாடாளுமன்ற தேர்தலின்போது கூட்டணியில் சேர்த்து அக்கட்சிக்கு தமிழகத்தில் ஒரு முகவரி ஏற்படுத்தி கொடுத்தவர் செயலலிதா.சமய நல்லிணக்கத்துக்கு பெயர் பெற்ற தமிழகத்தின் அமைதியை கெடுக்க பா.ச.க என்ற நச்சு செடிக்கு நீர் ஊற்றினார்.

மேலும் செயா ஒரு கபடவேடதாரி என்பதற்கு பா.ச.கவுடனான அவரது உறவும் ஒரு சான்று.1999 ஆம் ஆண்டு சென்னை கடற்கரையில் பிளவு படாத த.மு.மு.க.நடத்திய முசுலிம்கள் வாழ்வுரிமை மாநாட்டில் கலந்து கொண்டு செயா ஆற்றிய உரையில் இருந்து சிறுபகுதி இது.

''கடந்த 1998 நாடாளுமன்ற தேர்தலில் பா.ச.க வுடன் கூட்டணி அமைத்து தவறு செய்து விட்டேன்.கருணாநிதியை போல் அன்றி செய்த தவறை ஒப்புக்கொள்ளும் துணிச்சலும் நேர்மையும் எனக்கு உண்டு.அந்த தவறுக்கு பிராயச்சித்தமாக நானே பா.ச.க ஆட்சியை கவிழ்த்து விட்டேன். இனி ஒரு போதும் அ.தி.மு.கழகம். பா.ச.கவுடன் கூட்டணி வைத்துக் கொள்ளாது.''

இப்படி சொல்லி 1999 நாடாளுமன்ற தேர்தலில் முசுலிம்களின் வாக்குகளை பொறுக்கிக் கொண்ட செயா அதற்கு அடுத்து வந்த 2004 நாடாளுமன்ற தேர்தலில் மீண்டும் பா.ச.கவுடன் கூட்டணி வைத்துக் கொண்டார்.இதுதான் செயாவின் அரசியல் நேர்மை.

5.ஆந்திராவில் 2004 சட்டமன்றத் தேர்தலில் முசுலிம்களுக்கு கல்வி மற்றும் அரசு வேலைவாய்ப்பில் இட ஒதுக்கீடு அளிப்பதாக வாக்குறுதி அளித்து ஆட்சிக்கு வந்தது காங்கிரசு.அதன்படி அம்மாநில அரசு  இட ஒதுக்கீடு வழங்கி ஆணை பிறப்பித்த போது அதனை கடுமையாக எதிர்த்து அறிக்கை வெளியிட்டார் செயலிதா.இதிலிருந்தே அவரது உள்ளத்தில் எந்த அளவுக்கு பார்ப்பனிய இந்து மத வெறி முசுலிம்கள் மீதான வெறுப்பை கொழுந்து விட்டு எரிய செய்திருக்கிறது என புரிந்து கொள்ளலாம்.

இந்த செயாதான் இப்போது முசுலிம்களுக்கு கருணாநிதி அளித்துள்ள 3.5 விழுக்காடு இட ஒதுக்கீடை மேலும் கூடுதலாக்க ஆவன செய்யப்படும் என தேர்தல் வாக்குறுதி அளித்து முசுலிம் வாக்குகளையும் பெற்று ஆட்சியை பிடித்துள்ளார்.பாவம்,முசுலிம் மக்கள்.நரியின் நாட்டாமையில் ஆடுகளுக்கு நல்வாழ்வு கிட்டும் என நம்பிக்கையோடு காத்திருக்கின்றனர். 


6.தமிழ் மக்களின் பாரம்பரிய வழிபாட்டு முறைகளை காட்டுமிராண்டித்தனம் என்று சித்தரித்து அவற்றை அழித்து பார்ப்பனிய அடிப்படையிலான வழிபாடுகளை தமிழ் மக்கள் மீது திணிக்கும் நோக்கத்தில் ''கோவில்களில் ஆடு,கோழி பலியிடுதல் தடுப்பு சட்டம்''கடந்த ஆட்சி காலத்தில் கொண்டு வந்தவர்தான் செயலிதா. மேலும் தமிழ் மக்களின் மதத்தை தேர்ந்தெடுக்கும் உரிமையை மறுக்கும் வகையில் ''மத மாற்ற தடை சட்டம்'' கொண்டு வந்ததும் அவர்தான். பின்னர் 2004 நாடாளுமன்ற தேர்தலில் படுதோல்வி அடைந்த காரணத்தால் இந்த சட்டங்களை அவர் திரும்ப பெற்றாலும் இப்போது மீண்டும் மிருக பலத்துடன் ஆட்சியை கைப்பற்றியிருக்கும் துணிவில் மறுபடியும் இத்தகைய உரிமை பறிப்பு சட்டங்களை கொண்டு வர செயா திட்டமிட்டு கொண்டிருக்கலாம்.யாரறிவார்.அவரது குருநாத ''சோ''வுக்கே வெளிச்சம்.


ஆக.தமிழ்நாட்டில் ஆட்சியை கைப்பற்றி இருக்கும் செயலலிதா மோடியின் தமிழக வடிவமே. 


Saturday, May 14, 2011

செயலலிதா ஆட்சி வேறு எப்படி இருக்கும்.மூன்றாம் இருண்ட காலம்தான்.

விளையும் பயிர் முளையிலேயே தெரிகிறது.செயா தமிழ் மக்கள் மீதான முதல் தாக்குதலை தொடுத்து விட்டார்.

கருணாநிதி ஆட்சி காலத்தில் கட்டப்பட்டது என்ற ஒரே காரணத்துக்காக புதிய தலைமை செயலக வளாகத்தை புறக்கணித்து விட்டு மீண்டும் புனித சார்ச் கோட்டைக்கே தலைமை செயலகத்தை மாற்ற செயா ஆணையிட்டுள்ளார் .சரியோ தவறோ கோடிக்கணக்கில் மக்கள் வரிப்பணத்தை கொட்டி புதிய தலைமை செயலக வளாகம் கட்டப்பட்டு விட்டது.பல கோடி உருவாக்கள் செலவில் அலுவலகங்களும் மாற்றப்பட்டு விட்டன.குளிர் பதன வசதிகளுடன் சட்டப்பேரவை கூட்டங்கள் நடத்துவதற்கான வசதிகளும் செய்யப்பட்டு பேரவை கூட்டங்களும் நடத்தப்பட்டு விட்டன. இந்த நிலையில் பல கோடி உருவாக்கள் மக்கள் வரிப்பணத்தை பாழாக்கி மீண்டும் தலைமை செயலகத்தையும் சட்டப் பேரவை கூடுமிடத்தையும் இப்போது மாற்ற வேண்டிய தேவை என்ன வந்துவிட்டது,

செயாவின் அகந்தை [ego] மனப்பான்மையும் ''வாசுது'' மீது அவர் கொண்டுள்ள மூடநம்பிக்கையும் ஆட்சியை பிடித்த மறுநாளே மக்கள் வரிப்பணம் பல கோடிகளை பாழாக்குகிறது. இது போன்ற வீணடிப்புகளின் சுமை நாளை மக்களின் தலை மீதுதானே சுமத்தப்படும்.

இந்த சமயத்தில் செயலலிதாவுக்கு நாம் கோரிக்கை ஒன்றை விடுப்போம். புதிய தலைமை செயலக வளாகம் உங்களுக்கு தேவையில்லை என்றால் அதனை சென்னையில் மாட்டு தொழுவங்கள் போன்ற நிலையில் இருக்கும் சேரிகளில் வாழ்வோருக்கும் நடைபாதையில் வாழும் வீடற்ற மக்களுக்கும் இலவச வீடுகளாக கொடுத்து விடுங்கள்.சட்டப்பேரவை கூடங்களை மாநகராட்சி பள்ளிகள் நடத்த கொடுத்து விடுங்கள்.

Friday, May 13, 2011

தமிழக தேர்தல் முடிவுகள்.இனப்பகைவர்கள் வென்றனர்.வீழ்ந்தனர் விபீடணர்கள்.

கொதிக்கும் எண்ணெய் கொப்பரையிலிருந்து தப்பித்து எரியும் அடுப்பில் விழுந்ததை போன்ற நிலையில் தமிழகம் இன்று இருக்கிறது. தமிழக சட்டமன்ற தேர்தல் முடிவுகள் யாரும் எதிர்பாராத வகையில் அமைந்து அ.தி.மு.க.வுக்கு மாபெரும் வெற்றி கிட்டியுள்ளது.

கடந்த ஆறு மாதங்களாக பார்ப்பன ஊடகங்கள் தொடர்ச்சியாக நடத்தி வந்த ''அம்மாதான் அடுத்த முதலவர்'' ''மாற்றம் தேவை'' போன்ற மிகப்பெரும் ''அறிவார்ந்த'' பரப்புரையில் மயங்கிப் போன தமிழக மக்கள் செயாவை மீண்டும் ஆட்சிக்கட்டிலில் அமர வைத்துள்ளனர்.ஏற்கனவே இரண்டு முறை அம்மையாரின் ''பொற்கால''ஆட்சியை தமிழக மக்கள் அனுபவித்திருந்தாலும் அவர்களின் மறதியும் வேறு உருப்படியான மாற்று அணி இல்லாத நிலையும் செயாவின் வெற்றியை சாத்தியமாக்கியுள்ளன.

நெல்லுக்கு பாய்ந்த நீர் புல்லுக்கும் பாய்ந்த கதையாக தமிழ்நாடு இதுவரை கண்டிராத அற்புதமான ''குடிமகன்''விசயகாந்த் எதிர்க்கட்சி தலைவராக உருவெடுத்துள்ளார். அவர் ஆக்கபூர்வமான முறையில் மக்கள்நாயக பணியாற்றும் அழகை இன்னும் ஐந்து ஆண்டுகளுக்கு நாம் சகித்து கொள்ள வேண்டியிருக்கும்.

இந்த வெற்றி யாருக்கு உரியது.

இந்த வெற்றிக்கான பெருமை முழுவதும் கருணாநிதியையே சாரும். ஒப்பீட்டளவில் கடந்த ஐந்தாண்டுகளில் செயாவின் ஆட்சியை காட்டிலும் மேம்பட்ட ஆட்சியை கருணா வழங்கியிருந்தாலும் மக்களை நேரடியாக பாதிக்கும் மின்வெட்டும் விலைவாசி உயர்வும் கருணாவின் காலை வாரிவிட்டுள்ளன.இரண்டாம் தலைமுறை அலைக்கற்றை ஊழல்,குடும்ப ஆட்சி போன்ற மக்களுக்கு நேரடி பாதிப்பு ஏற்படுத்தாத குற்றச்சாட்டுகளும் சேர்ந்த நிலையில் கருணாவின் தோல்வி தவிர்க்க முடியாததாகிப் போயிருக்கிறது.கருணாவின் தோல்வியே செயாவின் வெற்றியாக மொழிமாற்றம் அடைந்துள்ளது.

இந்த வெற்றியைத்தான் செயா ''திறமையான ஆட்சியை'' இரண்டு முறை வழங்கிய காரணத்தால் மீண்டும் ஆட்சி அமைக்க மக்கள் வாய்ப்பளித்துள்ளனர் என திரிக்கிறார் செயாவின் குருநாதர் குள்ளநரி ''சோ''ராமசாமி.அந்த திறமையான ஆட்சிக்காலங்களின் முடிவில்தான் மக்கள் செயாவை விரட்டியடித்தனர்.அதில் ஒரு தேர்தலில் செயாவே பர்கூர் தொகுதியில் இழிவு தரும் தோல்வியை சந்தித்தார்.செயாவின் ''திறமை''மிகுந்த ஆட்சிக்கு சான்று எம்மிடமும் உள்ளது.2001 தேர்தலில் வென்று ஆட்சிக்கு வந்த செயா ''கசானா காலி'' என்று காட்டுக்கூச்சல் போட்டவாறு ஒரேசமயத்தில் பால்விலை,மின்கட்டணம்,பொது விநியோக அரிசி.பேருந்து கட்டணம் என அரசின் கட்டுப்பாட்டில் இருந்த அனைத்து பொருட்களுக்கும் விலையேற்றம் செய்தார்.ஒரேநாளில் 4500 கோடிக்கு விலையேற்றம் செய்து தமிழக மக்களை வாட்டி வதைத்தார். ஆண்டொன்று போனால் வயதொன்று போகும் என்றான் ஒரு புலவன்.செயாவின் ஆட்சியிலோ கட்டண உயர்வின்றி எந்த ஆண்டும் கடந்து சென்றதில்லை.இதுதான் செயாவின் திறமையான ஆட்சி என்று மக்களை ஏய்ப்பதில் வெற்றி பெற்று இருக்கிறார்கள் சோ வின்      தலைமையிலான பார்ப்பன ஊடகங்கள்.


மின்வெட்டை காரணமாக காட்டி வாக்குகளை கோரிய செயா மின்வெட்டுக்கான உண்மையான காரணத்தை பற்றி எதுவும் பேசுவதில்லை.மின்சாரம் இன்றி உள்நாட்டு தொழில்களை நலிவடைய விட்டுவிட்டு அந்நிய பன்னாட்டு நிறுவனங்களுக்கு தங்கு தடையற்ற மின்சாரம் வழங்கும் தி,மு.க.அரசின் துரோகத்தை செயா அம்பலப்படுத்தவில்லை. காரணம் அவர் ஆட்சிக்கு வந்தாலும் இதுதான் நடக்கப் போகிறது.நம் தாய்நாட்டை பன்னாட்டு நிறுவனங்களுக்கு அடிமையாக்கும் மறுகுடியேற்றமாக்கல் [recolonisation] கொள்கையில் தி.மு.க.வுக்கும் அ.தி.மு.க.வுக்கும் வேறுபாடு ஏதுமில்லை.

அடுத்து விலைவாசி.நாட்டை அடிமையாக்கும் காட் ஒப்பந்தத்தில் கையெழுத்திட்ட நாள் முதற்கொண்டே விலைவாசியை கட்டுப்படுத்தும் உரிமை மைய,மாநில அரசுகளிடமிருந்து அடகு போய் விட்ட நிலையில் ஒரு மாநில அரசு விலைவாசியை கட்டுப்படுத்துவோம் என சொல்வதை விட மோசடியான ஏமாற்று வேலை வேறொன்று இருக்க முடியுமா.


கருணா தமிழினத்தின் விபீடணனாக  மாறி ஈழத் தமிழினத்துக்கும் தமிழகத்துக்கும்  துரோகம் இழைத்திருந்தாலும் பழைய பெருங்காய குடுவையாக தமிழினத்தின் மீது ஓரளவுக்கு பற்று கொண்டு ஆட்சி நடத்தினார்.சிற்றூர்ப்புற மாணவர்களுக்கு சிறப்பு ஒதுக்கீடு,தொழிற்கல்வி நுழைவு தேர்வு ரத்து,பேருந்து கட்டணங்களை உயர்த்தாமலே ஓரளவுக்கு போக்குவரத்து துறையை சிறப்பாக நடத்தியது,விலைவாசி உயர்வின் தாக்கத்திலிருந்து மக்களை பாதுகாக்க பொது வழங்கல் துறை மூலம் மேற்கொண்ட நடவடிக்கைகள்,அரசுப்பணிக்கு ஆள் எடுப்பதை தடை செய்திருந்த செயாவின் முடிவை ரத்து செய்து அரசுப்பணிக்கு ஆள் எடுப்பதன் மூலம் பல்லாயிரம் தமிழ் இளைஞர்கள் வாழ்வில் ஒளி ஏற்றியது என நிச்சயம் கருணாவின் ஆட்சி செயாவின் ஆட்சியை விட சிறந்ததாகத்தான் இருந்தது.

ஆனாலும் ஆரிய சூழ்ச்சி மிகத்திறமையாக காய்களை நகர்த்தி கருணாவை சாய்த்து விட்டது.ஆரியத்தின் கரங்கள் காங்கிரசிலும் நடுவண் அரசிலும் செய்து முடித்த சித்து வேலைகள் அ.ராசாவை சிறையிலும் கனிமொழியை நீதிமன்றத்திலும் கொண்டு போய் நிறுத்தி வைத்துள்ளது.அவற்றை எதிர் கொள்ளும் துணிவின்றி காங்கிரசுக்கு பணிந்து குனிந்து கும்பிடு போட்டு நின்ற கருணா மக்கள் மனதில் வாக்குகள் பெற தகுதி அற்றவராக நிலை பெற்று இந்த அவமானகரமான  தோல்வியை சந்தித்துள்ளார்.

கடந்த ஐந்தாண்டுகளில் கீழ்நிலை தி.மு.க.வினர் அடித்த கொள்ளைகளை, புரிந்த அட்டூழியங்களை நேரில் கண்ட மக்களின் வெறுப்பும் இந்த தோல்விக்கான முதன்மையான காரணங்களில் ஒன்றாக உள்ளது.இதில் என்ன கொடுமை என்றால் இந்த கொள்ளைகளும் அட்டூழியங்களும் தொடரவே செய்யும்.செய்பவர்கள் மட்டும் மாறியிருப்பார்கள்.

என் செய்வது.  தமிழரின் முன் வேறு தெரிவு இல்லை.



Sunday, April 24, 2011

சாய்பாபா சாவு.''கடவுள்''தோற்றார்.இயற்கை வென்றது.

செத்தும் கொடுத்தான் சீதக்காதி எனபது போல தன் சாவிலும் தான் கடவுள் அல்ல என அம்பலப் படுத்திக் கொண்டு 96 ஆண்டுகள் உயிர் வாழ்வேன் என்று சொன்னதற்கு மாற்றமாக, உலகில் பிறந்த அத்தனை மனிதர்களும் ஒரு நாள் இறந்து போவர் என்ற இயற்கை நியதிப்படி இன்று காலை இறந்து போனார் புட்டபர்த்தி சாய்பாபா. 

தான் வாழ்ந்த காலமெல்லாம் தன்னை கடவுளின் அவதாரம்,சீரடி சாய்பாபாவின் மறுபிறவி,வாழும் கடவுள் என்று அப்பாவி மக்களை ஏமாற்றி நம்ப வைத்து அவர்களை மடமையில் ஆழ்த்தி சாமியார் வேடத்தில் கோடிக்கணக்கில் சொத்து சேர்த்து ஆடம்பர சுகபோக வாழ்க்கை நடத்தி வந்த சாய்பாபா இப்போது செத்து போய்விட்டார்.

அவருக்கு பதிவுலகில், அச்சு,தொலைகாட்சி ஊடகங்களில் இரங்கல் செய்திகள் குவிகின்றன.அரசியல் கட்சி தலைவர்கள்,அரசு,மற்றும் ஆட்சித்தலைவர்கள் அனைவரும் இரங்கல் தெரிவித்ததோடு இறுதி மரியாதை செலுத்த புட்டபர்த்திக்கு ''புனிதப் பயணமும்'' கிளம்பி விட்டனர்.

அவரை கடவுளின் அவதாரம் என ஏற்காதவர்கள்,அவர் ஒரு ஏமாற்று பேர்வழி என்ற புரிதல் உள்ளவர்கள் கூட,ஓரிருவர் தவிர்த்து,அவரது மறைவுக்கு இரங்கல் தெரிவித்து விட்டே அவர் மீதான திறனாய்வை சொல்கின்றனர்.நாம் சொல்கிறோம். இல்லை,சாய்பாபாவின் சாவுக்கு நாம் இரங்க வேண்டியதில்லை.இது நாகரிகமற்ற,இரக்கமற்ற அணுகுமுறையாக ஒருசிலர் கருதக்கூடும். அவர்களுக்கு ஒரு கேள்வி. நாளை ஒருநாள் பல்லாயிரம் உயிர்களை இரக்கமின்றி கொன்று குவித்த ராசபக்செவும் நரேந்திர மோடியும் கூட இறந்து போவார்கள்.அவர்களுக்காகவும்  நாம் வருந்த வேண்டுமா.[இந்த இடத்தில் சாய்பாபா ஆசிரமத்தில் நிகழ்ந்த கொலைகள் நினைவு படுத்திக்கொள்வது பொருத்தமாக இருக்கும்]. இறந்தவர்களை குறை கூற கூடாது என்ற நாகரிகத்தை பாபாவை பொறுத்தவரை கடைபிடிக்க முடியாது.மக்களுக்கு அநீதி இழைத்தவர்கள் இருந்தாலும் இறந்தாலும் அம்பலப்படுத்தப் பட வேண்டியவர்களே.செத்து பொய் விட்டனர் என்பதற்காக எட்டப்பனையும் இட்லரையும் கொண்டாட முடியுமா. 

அவர் மீதான கடுந்திறனாய்வுகளுக்கு விடையளிக்கும் அவரது ஆதரவாளர்கள் அவர் ஆற்றிய சமுதாயப்பணிகளை, இலவச மருத்துவமனை, அனந்தபூர் மாவட்ட குடிநீர் திட்ட உதவி,சென்னை குடிநீர் திட்டத்திற்கு 200 கோடி அளித்தது,இலவச கல்வி நிறுவனங்கள் நடத்தி வருவது, போன்றவற்றை சுட்டிக்காட்டுகின்றனர்.அவர்களுக்கு சொல்வோம். ஐயா,அறிவாளிகளே,இப்படி சில நூறு கோடிகளை செலவிடுவதன் மூலமாகத்தான்,அதைக்காட்டித்தான், பல்லாயிரம் கோடிகளை நிதியாக திரட்டி 40000 கோடிக்கு சொத்து சேர்த்து சொகுசு வாழ்க்கை நடத்தி வந்துள்ளனர் பாபாவும் அவரது அல்லக்கை கும்பலும்.அவரது பிணத்தை அடக்கம் செய்வதற்கு முன்பாகவே அந்த சொத்துகளை யார் ''நிர்வகிப்பது'' என்று பாபாவின் எடுபிடிகளுக்குள் குடுமிபிடி சண்டை சந்தி சிரிக்கிறது.

கல்விப்பணியாம்.அவரது கல்வி நிறுவனங்களில் பயிலும் சிறார்களை பாபா தனது முறைகேடான பாலியல் இச்சைகளுக்கு பயன்படுத்தியது ஆதாரங்களுடன் அம்பலமானதே.அதை வைத்து அவரது ''கல்விப்பணியை'' எடை போட்டு பார்க்கலாமே.இந்த அயோக்கியத்தனத்தை அரங்கேற்றியதற்கு பாபா பள்ளிக்கூடங்கள் எதையும் நடத்தாமலே இருந்திருக்கலாம் என்று நினைக்க தோன்றுகிறது.

இறுதியாக மீண்டும் சொல்கிறோம்.

''கடவுள் என்று தன்னை அறிவித்துக்கொண்டு மக்களை ஏமாற்றி வந்த ஒரு தில்லுமுல்லு பேர்வழிக்கு,பச்சிளம் குழந்தைகளை சீரழித்த பாலியல் வக்கிரம் பிடித்த ஒரு மனநோயாளிக்கு,அவரது சாவுக்கு அறிவுடையோர் இரங்க வேண்டியதில்லை''

இந்த இடத்தில் சாய்பாபா குறித்த எமது பழைய பதிவொன்றை மீள்பதிவு செய்வது பொருத்தமாக இருக்கும் என்பதால் அதனை மீண்டும் இங்கு பதிவு செய்கிறோம்.

புட்டபர்த்தி சாய்பாபா; கடவுளின் அவதாரமா.கபட வேடமிடும் செப்படி வித்தைக்காரனா.

புட்டபர்த்தி.கர்நாடக எல்லையில் அமைந்துள்ள ஆந்திராவை சேர்ந்த சிற்றூர். சீரடிசாய்பாபாவின் மறுபிறவி என்றும் கடவுளின் அவதாரம் என்றும் தன்னை கூறிக்கொள்ளும் புட்டபர்த்தி சாய்பாபாவின் ஆசிரமம் அமைந்துள்ள ஊர்.அதுதான் அவரது சொந்த ஊரும்கூட.அந்த ஊருக்கும் அதன் சுற்றுப்புறத்துக்கும் கொஞ்சமும் தொடர்பின்றி பிரமாண்டமாக அமைந்துள்ளன ஆசிரமும் அது நடத்தும் நிறுவனங்களும்.


அந்நிறுவனங்களில் ஒன்றான ''சத்ய சாய்உயர் கல்வி கழகம்''கடந்த 22 -11 -10 அன்று நடத்திய பட்டமளிப்பு விழாவில் சாய்பாபா முன்னிலையில் முதன்மர்.மன்மோகன் கைகட்டி பவ்யமாக அமர்ந்திருக்க கர்னாடக முதல்வர் எதியூரப்பா சாமியாரை மண்டியிட்டு பணிந்து வணங்குவதை கீழே உள்ள படத்தில் காணலாம்.
இவ்விழா பற்றிய செய்திக்கு; http://www.hindu.com/2010/11/23/stories/2010112361511300.htm
 சாமி,பக்கத்தில் இருக்காரே பெரியமனிதர் மன்மோகன் அவர்கிட்ட நம்ம ஊழலைப் பத்தி ரொம்ப தோண்ட வேணாம்னு கொஞ்சம் சொல்லுங்க,உங்களுக்கு புண்ணியமா போகும்.
அப்டியே குமாரசாமி வந்தா கொஞ்சம் கண்டிச்சு வைங்க.அந்தாளு சூன்யம் வைச்சதுதா இந்த பாடு படுத்துது


இப்படி நாட்டின் முதன்மரும் மாநில முதல்வர்களும் தொழுது வணங்கி செய்யும் மரியாதைக்கு தகுதியானவர்தானா சாய்பாபா என்று பார்த்தால் நிச்சயமாக இல்லை என்ற பதிலே கிடைக்கும்.
புட்டபர்த்தி சாய்பாபா கடவுளின் அவதாரம் என்று நீண்ட நெடுங்காலமாக செய்யப்பட்டு வரும் கள்ள பரப்புரைக்கு கணிசமானோர் பலியாகி உள்ளனர்.அதன் வெளிப்பாடாக பாபா எங்கு சென்றாலும் பக்தர்கள் கூட்டம் அலைமோதுகிறது.அவரது அருள் கிட்டிவிட்டால் மற்ற அனைத்தும் கிடைத்து விடும் என்ற அப்பாவித்தனமான நம்பிக்கையில் அம்மக்கள் மூழ்கி உள்ளனர்.


சாய்பாபா கடவுளின் அவதாரமாக சொல்லிக்கொண்டு செய்யும் அற்புதங்கள் அனைத்தும் தந்திர வேலைகளே என்று பகுத்திறவு இயக்கத்தினர் பலமுறை நிரூபித்து காட்டியுள்ளனர்.மேலும் சாய்பாபா ஒரு கீழ்த்தரமான பாலியல் குற்றவாளி என்பதும் ஆதாரங்களுடன் அம்பலப்படுத்தப் பட்டுள்ளது.தனது பாலியல் இச்சைகளுக்கு அவர் ஆசிரமம் நடத்தும் கல்வி நிறுவனங்களில் பயிலும் சிறுவர்களை பயன்படுத்துகிறார் என்ற குற்றச்சாட்டும் ஆதாரங்களுடன் முன்வைக்கப்பட்டுள்ளது.சாய்பாபாவின் ஆசிரமத்தில் தங்கியிருந்தவர்களே கொடூரமாக கொலை செய்யப்பட்டதும் உண்டு.


இவையெல்லாம் காழ்ப்புணர்ச்சியால் உந்தப்பட்டு யாரும் இட்டுக்கட்டியவை அல்ல.இக்குற்றச்சாட்டுகள்  பிரித்தானிய ஒலிபரப்பு நிறுவனத்தால்  (BBC) ஆதாரங்களுடன் ஒளிபரப்பப்பட்டு கோடிக்கணக்கான மக்களை சென்றடைந்துள்ளன.அவற்றை தமிழில் மொழிபெயர்த்து பெரியார் திராவிடர் கழகம் வெளியிட்டுள்ள ஒளிப்பட தொகுப்பை கீழ்காணும் சுட்டிகளில் காணலாம்.


http://www.youtube.com/watch?v=jjRaReI5b2Q&feature=related
http://www.youtube.com/watch?v=vdsYsRaNA4k&NR=1
http://www.youtube.com/watch?v=QmUn7lkGevE&NR=1
http://www.youtube.com/watch?v=iK3QlPGYiJA&feature=related
http://www.youtube.com/watch?v=RskbqOOh6Ig&NR=1
http://www.youtube.com/watch?v=M3oWmzZI_hs&NR=1

பார்த்துவிட்டீர்களா நண்பர்களே.இப்போது சொல்லுங்கள்.சாய்பாபா கடவுளின் அவதாரமா இல்லை செப்படி வித்தையால் ஊரை,அல்ல,உலகை ஏய்க்கும் கயவனா.


இது தவிர சாய்பாபா பணத்தின் மீது பேராசை கொண்டவர் என்பதும் அம்பலமாகியுள்ளது.தனது பக்தர்களை தாராளமாக ஆசிரமத்துக்கு நிதி உதவி செய்ய தூண்டும் பாபா பக்தர்கள் தங்களது சொத்துக்களை ஆசிரமத்துக்கு தானமாக அளிப்பதையும் ஊக்குவிக்கிறார்.அவ்வாறு விசயவாடாவை சேர்ந்த ஒரு மூதாட்டி அவர் இறந்தபின் அவரது வீடு பாபாவின் ஆசிரமத்துக்கு தானமாக வழங்கப்பட வேண்டும் என்று தனது 55 -வது வயதில் உயில் எழுதி வைத்த பாவத்திற்காக உயிருடன் இருக்குபோதே வீட்டை பாபாவின் ஆசிரமத்திடம்  பறி கொடுத்த பரிதாபத்தை கீழே உள்ள சுட்டியில் காணலாம். 
http://exposedsaibaba.blogspot.com/

ஆக கொலைக்கஞ்சா கொடியவர்களின் ஆசிரமத்தின் தலைவர்,தெருவோரத்தில் வித்தை காட்டி பிழைக்கும் செப்படி வித்தைக்காரனின் தந்திர வேலைகளை அற்புதங்கள் போன்று செய்துகாட்டி ஏய்க்கும் ஒரு மோசடி பேர்வழி, பேராசை கொண்ட ஒரு பணப்பேய் கடவுளின் அவதாரமாக இருக்க முடியுமா.


சாய்பாபாவை கடவுளின் அவதாரமாக நம்புவோரிடம் நாம் கேட்க விரும்பும் சில கேள்விகள்.


சாய்பாபா தங்கத்தாலான கடவுள் சிலையை (லிங்கம்) வாயிலிருந்து அல்லது வயிற்றிலிருந்து எடுக்கிறார்.அவரே படைத்த ஒரு பொருள் போல் அதை பக்தர்கள் என்ற பேரில் கூடியிருக்கும் ஆட்டு மந்தையிடம் காட்டி கை தட்டல் பெறுகிறார். காற்றில் கையை சுழற்றி தங்க சங்கிலி வரவழைக்கிறார்.வெறும் கையால் தங்க மோதிரத்தை தருவிக்கிறார்.இவையெல்லாம் உண்மையென்றால்,வெறும் காற்றிலிருந்தும் தனது வயிற்றிலிருந்தும் இவ்வளவு செல்வங்களை படைக்க வல்ல சாய்பாபா இப்படி தங்க கட்டிகளை படைத்து இந்தியாவின் உள்நாட்டு,வெளிநாட்டு கடன் அத்தனையும் அடைத்துவிடலாமே.ஏன் செய்யவில்லை.


தங்கத்தையே வரவழைக்க வல்லவர் பக்தர்களிடம்  பிச்சை எடுப்பது  ஏன். 


கொல்லர் பட்டறையில் தங்க நகை உருவாகும்.மனிதனின் வயிற்றில் என்ன உருவாகும்.சாய்பாபா வயிற்றில் தங்கம் உருவாகிறதென்றால் பெரும்  பொருட்செலவில் கோலார் தங்க வயலில் தேடுவதற்கு பதிலாக சாய்பாபாவை வைத்து வேண்டிய அளவுக்கு தங்கத்தை தேடிகொள்ளலாமே. இந்திய அரசுக்கு இந்த யோசனையை நீங்கள் ஏன் தெரிவிக்கவில்லை.


சாய்பாபா கடவுளின் அவதாரம் என்றால் 50 களில் துள்ளி திரிந்த அவர் கடந்த சிலபல ஆண்டுகளாக தள்ளாமையால் தடுமாறுவது ஏன்.


தனது தள்ளாமையையும் மூப்பையும் சமாளிக்க முடியாமல் தத்தி தத்தி நடந்து வரும் ,சமயங்களில் சக்கர நாற்காலியில் வரும் , பாபா பக்தர்களின் குறைகளை தீர்த்து விடுவார் என்பதை நம்ப முடியுமா.
எண்ணிப்பாரீர்.


நமக்கு தெரிந்த இந்த உண்மைகள் நாட்டின் முதன்மருக்கும் மாநில முதல்வர்களுக்கும் தெரியும்தானே. அப்படியிருந்தும் அவர்கள் பாபாவை பணிந்து நிற்பதேன்.இந்த கேள்விக்கு விடை தேடி எங்கும் அலைய வேண்டியதில்லை.மேற்கண்ட இந்து நாளிதழின் செய்தியிலேயே இதற்கு விடை இருக்கிறது.


அந்த பட்டமளிப்பு விழாவில் கலந்து கொண்ட பெரும்புள்ளிகளின் பட்டியல்.
1.நாட்டின் முதன்மர்.மன்மோகன்.
2.ஆந்திர முதல்வர்.
3.கர்நாடக முதல்வர்.
4.தமிழக துணை முதல்வர்.(பெரியார் இல்லாதது வசதியாக போய்விட்டது .)
5.அண்மையில் மகராட்டிர முதல்வர் பதவியை இழந்த அசோக் சவான்.
6.ஆந்திர ஆளுநர்.
7.பஞ்சாப் ஆளுநர்.
8.திரிபுரா ஆளுநர்.
9.டாட்டா நிறுவனங்களின் தலைவர் ரத்தன் டாட்டா.
10.டி.வி.எசு.நிறுவனங்களின் தலைவர் வேணு சீனிவாசன்.


இப்படி பெரும்புள்ளிகள் ஒரு பட்டமளிப்பு விழாவில் ஏன் ஒன்று கூடவேண்டும். ஓரிரு பிரபலங்கள் போதாதா.உண்மையில் ஆட்சியில் இருப்போருக்கும்,உயர் அதிகாரிகளுக்கும்,பெரும் முதலாளிகளுக்கும் இடையிலான வேலைகளை செவ்வனே முடித்து தரும் தரகு வேலையைத்தான் பெரும்பாலான சாமியார்கள் செய்து வருகிறார்கள்.அந்தவகையில் தாங்கள் வேலைகளை சாதித்து கொள்வதற்காகவே பெரும்புள்ளிகள் மடங்களையும் ஆசிரமங்களையும் தேடி வருகின்றனர்.அப்படிப்பட்ட தரகர்களின் முன்னணி வரிசையில் உள்ளவர்கள்தான் சாய்பாபாவும் அவரது அல்லக்கைகளும்.இத்தகைய விழாக்கள் அவர்கள் கூடுவதற்கான ஒரு வாய்ப்பு,ஒரு சாக்கு.


அதனால்தான் பாபா போன்றோரின் குற்றவியல்,பொருளாதார,பாலியல் குற்றங்கள் மூடி மறைக்கப்பட அரசுகள் உடந்தையாக உள்ளன.ஆசிரமத்தில் கொலையே நடந்தாலும் முதல்வர்கள் தொழுது வணங்கும் பாபா மீதோ அவரது அடிவருடிகள் மீதோ முதல் தகவல் அறிக்கை பதிவு செய்ய காவல்துறையினருக்கு துணிவு வருமா என்று எண்ணிப்பாருங்கள்.


இப்படியான பின்னணியில்தான் சாய்பாபா அப்பழுக்கற்றவர் போல் நடித்து கடவுளின் அவதாரம் என்று நாடகமாட முடிகிறது.பெரும்பாலான மக்கள் விழிப்புணர்வு பெறாதவரை பாபாக்களுக்கு கொண்டாட்டம்தான்.